ޣައްޒާގެ އުތުރުގެ ހޮސްޕިޓަލްތައް މިހާރު މުޅިން ހުސްވެފައިވާކަމަށް ސިއްހީ އޮފިޝަލުން ވިދާޅުވެއްޖެ

އިސްރާއީލުގެ ނިރުބަވެރިން ދެމުންދާ ވައިގެ ހަމަލާތަކާއި ކޮށްފައިވާ ފުރަބަންދުގެ ސަބަބުންނާއި، އަދި އެއްގަމު އުޅަނދުތަކުގައި ޣައްޒާއަށް އަރައި އުތުރު ޣައްޒާ އެކީއެކަށް ސުންނާފަތި ކުރަމުންދާތީ ޣައްޒާގެ އުތުރުގެ މެޑިކަލް ފެސިލިޓީތައް މިހާރު މުޅިން ހުސްވެފައިވާކަމަށް ޣައްޒާގެ ސިއްހީ އޮފިޝަލުން ވިދާޅުވެއްޖެއެވެ.

ހެލްތު މިނިސްޓްރީގެ ތަރުޖަމާނު އަޝްރަފް އަލް ކުދްރާ ވިދާޅުވީ، ކަރަންޓާއި ތެލުގެ ދަތިކަމުގެ ތެރޭގައި ހަނގުރާމައިގެ ޒަޚަމްތަކާއެކު އުތުރުގެ ހޮސްޕިޓަލްތައް ފުރިގެންދަނީ 190 ޕަސެންޓް އޮކިއުޕެންސީ ރޭޓުގައި ކަމަށެވެ. ޣައްޒާގެ އެންމެ ބޮޑު ހޮސްޕިޓަލް ކަމަށްވާ އައްޝިފާ ހޮސްޕިޓަލް މިދިޔަ ހަފުތާއިން ފެށިގެން އިސްރާއީލު ސިފައިންގެ ބެލުމުގެ ދަށަށް ވަނީ ގެންގޮސްފައެވެ.  

ޣައްޒާގެ އުތުރުގެ ސިއްހީ ނިޒާމު އެއްކޮށް ހަލާކުވެ ފުނޑިފައިވާއިރު، ވަށާލާފައިވާ އިންޑޮނޭޝިއާ ހޮސްޕިޓަލުގެ ތެރޭގައި 400އަށްވުރެ ގިނަ މީހުން ޒަޚަމްވެ، ހިޔާވަހިކަން ހޯދާ 2،200އެއްހާ މީހުން އަދިވެސް ތާށިވެފައި އެބަތިބި ކަމަށް އަލްޖަޒީރާއިން ރިޕޯޓްކުރެއެވެ. އަލްޖަޒީރާގެ ނޫސްވެރިންބުނީ އިސްރާއީލުގެ ނިރުބަވެރިން ވަނީ ހޮސްޕިޓަލް ވަށާލާފައި ވާކަމަށާއި، އެތަނުން ނުކުންނަން އުޅޭ ކޮންމެ މީހަކަށް ބަޑިން ހަމަލާ ދެމުންދާ ކަމަށެވެ.

ފާއިތުވި ދުވަސްތަކުގައި އެހޮސްޕިޓަލުން 12 މީހަކު ވަނީ މަރުވެފައެވެ. ދުނިޔޭގެ ސިއްހަތު ޖަމިއްޔާއިން ބުނަނީ އެ ހޮސްޕިޓަލުން މިހާރު ފޯރުކޮށްދެނީ ވަރަށް އާދައިގެ ފަރުވާތަކެއް ކަމަށާއި، އެކަމުގެ ސަބަބުން ސީރިއަސް ކޭސްތައް ނުރައްކަލަށް ހުށަހެޅިފައި ވާކަމަށެވެ. 

އިސްރާއީލުން ދިން ބޮމުގެ ހަމަލާތަކުގައި ޣައްޒާގެ ހެލްތު މިނިސްޓަރުގެ ނައިބާއި، އޭނާގެ ގޭގައި ހިޔާވަހިކަން ހޯދަމުން ދިޔަ 50ށްވުރެ ގިނަ، ގާތްތިމާގެ މީހުންވެސް ވަނީ ޝަހީދުވެފައި ކަމަށް އަލްޖަޒީރާއިން ބުނެއެވެ.  

އިންސާނީ ހައްގުތަކާބެހޭ މާހިރުން ތުހުމަތުކުރާގޮތުގައި، ހަމާސްއަށް ޕްރެޝަރު ކުރުމަށްޓަކައި އިޒްރޭލުން ސިސްޓަމެޓިކްކޮށް ސިއްހީ މަރުކަޒުތަކަށް ހަމަލާ ދިނުމަކީ އިންސާނީ ގާނޫނާ ޚިލާފު ކަމެކެވެ.

އދ.ގެ ތަފާސް ހިސާބުތައް ދައްކާގޮތުން، އިސްރާއީލުގެ ހަމަލާތަކުގެ ސަބަބުން ފަލަސްތީނުގެ 13،000ށްވުރެ ގިނަ މީހުން ޝަހީދުވެ، ހަތް ލައްކަ ކުޑަކުދިން ގެދޮރު ގެއްލި، ޣައްޒާގެ ހޮސްޕިޓަލްތައް ވަނީ ހަލާކުވެފައެވެ.