ޔޫކްރެއިނާ އެއްވަރުވިނަމަވެސް، ޗެމްޕިއަން އިޓަލީ ޔޫރޯއަށް
އަންނަ އަހަރު ޖަރުމަނުގައި އޮންނަ ޔޫރޯގެ ޖާގަ އިޓަލީން ކަށަވަރުކުރީ، ގްރޫޕް ސީގެ ދެވަނަ ޓީމުގެ ގޮތުގައި
އިޓަލީއާއި ޔޫކްރެއިން ކުޅުނު މެޗުގެ ތެރެއިން
ޔޫރޯ ފުޓުބޯޅަ މުބާރާތުގެ ކޮލިފިކޭޝަންގެ ގްރޫޕް ސްޓޭޖުގެ ފަހު މެޗުގައި ޔޫކްރެއިނާ ދެކޮޅަށް ކުޅުނު މެޗު އެއްވަރުވިނަމަވެސް، އެންމެ ފަހުގެ ޗެމްޕިއަން އިޓަލީ ޔޫރޯއަށް ކޮލިފައިވެއްޖެއެވެ.
އަންނަ އަހަރު ޖަރުމަނުގައި އޮންނަ ޔޫރޯގެ ޖާގަ އިޓަލީން ކަށަވަރުކުރީ، ގްރޫޕް ސީގެ ދެވަނަ ޓީމުގެ ގޮތުގައެވެ. ކޮލިފިކޭޝަންގެ ފަހު މެޗަށް ކުރިމަތިލިއިރު، މި ގްރޫޕްގެ ދެވަނަ ޓީމެއް ކަށަވަރުވާން އޮތީ އެ މެޗުންނެވެ. އެ މެޗު ނިމުނީ އެއްވެސް ޓީމަކަށް ލަނޑެއް ނުޖެހި، އެއްވަރުވެގެންނެވެ. މެޗުގައި ދެ ޓީމަށް ވެސް ވަނީ ލަނޑު ޖަހާނެ ފުރުސަތުތައް ލިބިފައެވެ. ނަމަވެސް، ލިބޭ ފުރުސަތުތައް ނިންމާލުމުގައި ދެ ޓީމަށްވެސް ވަނީ ކާމިޔާބުވާ ގޮތް ނުވެފައެވެ.
ކޮލިފިކޭޝަންގައި ކުޅުނު އަށް މެޗުން ދެ ޓީމަށްވެސް ލިބެނީ 14 ޕޮއިންޓެވެ. ނަމަވެސް، ކުރި ހޯދަނީ އިޓަލީއެވެ. އެހެންކަމުން، އަންނަ އަހަރުގެ ޔޫރޯ ފުޓުބޯޅަ މުބާރާތުން އެ ޓީމަށް ވަނީ ޖާގަ ލިބިފައެވެ. އެންމެ ފަހުން 2020 ވަނަ އަހަރު އޮތް ޔޫރޯ ފުޓުބޯޅަ މުބާރާތުގެ ޗެމްޕިއަންކަން ހޯދީ އިޓަލީއެވެ.
