"ފުދިއްޖެ": ލުބްނާ މި ދައްކަނީ ކޮން ވާހަކައެއް؟

ޔަހޫދީ އިޒްރޭލުން ޣައްޒާގައި ޤަތުލުޢާންމު ހިންގަން ފެށިއިރު، ލުބްނާ ސާއިޤު އުޅުނީ އޭނާގެ ތުއްތު ތުއްތު ދަރިފުޅު ގޮވައިގެން ހޮސްޕިޓަލުގައެވެ. އޭރު އެ ދަރިފުޅު މި ދުނިޔެއަށް އުފަންވިތާ މާ ގިނަ ދުވަހެއްވެސް ނުވެއެވެ. އެ ދަރިފުޅަކީ ދުވަސް ނުފުރާ ވިހޭ ކުއްޖެއް ކަމުން، ނޭވާލުމުގައި މައްސަލަތަކެއް ކުރިމަތިވެ، އޮކްސިޖަންގެ ފަރުވާ ދޭން ޖެހުނު ކުއްޖެކެވެ.

ލުބްނާގެ އަންހެން ދަރިފުޅު މި ދުނިޔެއަށް ލޯ ހުޅުވާލީ، ޙަމާސްގެ ވަސް، މި ބިންމަތިން ފޮހެލުމަށް ކަމަށް ބުނެ ޔަހޫދީ އިޒްރޭލުން ޣައްޒާއަށް ޢުދުވާނީ ޙަމަލާތައް ދޭން ފެށުމުގެ އެންމެ 10 ދުވަސް ކުރިންނެވެ. ޢުދުވާންގަނޑު ގަދަވާން ފެށުމާއެކު ލުބްނާއަށް މަޖުބޫރުވީ، އުތުރު ޣައްޒާގައި ދިރިއުޅެމުން ދިޔަ ގެދޮރު ދޫކޮށް، އަލް-ޝިފާ ހޮސްޕިޓަލަށް ބަދަލުވާށެވެ. ތުއްތު ދަރިފުޅާއި ފިރިމީހާއާއެކު، އަލް-ޝިފާ ހޮސްޕިޓަލަށް ލުބްނާ ބަދަލުވީ، ދަރިފުޅަށް ބޭނުންވާ ޞިއްޙީ އެހީ ކަށަވަރުކޮށްދިނުމުގެ ބޭނުމުގައެވެ.

މިޞްރުގެ ރަފަޙުގައި ހުރެ، ނޮވެމްބަރު 20 ވަނަ ދުވަހު މީޑިއާއާއި ވާހަކަދައްކަމުން ލުބްނާވެސް ބުނީ ހަމަ އެއް ވާހަކައެކެވެ. ޢުދުވާނީ ޙަމަލާތަކެއް ހޮސްޕިޓަލަށް ޢަމާޒު ކޮށްފާނެ ކަމަށް ހީ ކުރެވިފައި ނެތް ވާހަކައެވެ. ލުބްނާގެ ދަރިފުޅަކީ ޞިއްޙީ ފަރުވާއަށް މިޞްރަށް ފޮނުވާލެވުނު 24 އަކަށް ތުއްތު ކުދިންގެ ތެރޭގައި ހިމެނުނު ކުއްޖެކެވެ.

އަލް-ޝިފާ ހޮސްޕިޓަލުގައި ބިންގަރާހެއްގެ ގޮތުގައި ޙަމާސް ޖަމާޢަތުގެ ހޮހަޅައެއް ހަދާފައި ވާ ކަމަށް ބުނެ، އިޒްރޭލުގެ ފައުޖުތަކުގެ ބާރުގެ ދަށަށް އެ ހޮސްޕިޓަލު ގެންދިޔައީ ހުސްވި ހަފުތާގެ ތެރޭގައެވެ.

އިޒްރޭލުގެ ޢުދުވާންތަކާ ގުޅިގެން ޣައްޒާގެ ޞިއްޙީ ނިޒާމު މުޅިން އިނދަޖެހުމާއި، ތެލުގެ ސަޕްލައި ހުސްވެ، އަލް-ޝިފާ ހޮސްޕިޓަލުން ކަރަންޓު ކެނޑުމުގެ ސަބަބުން ތުއްތު އެތައް ކުދިންނެއް ވަނީ މި ދުނިޔެއާ ވަކިވެ ގޮސްފައެވެ. 

އެޔެއް މިޔެއް ބެލުމެއް ނެތި ޣައްޒާއަށް އަމާޒުކޮށް، އެއްގަމާއި ކަނޑާއި ވައިގެ މަގުން ޣައްޒާއަށް ދެމުންދާ ޢުދުވާނީ ޙަމަލާތަކުގައި މި ދުނިޔެއާ ވަކިވެ ދިޔަ ކުޑަކުދިންގެ ޢަދަދު މިހާރު 6000 އާ ގާތް ކުރަނީއެވެ. ވީނުވީއެއް ނޭނގި ގެއްލިފައިވާ 4000 އަށްވުރެ ގިނަ އަންހެނުންނާއި ކުޑަކުދިން އެބަ ތިއްބެވެ. ގެދޮރު ގެއްލި، ވަގުތީ ހިޔާތަކުގައި ގަނަތެޅެމުންދާ އާބާދީގައިވެސް ގިނައީ ކުޑަކުދިންނެވެ.