ހުޅުމާލޭގައި ތަރައްގީކުރަމުން އަންނަ ކޭ ޕާކް ފްލެޓްތަކުގެ މައްސަލާގައި ގިނަ ތުހުމަތުތަކެއް އަމާޒުވެފައިވާ ހަސަން މަމްދޫހު (މަންޑޭ) ދިރިއުޅޭ އެޕާޓުމަންޓު، ބަލައި ފާސްކޮށް އެގެއިން ބައެއް ތަކެތި ފުލުހުންގެ ބެލުމުގެދަށަށް ގެންގޮސްފިއެވެ.

އާދިއްތަ ދުވަހު ފުލުހުން ބުނީ ކޭ ޕާކް މައްސަލާގައި ތުހުމަތުކުރެވޭ މަންޑޭ ދިރިއުޅޭ ގެ، ކޯޓު އަމުރެއްގެ ދަށުން ނޮވެންބަރު 18 ވަނަ ދުވަހު ބަލައި ފާސްކޮށްފައި ވާކަމަށެވެ. އަދި މައްސަލައާ ގުޅުންހުރި ބައެއް ތަކެތި ފުލުހުންގެ ބެލުމުގެދަށަށް ގެންގޮސްފައި ވާކަމަށެވެ.

ހަންބޯ މޯލްޑިވްސްގެ ނަމުގައި ހަދާފައިވާ ފޯޖު ލިޔުންތަކެއް ބޭނުން ކޮށްގެން، މަކަރާއި ހީލަތުން އެޕާޓްމަންޓުތައް ވިއްކައި, ފައިސާއަށް ޚިޔާނާތްތެރިވި ކަމަށް ތުހުމަތުކުރާ މައްސަލައެއް ފުލުހުން އަންނަނީ މިއަހަރުގެ ކުރީކޮޅުން ފެށިގެން ތަހުގީގު ކުރަމުންނެވެ. އަދި މިމައްސަލާގައި މަންޑޭއަށް ދައުވާކުރުމާ ގުޅޭގޮތުން މަޝްވަރާކުރަމުން ދާކަމަށްވެސް 22 އޮކްޓޯބަރު 2023 ވީ އާދިއްތަ ދުވަހު ފުލުހުން ބުނެފައިވެއެވެ.

މި މައްސަލާގައި އެ ކުންފުނީގެ ދިވެހި ހިއްސާދާރު ކަމަށްވާ މަންޑޭއަށް ވައްކަމުގެ ތުހުމަތުކޮށް، ޖިނާއީ ތަހުގީގު ކުރުމަށް، ހަންބޯ މޯލްޑިވްސްގެ މައި ހިއްސާދާރު ވަނީ މައްސަލަ ހުށަހަޅާފައެވެ.

މިމައްސަލައާ ގުޅިގެން މަންޑޭގެ ޕާސްޕޯޓު ހިފަހައްޓައި، ހައްޔަރުކޮށްފައި ވެއެވެ. އެގޮތުން އެންމެ ފުރަތަމަ އޭނާ ހައްޔަރުކޮށްފައިވަނީ ހުޅުމާލޭ ކޯޓުން ނެރުނު އަމުރެއްގެ ދަށުން، 05 ޖުލައި 2023 ވީ ބުދަ ދުވަހުގެ ވަގުތެއްގައެވެ. އެންމެ ފުރަތަމަ އޭނާގެ ބަންދަށް ޖަހާފައިވަނީ 15 ދުވަހެވެ. އޭނާގެ ބަންދުގެ މުއްދަތު ހަމަވެ، 20 ޖުލައި 2023 ވީ ބުރާސްފަތި ދުވަހު ކޯޓަށް ހާޒިރުކުރުމުން އޭނާ ބަންދަށް 10 ދުވަސް ޖެހިއެވެ. އަދި އޭގެ ފަހުން އޭނާ ދޫކޮށްލީ 30 ޖުލައި 2023 ވީ އާދިއްތަ ދުވަހުގެ ވަގުތެއްގައެވެ.

އޭގެފަހުން 02 އޯގަސްޓު 2023 ވީ ބުދަ ދުވަހު މަންޑޭގެ ޕާސްޕޯޓު ދޫކޮށްލުމަށް ކްރިމިނަލް ކޯޓުން ނެރުނު އަމުރު، ދިވެހިރާއްޖޭގެ ހައިކޯޓުން ވަނީ ބާތިލްކޮށްފައެވެ.

މަންޑޭއަށް ކުރާ ތުހުމަތުތައް އޭނާ ދޮގުކުރެއެވެ. އަދި އެ މަޝްރޫއު ހިންގާ ކުންފުނިކަމަށްވާ ހަންބޯ މޯލްޑިވްސްގެ މައި ހިއްސާދާރު އުޅެނީ ފައިސާ ހިފައިގެން ފިލަން ކަމަށްވެސް މަންޑޭ ތުހުމަތުކޮށްފައި ވެއެވެ.

ހުޅުމާލޭގައި މިކްސްޑް ޔޫސް ރެޒިޑެންޝަލް ކޮމްޕްލެކްސްއެއް ތަރައްގީކުރުމަށް ހަންބޯ ޓެކް ކޮރެއާއާ އާބަންކޯއާ ދެމެދު އެއްބަސްވުމުގައި ސޮއިކުރީ 09 އޮކްޓޫބަރު 2016ގައެވެ. އެ އެއްބަސްވުމަށްފަހު، ފްލެޓް ގަންނަން މީހުންނަށް އެހީތެރިވުމަށާއި މާކެޓްކުރުމަށް ރާއްޖޭގެ އޭޖެންޓެއްގެ ގޮތުގައި ހަންބޯ މޯލްޑިވްސް ހަމަޖެއްސިއެވެ.