ސައުދީ ލީގަކީ ޝައުޤުވެރި ލީގެއް: ގަލާޑޯ

ސައުދީ ޕްރޯ ލީގަކީ މަޝްހޫރުކަން ހޯދަމުން އަންނަ، ޝައުޤުވެރި ލީގެއް ކަމަށް އަލް އިއްތިހާދުގެ ކޯޗަކަށް ހަމަޖެއްސި އާޖެންޓީނާގެ މާސެލޯ ގަލާޑޯ ބުނެފި އެވެ.

އޭނާ މިހެން ބުނީ، އަލް އިއްތިހާދުގެ ކޯޗުކަމާ ހަވާލުވުމަށްފަހު މީޑިއާއަކާ ވާހަކަ ދައްކަމުންނެވެ. ގަލާޑޯ ބުނީ، އަލް އިއްތިހާދުގެ ހުށަހެޅުން އޭނާ ޤަބޫލު ކުރުމުގައި އަމިއްލަ ސަބަބުތަކެއް ވެސް ހުރި ކަމަށެވެ. ހަމަ އެއާއެކު، އަލް އިއްތިހާދުން އޭނާ އާއެކު ކުރިއަށް ގެންދިޔަ މަޝްވަރާތަކުގައި، އެ ކުލަބުން ވަރަށް ރަނގަޅު ވިސްނުންތަކެއް ގެންގުޅެމުން އަންނަކަން ހާމަވެގެން ދިޔަ ކަމަށް ވެސް އޭނާ ބުންޏެވެ. އެގޮތުން ސައުދީ ލީގަކީ މިވަގުތު އެންމެ ބޮޑު މަޝްހޫރުކަމެއް ހޯދަމުން އަންނަ އެއް ލީގު ކަމަށާއި، ދުނިޔޭގެ ނިސްބަތުން ފާހަގަކޮށްލެވޭ މޮޅެތި ކުޅުންތެރިން އެ ލީގުގައި ކުޅެމުން އަންނަކަން އޭނާ ފާހަގަ ކުރި އެވެ.

މީގެ އިތުރުން ގަލާޑޯ ބުނީ، އަލް އިއްތިހާދާ އެކު މަސައްކަތް ކުރަން ފެށުމުން އޭނާގެ ވިސްނުން ވެސް އިތުރަށް ހުޅުވިގެން ދާނެ ކަމަށެވެ. އެކުލަބާ ހަވާލުވުމަކީ ވަރަށް ތަފާތު ކަމެއް ކަމަށާއި، ޚާއްސަކޮށް ބޮޑު ޚަރަދުތަކެއްކޮށް، މަތީ ފަންތީގައި ފައިތިލަ ސާބިތު ކުރުމަށް ކުރަމުން އަންނަ މަސައްކަތް ބޮޑު ކަމަށް އޭނާ ބުންޏެވެ.

ގަލާޑޯ ބުނީ، އޭނާގެ އަމާޒަކީ ކުލަބުން ބޭނުންވާ ލަނޑުދަނޑިތައް ހާސިލް ކުރުން ކަމަށެވެ. އޭނާގެ އެންމެ ބޮޑު އެއް މަސައްކަތަކަށް ވާނީ ސައުދީ ލީގުގައި އެ ޓީމުގެ ނަތީޖާތައް ރަނގަޅު ކުރުމެވެ. ޚާއްސަކޮށް އެ ޓީމަކީ އެންމެ ފަހުގެ ޗެމްޕިއަނުންނަށް ވެފައި، މޮޅެތި ކުޅުންތެރިންނާއެކު ވެސް މިހާރުގެ ނަތީޖާތައް ކުލަބުގެ ވެރިންނަށް ޤަބޫލު ކުރަން ދަތިވެ އެވެ.