ވޯލްޑްކަޕް ކޮލިފައިން: ސައުދީ އަރަބިއްޔާ ކޮލިފައިވިއިރު، ދެކުނު ކޮރެޔާވެސް ވޯލްޑްކަޕަށް ކޮލިފައިވެއްޖެ

ރަޝިއާގައި 2018 ވަނަ އަހަރު ބާއްވާ ދުނިޔޭގެ އެންމެ ބޮޑު ފުޓްބޯޅަ މުބާރާތް ކަމުގައިވާ "ވޯލްޑްކަޕް" އަށް ސައުދީ އަރަބިއްޔާ ކޮލިފައިވިއިރު، ދެކުނު ކޮރެއާ ވެސް ކޮލިފައިވެއްޖެއެވެ.

ސައުދީ އަރައްބިޔާ ވޯލްޑް ކަޕަށް ކޮލިފައިވީ ކޮލިފިކޭޝަންގެ ފަހު މެޗުގައި ޖަޕާނާ ވާދަކޮށް 0-1 ގެ ނަތީޖާއަކުން މޮޅުވެ، އެޓީމު ހިމްނޭ ގްރޫޕް ބީގެ ދެވަނަ ހޯދައިގެންނެވެ. މި ގްރޫޕުގެ އެއްވަނަ ޓީމުގެ ގޮތުގައި ވޯލްޑްކަޕަށް ކޮލިފައިވީ މި މެޗުން ސައުދީ އަތުން ބަލިވި ޖަޕާނެވެ.

ދެ ޓީމުގެ ފަރާތުންވެސް ވަރަށް ވާދަވެރި ކުޅުމެއް ފެނިގެންދިޔަ މި މެޗުގައި ސައުދީގެ ހަމައެކަނި ގޯލު މެޗުގެ 63 ވަނަ މިނެޓްގައި ކާމިޔާބުކޮށްދިނީ ފަހުދު އަލް މުވައްލަދުއެވެ. މިއީ 2006 ވަނަ އަހަރަށް ފަހު ސައުދީ ވޯލްޑްކަޕަށް ކޮލިފައިވި ފުރަތަމަ ފަހަރުކަން ފާހަގަކޮށްލެވެއެވެ.

ދެކުނު ކޮރެޔާ ވޯލްޑްކަޕަށް ކޮލިފައިވީ ކޮލިފިކޭޝަންގެ ފަހު މެޗުގައި ރޭ އުޒްބެކިސްތާނާ އެއްވަރުކޮށް ގްރޫޕް އޭގެ ދެވަނަ ޓީމުގެ ގޮތުގައެވެ. މި މެޗު އެއްވަރުވެފައިވަނީ އެއްވެސް ޓީމަކަށް ގޯލެއް ކާމިޔާބު ނުކުރެވި 0-0 ގެ ނަތީޖާއަކުންނެވެ. ގްރޫޕު އޭގެ އެއްވަނަ ޓީމުގެ ގޮތުގައި ވޯލްޑްކަޕަށް ކޮލިފައިވީ އިރާނެވެ. މިއީ ދެކުނު ކޮރެޔާ ވޯލްޑްކަޕަށް ޖެހިޖެހިގެން ކޮލިފައިވި ނުވަ ވަނަ ފަހަރެވެ.

ސައުދީއަރަބިޔާ އަދި ދެކުނު ކޮރެޔާއާގެ އިތުރުން ވޯލްޑްކަޕަށް ކޮލިފައިވެފައިވާ ގައުމުތަކަކީ، ބްރެޒިލް އާއި މެކްސިކޯ އާއި ބެލްޖިއަމްގެ އިތުރުން މުބާރާތް ބާއްވާ ގައުމު ރަޝިއާއެވެ.