މާޒިޔާއާ މެޗަށް ފަހު ގަލާޑޯ ނިއު ދޫކޮށްލަނީ!
22 ނޮވެމްބަރު 2017 | ބުދަ 14:21ނިއުއާއެކު ގަލާޑޯ ހަދާފައިވާ އެއްބަސްވުން ހަމަވާނީ ޑިސެމްބަރު މަހުގެ ދެވަނަ ދުވަހު
ނިއު އަށް ކުޅެމުން އަންނަ އެޑްރިއަން ގަލާޑޯ
އުރީދޫ ދިވެހި ޕްރިމިއާ ލީގުގައި އާދީއްތަ ދުވަހު މާޒިޔާ ސްޕޯޓްސް އެންޑް ރެކްރިއޭޝަންއާ ދެކޮޅަށް ނިއުރޭޑިއަންޓް ސްޕޯޓްސް ކްލަބް ކުޅޭ މެޗަށް ފަހު ނިއުގެ ސްޕެއިން ފޯވާޑް އެޑްރިއަން ގަލާޑޯ އެ ކްލަބް ދޫކޮށްލުމަށް ނިންމައިފިއެވެ.
ނިއުގެ ޖެނެރަލް ސެކެޓްރީ ހުސެއިން ނިޔާޒް މޫސާ (ޓެޑް) ވިދާޅުވީ، ގަލާޑޯއާ އެކު ނިއު އިން އެއްބަސްވުން ހަދާފައި ވަނީ ޑިސެމްބަރު މަހުގެ ދެވަނަ ދުވަހުގެ ނިޔަލަށް ކަމަށާއި، އެހެން ނަމަވެސް އެއްބަސްވުން އާ ނުކުރަން ގަލާޑޯ ނިންމާފައިވާ ކަމަށެވެ.
ޓެޑް ވިދާޅުވީ، ގަލާޑޯ އެއްބަސްވުން އާނުކުރަން ނިންމީ އާއިލާއަށް ވަގުތު ދިނުމަށް އޭނާ ސްޕެއިންއަށް ބަދަލުވާން ޖެހޭތީ ކަމަށާއި، ގަލާޑޯގެ ބަދަލުގައި ބިދޭސީ އާ ފޯވާޑެއް އަންނަ އަހަރުގައި ފެނިގެންދާނެ ކަމަށެވެ.
ބޮޑު ބަޖެޓަކާ އެކު މި ސީޒަނަށް ނިކުތް ނިއު އިން އަންނަނީ އަންނަ ސީޒަނަށް މިހާރުއްސުރެ ތައްޔާރުވަމުންނެވެ. އެގޮތުން އެޓީމުން އަންނަނީ ޓީމުގައި ތިބި ބައެއް ކުޅުންތެރިންގެ އެއްބަސްވުން ވެސް އާކުރަމުންނެވެ.
ނިއު އިން ވަނީ އެޓީމަށް އަލަށް ގެނައި ސްޕެއިންގެ މިޑްފިލްޑަރު ކަންޑޭލާ އަދި ސްޕެއިންގެ ކޯޗު އޮސްކާ ބުރޯޒްގެ އެއްބަސްވުން އަންނަ އަހަރުގެ ނިޔަލަށް އާކޮށްފައެވެ.
އުމުރުން 30 އަހަރުގެ ގަލާޑޯ ވަނީ މި ސީޒަނުގައި ނިއު އަށް މޮޅު ކުޅުމެއް ދައްކައި، މުހިންމު ލަނޑުތަކެއް ކާމިޔާބުކޮށްދީފައެވެ. އޭނާ ވަނީ މި ސީޒަނުގައި ނިއު އަށް މިހާތަނަށް 19 ލަނޑު ޖަހާފައެވެ. އެހެން ނަމަވެސް އޭނާއާ އެއް އަދަދަކަށް ނިއުގެ އަލީ ފާސިރު (ސެންޓޭ) ވެސް ވަނީ ލަނޑު ޖަހާފައެވެ. އެގޮތުން ޓޮޕް ސްކޯރާގައި މި ވަގުތު އޮތީ ވެސް މި ދެ ކުޅުންތެރިންނެވެ.
