ރައީސް މުއިއްޒުގެ ސަރުކާރުގައި އަންހެން ބޭފުޅުން މަދުވުމުގެ ކަންބޮޑުވުން، އެމްޑީޕީގެ އަންހެނުންގެ ރޫހުން ފާޅުކޮށްފި
18 ނޮވެމްބަރު 2023 | ހޮނިހިރު 15:14ރައީސް ސާލިހުގެ ވެރިކަމުގައި ކެބިނެޓުގެ %33 ތަމްސީލުކުރައްވަމުން ގެންދެވީ އަންހެން ވަޒީރުން، އެއީ ކެބިނެޓުގައި ތިއްބެވި 18 ވަޒީރުންގެ ތެރެއިން 6
ރައީސް އޮފީހަށް ފަސް މިނިސްޓަރުން އައްޔަންކުރެއްވުން
ރައީސް ޑރ. މުހައްމަދު މުއިއްޒުގެ ކެބިނެޓުގައި އަންހެން ބޭފުޅުންގެ އަދަދު މަދުވުމަކީ ރާއްޖޭގައި އަންހެނުން ބާރުވެރި ކުރުވައި، ސިޔާސީ ދާއިރާގައި އަންހެނުންގެ ދައުރު ފުޅާކުރުމަށް ކުރަމުންދާ މަސައްކަތުގައި ލިބުނު ދެރައެއްކަމުގައި ބުނެ، އެމްޑީޕީގެ އަންހެނުންގެ ރޫހުގެ ފަރާތުން ކަންބޮޑުވުން ފާޅުކޮށްފިއެވެ.
އެކަމުގެ ކަންބޮޑުވުން ފާޅުކުރަމުން އެމްޑީޕީގެ އަންހެނުންގެ ރޫހުން ނެރުނު ބަޔާނެއްގައި ބުނީ، ރާއްޖޭގައި އަންހެނުން ބާރުވެރި ކުރުވައި، ސިޔާސީ ދާއިރާގައި އަންހެނުންގެ ދައުރު ފުޅާކުރުމަށް ކުރަމުންދާ މަސައްކަތުގައި، 2018އިން 2023ށް ރައީސް އިބްރާހީމް މުހައްމަދު ސާލިހު ކުރެއްވި ވެރިކަމުގައި ވަރަށް ބޮޑެތި ކުރިއެރުންތަކެއް ހޯއްދެވިކަމަށެވެ.
އެގޮތުން ރާއްޖޭގެ ތާރީޚުގައި ފުރަތަމަ ފަހަރަށް ކެބިނެޓްގެ %33 ތަމްސީލުކުރައްވަމުން ގެންދެވީ އަންހެން ވަޒީރުން ކަމަށާއި، އެއީ ކެބިނެޓުގައި ތިއްބެވި 18 ވަޒީރުންގެ ތެރެއިން 6 ބޭފުޅުންކަން އެ ބަޔާނުގައި ފާހަގަކުރިއެވެ.
އެހެންނަމަވެސް ރައީސް މުއިއްޒުގެ 22 ވަޒީރުން ތިއްބެވި ކެބިނެޓުގައި އެންމެ 3 އަންހެން ވަޒީރުން ތިއްބެވުމުން، އެއީ %13 ކަން ފާހަގަކުރަމުން އެ ބަޔާނުގައި ބުނީ، ހުވާކުރެއްވުމަށް ވަޒީރުން ތަރުތީބު ކުރައްވާފައި ތިއްބެވިއިރު 3 އަންހެން ބޭފުޅުންވެސް ތިއްބެވީ ފަހަތުބަރިއަށް ލާފައި ކަމަށެވެ. ނަމަވެސް، ވަޒީރުންގެ ސީނިއޯރިޓީއަށް ބެލިކަމުގައި ވިޔަސް އެތަނުން އެއް އަންހެން ވަޒީރަކީ ދެވަނަ ދައުރަކަށް ވަޒީރުކަމާ ހަވާލުވެވަޑައިގަތް، ކުރީބަރީގައި ތިއްބެވި ގިނަ ބޭފުޅުންނަށްވުރެން ސީނިއަރ ބޭފުޅެއްކަން އެ ބަޔާނުގައި ފާހަގަކުރިއެވެ.
އެ ބަޔާނުގައި ފާހަގަކުރި ސީނިއަރ ވަޒީރަކީ، ރައީސް ޔާމީންގެ ވެރިކަމުގައި އެޑިއުކޭޝަން މިނސްޓަރުކަމުގައި ހުންނެވި، އަދި ރައީސް މުއިއްޒުގެ ވެރިކަމުގައި ޖެންޑަރ މިނިސްޓަރަކަށް އައްޔަނުކުރެވުނު ޑރ. އާއިޝަތު ޝިހާމްއެވެ.
މީގެ އިތުުރުން ރައީސް އޮފީހުގެ އިސް މަގާމުތަކަށް އައްޔަން ކުރެއްވިއިރު އެންމެ އަންހެން ބޭފުޅަކު އައްޔަން ކުރެއްވިކަމުގެ ކަންބޮޑުވުން އެ ބަޔާނުގައު ފާޅުކުރަމުން ބުނީ، ވަޒީރުންގެ މަޖިލީހަކީ ގައުމެއްގެ ހައިސިއްޔަތުން ބަސްކިޔުމުގައި ސަރުކާރުގެ އެންމެ މަތީ ފަޑިކަމުގައި ވާހިނދު، ވަޒީރުންގެ މަޖިލީހުގައި އަންހެނުންގެ އަދަދު %13ށް ވެއްޓުމަކީ، އަންހެނުން ސިޔާސީ ދާއިރާގައި ބާރުވެރިކުރުމަށް މި ކުރެވޭ މަސައްކަތުގައި ވަރަށް ބޮޑަށް ފަހަތަށް އެޅުނު ފިޔަވަޅެއްކަމުގައި އެމްޑީޕީން ދެކޭކަމަށެވެ.
އަދި ހަމައެހެންމެ، ރައްޔިތުންގެ މަޖިލީހަށް %20 އަންހެނުން ގެނައުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު މަސައްކަތްކުރައްވާނެ ވާހަކަ ވިދާޅުވެފައިވާއިރު، އިތުރު އެއްވެސް ފަރާތެއްގެ ބައިވެރިވުމަކާނުލައި، ސަރުކާރުގެ ސިޔާސަތު ކަނޑައެޅުމުގެ އެންމެމަތީ ބާރުކަމުގައިވާ ކެބިނެޓަށް ސީދާ އެމަނިކުފާނަށް އަންހެން ބޭފުޅުން އައްޔަނުކުރެއްވެން އޮތް ފުރުސަތުގައި، އެކަން ނުކުރެއްވުމަަކީ އެމަނިކުފާނު ދެއްކެވި ވާހަކަފުޅުގައި އެއްވެސް އިޚްލާސްތެރިކަމެއް ނެތްކަމުގެ ހެތްކެއްކަމަށް ބުނެފައިވެއެވެ.
އެހެންކަމުން އެކަމުން ފެންނަނީ ރައީސް މުއިއްޒު، ޖުމްހޫރީ މައިދާނުގައި ދެއްވި ތަގުރީރާ ދިމާނުވާކަން ކަމަށް އެ ބަޔާނުގައި ބުންޏެވެ.
"ވަޒީރުންގެ މަޖިލިސް އަތުރާލެވޭއިރު އަންހެން ވަޒީރުން ފަހަތަށް ޖެއްސުމަކީ، އޭން ވަރަށް ގޯސް މާނައެއް ދޭހަވާ ކަމެއް ކަމުގައިވެސް ދެކެމެވެ. އެއީ އަންހެނުންނަކީ އަބަދުވެސް ފަހަތުގައި ތިބެންޖެހޭ ބައެއްކަމަށް ނުސީދާގޮތެއްގައި ދައްކުވައި ދިނުމެވެ. އަދި މި އަމަލާ، ރައީސުލްޖުމްހޫރިއްޔާ ޑރ. މުހައްމަދު މުއިއްޒު އިއްޔެ ޖުމްހޫރީ މައިދާނުގައި ދެއްކެވި ވާހަކަފުޅާ އެއްގޮތަކަށްވެސް ދިމާނުވާކަން ފާހަގަކުރަމެވެ."
އެހެންކަމުން އަންހެނުން ފަހަތައް ޖައްސަވައި، އަންހެނުންނަށް ނިކަމެތިކަން ލިބޭގޮތަށް ކަންކަން އިންތިޒާމު ކުރެއްވުމަކީ އެ ޕާޓީގެ އަންހެނުންގެ ރޫހުން އެއްވެސް ހާލަތެއްގައި ބަލައިގަންނާނެ ކަމެއްނޫންކަމުގައި އެ ބަޔާނުގައި ބުނެފައިވެއެވެ.
