ބަޖެޓްގެ ޕްރައިމަރީ ޑެފިސިޓް ކުޑަކުރެވޭނެ ގޮތްތަކާއި، އާމްދަނީ ރިކަރެންޓް ޚަރަދު ފޫބެއްދޭނެ ގޮތްތައް ހޯދަންޖެހޭ
ފަލަސުރުޚީ ޕްރޮގްރާމްގައި ފިނޭންސް މިނިސްޓްރީގެ ޗީފް ފައިނޭންޝަލް ބަޖެޓް އެގްޒެކެޓިވް، އަހުމަދު ސަރުވަޝް އާދަމް ވާހަކަފުޅުދައްކަވަނީ
2024 ވަނަ އަހަރުގެ ބަޖެޓަކީ ޚަރަދުގެ ސިޔާސަތުތައް ކުޑަ ކުރުމަށް ވަރަށް ބޮޑަށް ސަމާލުކަން ދީފައިވާ ބަޖެޓެއް ކަމަށް ފިނޭންސް މިނިސްޓްރީން ބުނެފިއެވެ.
ރާއްޖެޓީވީގެ ފަލަސުރުޚީ ޕްރޮގްރާމްގައި ފިނޭންސް މިނިސްޓްރީގެ ޗީފް ފައިނޭންޝަލް ބަޖެޓް އެގްޒެކެޓިވް، އަހުމަދު ސަރުވަޝް އާދަމް ވިދާޅުވީ 2024 ވަނަ އަހަރުގެ ބަޖެޓް ތައްޔާރުކުރުމުގައި ދަރަނީގެ ދެމެހެއްޓެނިވިކަން ކަށަވަރުކުރުމަށް ވަރަށް ބޮޑަށް ބަލާފައިވާ ކަމަށެވެ. އެއީ 2023 ވަނަ އަހަރުގެ ބަޖެޓުގައި ވެސް ވަރަށް ބޮޑަށް ސަމާލުކަން ދީފައިވާ ކަމެއް ކަމަށާއި، އެކަމަށްޓަކައި ވަރަށް ބޮޑެތި ފިޒިކަލް ރިފޯމްތަކެއް އެކަށައަޅާފައިވާ ކަމަށް އޭނާ ވިދާޅުވިއެވެ.
މީގެ އިތުރުން ސަރުވަޝް ވިދާޅުވީ ބަޖެޓު އެއް އަހަރުން އަނެއް އަހަރަށް ބޮޑުވާނެ ކަމަށާއި، ބަޖެޓް ބޮޑުވީ ކަމުގައި ވީނަމަވެސް ބަޖެޓްގައި އެކި ސިޔާސަތުތަކަށް ބަދަލު ގެނައުމަށާއި، ޚާއްސަކޮށް ޚަރަދުގެ ސިޔާސަތުތައް ކުޑަ ކުރުމަށް ވަރަށް ބޮޑަށް ސަމާލުކަން ދީފައިވާ ކަމަށެވެ. އެގޮތުން އެންމެ ބޮޑަށް ހިނގާނެ އެއް ޚަރަދަކީ މުވައްޒަފުންނަށް ހިނގާ ޚަރަދާއި، ތަރައްޤީއަށް ހިންގާ މަޝްރޫއުތަކަށް ހިނގާ ޚަރަދު ކަމަށް ސަރުވަޝް ވިދާޅުވިއެވެ. އޭގެ ތެރޭގައި ޕީއެސްއައިޕީގެ އެކިއެކި މަޝްރޫއުތައް ހިމެނޭ ކަމަށް އޭނާ ވިދާޅުވިއެވެ.
ކޮވިޑް-19އަށް އިޝާރާތް ކުރައްވައި ސަރުވަޝް ވިދާޅުވީ އިގްތިސާދު އަޑިއަޅާލައި، ވަރަށް ބޮޑު ސަޕޯޓެއް ދޭން ޖެހުނު ކަމަށެވެ. ދަރަނީގެ ދެމެހެއްޓެނިވިކަން ކަށަވަރުކުރުމަށް ސިޔާސަތުތައް ކަނޑައަޅާފައިވާއިރު، ދަރަނި ވަކި މިންވަރަކަށް ތިރިކުރަން ބޭނުންވާ ކަމަށާއި، އެކަމަށް ބާރުދޭ ސިޔާސަތައް ބަޖެޓްގެ ތެރޭގައި ކަނޑައަޅަންޖެހޭ ކަމަށް އޭނާ ވިދާޅުވިއެވެ. އަދި ވިދާޅުވީ ބަޖެޓްގެ ޕްރައިމަރީ ޑެފިސިޓް ކުޑަކުރެވޭނެ ގޮތްތަކާއި، އާމްދަނީ ރިކަރެންޓް ހަރަދު ފޫބެއްދޭނެ ގޮތްތައް ހޯދަންޖެހޭ ކަމަށެވެ.
2024 ވަނަ އަހަރަށް ލަފާކުރާ ބަޖެޓަކީ 49.5 ބިލިއަން ރުފިޔާ އެވެ.
މީގެ ތެރެއިން ޚަރަދުގެ ގޮތުގައި ހިނގާނީ 47.3 ބިލިއަން ރުފިޔާއެވެ. އެއީ ރިކަރަންޓް ޚަރަދުގެ ގޮތުގައި 34.8 ބިލިއަން ރުފިޔާ، އަދި ކެޕިޓަލް ޚަރަދުގެ ގޮތުގައި 12.5 ބިލިއަން ރުފިޔާއެވެ.
މި ޚަރަދުތަކުގެ އިތުރުން ބަޖެޓުގައި މައިގަނޑު ގޮތެއްގައި ހިމެނެނީ ދައުލަތުގެ ދަރަނި އަދާކުރުމަށް ބޭނުންވާ 2.2 ބިލިއަން ރުފިޔާއެވެ.
2024 ވަނަ އަހަރުގެ ބަޖެޓުގައި މުވައްޒަފުންގެ މުސާރަ އާއި ޕެންޝަނަށް 14.0 ބިލިއަން ރުފިޔާ ކަނޑައަޅާފައިވެއެވެ. ތަކެއްޗާއި ޚިދުމަތް ހޯދުމާއި، ދަތުރުފަތުރާއި މަރާމާތު ފަދަ ރިކަރަންޓް ޚަރަދުތަކަށް 6.1 ބިލިއަން ރުފިޔާ، އަދި ސަބްސިޑީ އާއި އެހީ ދިނުމަށް 9.4 ބިލިއަން ރުފިޔާ ހިމަނާފައިވެއެވެ. އަދި ލޯނުގެ ޚިދުމަތުގެ ޚަރަދަށް 5.2 ބިލިއަން ރުފިޔާ ޚަރަދުވާނެކަމަށް ބަޖެޓުކޮށްފައިވެއެވެ.
ކެޕިޓަލް ޚަރަދުތަކަށް ބަލާއިރު، އެންމެ ބޮޑަށް ޚަރަދުކުރެވޭނީ ޕަބްލިކް ސެކްޓަރ އިންވެސްޓްމަންޓް ޕްރޮގްރާމަށެވެ. އެއީ ތަރައްޤީގެ މަޝްރޫޢުތަކަށް ހިނގާނެ 8.7 ބިލިއަން ރުފިޔާއެވެ.
