"ކިތަންމެ ހިތްދަތިވިޔަސް، ކިތަންމެ އަނިޔާއެއް ލިބުނަސް ހިނިތުންވާނަން"

ދިރިއުޅުމަކީ އިމްތިޙާނެކެވެ. ދުނިޔަވީ ޙަޔާތުގައި ތިބާއަކީ ތާއަބަދުމެ ނަޞީބު އަތުގައި ހިފައިގެން ހުންނަ މީހަކަށް ވިޔަސް، ނުވަތަ، ހާސްކަމާއި ނާމާން ކަމުގެ ތެރޭގައި ދުވަސްތައް ގުނަން ޖެހިފައި ވާ މީހަކަށް ވިޔަސް، ދިރިއުޅުމަކީ އިމްތިޙާނެކެވެ. ދިރިއުޅުމުގެ މައިދާނުގައި ކުރިމަތިލާން ޖެހޭ ގޮންޖެހުންތަކާއި ތަކުލީފުތައް މާ ގިނަ ވެއްޖެ ނަމަ، މާޔޫސްކަމާއި ހިތްދަތިކަމުގައި ދުވަސްތައް ގުނަން ނަފުސު މަޖުބޫރު ކުރުވައެވެ. އެކަން އެހެން ވިޔަ ނުދިނުމަށްޓަކައި ބޭނުން ވަނީ ކުޑަކުޑަ ހިތްވަރެކެވެ. ބިރުވެރި ހުވަފެނެއްގައި ދުށުމަށްވެސް މީހަކު ނޭދޭނެ ފަދަ މަންޒަރުތަކެއް، ހަމަ ލޮލަށް ފެނި، ތަޖުރިބާ ކުރަމުންދާ ޣައްޒާއިން ފެނިގެންދަނީ މި ދެންނެވި ހިތްވަރު ނެރެ، ކޮންމެ ޙާލެއްގައިވެސް ދިރިއުޅުމައިގެން ކުރިއަށް ދިޔުމަށް ގަދަ އަޅާ މަސައްކަތް ކުރާ މަންޒަރެވެ.

ޔަހޫދީ އިޒްރޭލުން ޣައްޒާ ހަފުސް ކުރުމުގެ ޤަތުލުޢާންމު ފެށިފަހުން މަސްދުވަހަށް ވުރެ ދިގުލައި ގޮސްފައި ވާ އިރު، އެ ޢުދުވާންތަކުގެ ސަބަބުން އެންމެ ބޮޑު ނޭދެވޭ އަސަރެއް ފޯރާފައި ވަނީ، ކުށެއް ނެތް، މައުސޫމު ކުޑަ ކުދިންތަކަކަށެވެ. މައިންބަފައިންނާއި، ގާތް ތިމާގެ މީހުންގެ ލޯތްބާއި އަޅާލުން އޭގެ އެންމެ އިންތިހާއަށް ބޭނުން ވި ދުވަހު، މުޅި ދުނިޔެވެސް އެ ކުދިން ބާކީ ކޮށްލި ފަދައެވެ. އެފަދަ ހިތްދަތި ޙާލެއްގައި ދުވަސްތައް ގުނަމުންދާ ޣައްޒާގެ ކުޑަ ކުދިންގެ ހިތްތަކަށް ކުޑަ ނަމަވެސް އުފާވެރިކަމެއް ގެނެސްދިނުމުގެ މަތިވެރި ޢަޒުމުގައި ތެދުވި އެކަކީ ޢަލާ މިޤްދާދްއެވެ.

ޣައްޒާގެ މަރުކަޒީ ހޮސްޕިޓަލު، އަދި ޣައްޒާގައި ހުންނަ އެންމެ ބޮޑު ހޮސްޕިޓަލު ކަމަށް ވާ އަލް-ޝިފާ ހޮސްޕިޓަލުގެ ބޭރުގައި، މިޤްދާދް ވަނީ ޖޯކަރެއް ނުވަތަ ކްލައުންއެއްގެ ގޮތަށް ހެދުން އަޅައިގެން ހުރެ، ކުޑަކުދިންނަށް ޚާއްޞަ ޝޯވއެއް ހުށަހަޅައިދީފައެވެ. ޞިއްޙީ ޚިދުމަތްތެރިންނާއި ބަލި މީހުންގެ އިތުރުން، އަލް-ޝިފާ ހޮސްޕިޓަލަކީ، އިޒްރޭލުގެ ޢުދުވާންތަކުގައި ގެދޮރު ގެއްލުނު އެތައް ސަތޭކަ ހާސް ޢާއިލާއަކުން ވަގުތީ ހިޔާވަހިކަން ހޯދަމުން ދިޔަ މައިދާނެކެވެ. ނަމަވެސް އިޒްރޭލުގެ ޙަމަލާތައް ސިލްސިލާ ގޮތެއްގައި އަލް-ޝިފާ ހޮސްޕިޓަލަށް ޢަމާޒު ކުރަން ފެށުމާއެކު، އެތައް ބަޔަކު ވަނީ އެ ސަރަޙައްދު ދޫކޮށް، ޣައްޒާގެ ދެކުނަށް ބަދަލުވާން ފަށާފައެވެ. މިޤްދާދްވެސް އެ މީހުންގެ ތެރޭގައި ހިމެނެއެވެ.

ކުޑަ ނަމަވެސް ސަލާމަތެއް ލިބޭނެ ކަމުގެ އުންމީދުގައި އުތުރު ޣައްޒާއިން ދެކުނަށް މިޤްދާދް ކުރި ދަތުރަކީ ވަކި ފަސޭހަ ދަތުރެއް ނޫނެވެ. އައް-ޝިފާ ހޮސްޕިޓަލު ސަރަޙައްދުން ނުކުމެގެން، މިޞްރާ ޣައްޒާ ހިއްސާ ކުރާ ރަފަޙަ ބޯޑަރާ ދިމާއަށް މިޤްދާދް ދަތުރު ކުރަމުން ދިޔައީ ފައިމަގުގައެވެ. އޭނާގެ މާބަނޑު އަނބިމީހާއާވެސް އެކުގައެވެ. ރައްކާތެރިކަމާއެކު އެ ދަރިފުޅު މި ދުނިޔެއަށް އުފަން ކުރެވިދާނެ ކަމުގެ ފޮނި އުންމީދުގައެވެ.

ކޮންމެ ޙާލެއްގައި އުޅެން ޖެހުނަސް، ޣައްޒާގެ ރަށްވެހިންނަކީ ސާބިތު ހިތެއްގެ ވެރި ބައެއްކަން މިޤްދާދް ފަދަ ރަށްވެހިންނާ ވާހަކަދައްކާލުމުން ކިތަންމެ ރަނގަޅަކަށްވެސް ސާފުވެއެވެ.

ހޮސްޕިޓަލުތަކަކީ އެންމެ ވަރުގަދަ ހަނގުރާމަތަކުގައިވެސް ސަލާމަތާއި ރައްކާތެރިކަން ދީފައި އޮންނަ ތަނަކަށް ވީ ނަމަވެސް، ނަސްލު ދޮވެލުމަށް ޔަހޫދީން ހިންގަމުންދާ ޤަތުލުޢާންމުގައި، ޣައްޒާގެ ހޮސްޕިޓަލުތަކަށްވެސް ބެލުމެއް ނެތެވެ. ޣައްޒާގައި ހިންގާ އިންޑޮނީސިއަން ހޮސްޕިޓަލު ސުންނާފަތިކޮށްފައި ވާ އިރު، ނާޞިރު ރަންތިއްސީ ޕީޑިއަޓްރިކް ކެންސަރ ހޮސްޕިޓަލުގައި ވަނީ ހުޅުޖަހާފައެވެ.