2026 ވަނަ އަހަރު ދަރަނި ދެއްކުމަށް 1 ބިލިއަން އެމެރިކާ ޑޮލަރު ހޭދަކުރަންޖެހޭ

2026 ވަނަ އަހަރު ދަރަނި ދެއްކުމަށް 1 ބިލިއަން އެމެރިކާ ޑޮލަރު ހޭދަކުރަންޖެހޭ ކަމަށް ބަޖެޓުގައި ބުނެފިއެވެ.

އަންނަ އަހަރަށް ލަފާކޮށް ރައްޔިތުންގެ މަޖިލީހަށް ހުށަހަޅާފައިވާ 2024 ވަނަ އަހަރުގެ ދައުލަތުގެ ބަޖެޓުގައި ބުނެފައިވަނީ 2026 ވަނަ އަހަރަކީ ބޮޑު އަދަދަކުން ރާއްޖެއިން ދަރަނި އަދާކުރުމަށް ހޭދަކުރަން ޖެހޭނެ އަހަރެއް ކަމަށެވެ.

އެގޮތުން، އެ އަހަރުގެ ދަރަނީ ޚިދުމަތަށް، ދަރަނީގެ އިންޓްރެސްޓް އަދި ޕްރިންސިޕަލް އަދާކުރުމަށް، 1 ބިލިއަން ޔޫއެސް ޑޮލަރު ހޭދަކުރަން ޖެހެއެވެ. މީގެ ތެރޭގައި 2021 ވަނަ އަހަރު ވިއްކާފައިވާ ސޮވްރިން ސުކޫކްގެ 500 މިލިއަން ޑޮލަރު ހިމެނެއެވެ. 2026 އަށް ތައްޔާރުވުމުގެ ގޮތުން މިނިސްޓްރީ އޮފް ފިނޭންސް އިން މަސައްކަތް ފަށާފައިވާއިރު އެގޮތުން، ދައުލަތުގެ ދަރަނީގެ ހިރާސްތައް ކުޑަކޮށް، ދަރަނި އަނބުރާ ދެއްކުމުގެ ޤާބިލުކަން އިތުރުކުރުމަށް ދަނީ މަސައްކަތް ކުރަމުންނެވެ.

ބަޖެޓުގައި ބުނެފައިވަނީ ދައުލަތުގެ މާލީ ހާލަތު ރަނގަޅުކޮށް، ރާއްޖޭގެ ކްރެޑިޓް ރޭޓިންގ މަތިކުރުމަށް މަސައްކަތްކުރަމުންދާ ކަމަށެވެ. އަދި ރޭވިފައިވާގޮތަށް ކަންކަން ކުރިއަށް ގެންގޮސްފިނަމަ، 2026ގައި އަދާކުރަން ޖެހޭ ދަރަނި އަދާކުރުމަށް ނުވަތަ ރީފައިނޭންސްކުރުމަށް ނުވަތަ އެނޫންވެސް ސްޓްރެޓެޖީއެއްގައި ކުރިއަށް ދިއުމުގެ ޤާބިލުކަން ދައުލަތުގައި އޭރު ހުންނާނެ ކަމަށެވެ. އެގޮތުން މި ޤާބިލުކަން އިތުރުކުރުމަށް، ސޮވްރިން ޑިވެލޮޕްމަންޓް ފަންޑުގައި ހުންނަ ފައިސާ އިތުރުކުރުމުގެ މަސައްކަތް ވެސް ހިމެނޭ ކަމަށް ބަޖެޓުގައި ބުނެފައިވެއެވެ.

މީގެ އިތުރުން 2026 އަންނަންވާއިރު، ސޮވްރިން ޑިވެލޮޕްމަންޓް ފަންޑުގެ ސައިޒު 9 ބިލިއަން ރުފިޔާ ފަހަނައަޅައިދާނެ ކަމަށް ވެސް ވަނީ ބުނެފައެވެ.

އަދި ޕްލޭންކުރެވިފައިވަނީ އެ ފަންޑުގައި ހުންނަ ޑޮލަރު މެދުރާސްތާގައި އިތުރުކޮށް، އެ ފަންޑުގައި 250 މިލިއަން ޑޮލަރު ބެހެއްޓުމަށް ހަމަޖެހިފައިވާ ކަމަށް ބަޖެޓުގައި ބުނެފައިވެއެވެ. މި ވަގުތު ސޮވްރިން ޑިވެލޮޕްމަންޓް ފަންޑުގެ ޖުމުލަ އަދަދަކީ 7.5 ބިލިއަން ރުފިޔާއެވެ. މީގެ ތެރޭގައި 124.7 މިލިއަން ޑޮލަރު ހިމެނެއެވެ.