އިޓާލިއަން ލީގުގެ ނަޕޯލީ އަށް ކުޅެމުން އަންނަ ވިކްޓަ އޮސީމެން އަށް ސައުދީ ޕްރޯ ލީގުގެ އަލް ހިލާލުން ބޮޑު ހުށަހެޅުމެއް ލިބުނު ކަމަށް އޭނާ ބުނެފި އެވެ.
މީޑިއާ އަކަށް ދިން އިންޓަވިޔުއެއްގައި އޮސީމެން ބުނީ، އެއީ ވަރަށް އަންތަރީސްވާން ޖެހުނު ކަމެއް ކަމަށެވެ. އެގޮތުން އަލް ހިލާލްގެ ހުށަހެޅުމަށް އޭނާ ނޫނެކޭ ބުނާ ކޮންމެ ފަހަރަކު، އެ ކުލަބުން ދިޔައީ ބޮޑު މުސާރައެއް ހުށަހަޅަމުން ކަމަަށް އޭނާ ބުންޏެވެ. އެއީ ވަރަށް ބޮޑު ހައިރާންކަމެއް ލިބުނު ކަމެެއްކަން ފާހަގަކޮށް އޮސީމެން ބުނީ، އެއީ އޭނާގެ މުޅި ދިރިއުޅުން ވެސް ބަދަލު ކޮށްލާނެ ކަމެއް ކަމަށެވެ. އެކަމުގައި އަލް ހިލާލުން އޮތީ ގޮތް ދޫކުރާ ގޮތަކަށް ނޫން ކަމަށް ވެސް އޭނާ ބުންޏެވެ.
މީގެ އިތުރުން އޮސީމެން ބުނީ، އެ ހުށަހެޅުމާއެކު އޭނާ ނަޕޯލީގެ އިސްވެރިންނާ ވާހަކަ ދައްކައި، މަޝްވަރާ ކޮށްފައިވާނެ ކަމަށެވެ. ޚާއްސަކޮށް ނަޕޯލީން ބޭނުންވެފައި އޮތީ އޭނާ އެކުލަބުގައި ބަހައްޓަންކަން ފާހަގަކޮށް އޮސީމެން ބުނީ، ހުށަހެޅުން ޤަބޫލު ނުކުރީ ނަޕޯލީގައި ހުންނަން އޭނާ ބޭނުންވާތީ ކަމަށެވެ.
ލީލް ދޫކޮށް އޮސީމެން ނަޕޯލީ އަށް ބަދަލުވީ 2020 ވަނަ އަހަރު އެވެ. އޭގެ ފަހުން އޭނާ އަންނަނީ އެކުލަބުގައި މޮޅަށް ކުޅެމުންނެވެ. މިހާތަނަށް ނަޕޯލީ އަށް ކުޅެދިން 111 މެޗުން އޭނާ ވަނީ 65 ލަނޑު ޖަހައިފަ އެވެ. އެ ކުލަބާއެކު އޭނާ ވަނީ މިދިޔަ ސީޒަންގެ އިޓާލިއަން ލީގު ކާމިޔާބުކޮށްފަ އެވެ. އެއީ 36 އަހަރަށް ފަހު ނަޕޯލީ އަށް ލީގު ކާމިޔާބު ކުރެވުނު ފުރަތަމަ ފަހަރެވެ.
