ޔުނައިޓެޑުގެ ހުށަހެޅުމަކަށް މަޑުކުރަން ނޭމާ ގާތު ރޮނާލްޑޯ އެދިއްޖެ

ފްރާންސްގެ ޕެރިސް ސެއިންޓް ޖާމަން (ޕީއެސްޖީ) އަށް ނުދިއުމަށާއި، ބާސާ ދޫކޮށްލަން ބޭނުންވާނަމަ، އިނގިރޭސި ކްލަބް މެންޗެސްޓާ ޔުނައިޓެޑުގެ ހުށަހެޅުމަކަށް މަޑުކުރުމަށް ނެމާ ގާތު، ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯ އެދިއްޖެއެވެ.

މީޑިއާ ރިޕޯޓަތަށް ބުނާގޮތުން ރޮނާލްޑޯ ނެމާ އާއި ވާހަކަ ދައްކާފައިވަނީ ވަޓްސްއެޕް މެދުވެރިކޮށެވެ. އެގޮތުން ރޮނާލްޑޯ ނޭމާ ގާތު ބުނެފައިވަނީ، ބާސާ ދޫކޮށްލަން ބޭނުންވާ ނަމަ އިންގިރޭސި ކްލަބް މެންޗެސްޓާ ޔުނައިޓެޑުގެ ހުށަހެޅުމަކަށް މަޑުކުރަން ކަމަށާއި، ޕީއެސްޖީއަށް ނުދިއުމަށެވެ. އެގޮތުން ސްޕެނިޝް ލީގާއި އިނގިރޭސި ޕްރެމިއާ ލީގަށް އަޅާ ބަލާއިރު ފްރާންސް ލީގަކީ އެހާ މަގްބޫލް ލީގެއް ނޫން ކަމަށްވެސް ރޮނާލްޑޯ ވަނީ ބުނެފައެވެ. މީގެ އިތުރުން، ނޭމާ ޕީއެސްޖީއަށް ބަދަލުވުމަކީ ކެރިއަރުގައި ކުރިއަށް އަޅާ ފިޔަވަޅެއް ނޫން ކަމަށާއި، އެއީ ފަހަތަށް އެޅޭ ފިޔަވަޅެއް ކަމަށްވެސް ރޮނާލްޑޯ ވަނީ ބުނަފައެވެ.

މީޑިއާ ރިޕޯޓަތަށް ބުނާގޮތުން ޕީއެސްޖީއިން ވަނީ ރެކޯޑް އަގަކަށް ނޭމާ އާއި އެކު އެއްބަސްވުމަކަށް އާދެވިފައެވެ. އަދި ނޭމާ އާއި އޭނާގެ ބައްޕަ އާއި އެކު ޕީއެސްޖީއިން މަޝްވަރާ ކުރާ ކަމަށާއި، ޕީއެސްޖީއިން މަސައްކަތް ކުރަނީ ނޭމާ އާއި އެކު މަދުވެގެން 4 އަހަރު ދުވަހުގެ އެއްބަސްވުމަކަށް އައުމަށް ކަމަށްވެސް ރިޕޯޓްތަށް ބުނެއެވެ. މީގެ އިތުރުންވެސް ނޭމާ ބާސާ އާއި އެކު ހަދާފައިވާ އެއްބަސްވުން ރޫޅާލުމަށް ބާސާއަށް ދައްކަންޖެހޭ 222 މިލިއަން ޔޫރޯ ދައްކަން ޕީއެސްޖީއިން ތައްޔާރަށް އޮތް ކަމަށްވެސް މީޑިއާ ރިޕޯޓްތަށް ބުނެއެވެ.