ގްރޫޕް ސްޓޭޖުން ކެޓިޔަސް ޕާކިސްތާނަށް 280000 ޑޮލަރު
އައިސީސީން ހަމަޖައްސާފައިވާ ގޮތުން މޮޅުވާ ކޮންމެ މެޗަކަށް 40000 ޑޮލަރު ލިބޭނެ
ޕާކިސްތާން ކުޅުންތެރިން: ލަންކާ ބަލިކުރީ 345 ލަނޑުން
ކްރިކެޓް ވޯލްޑްކަޕުގެ ސެމީ ފައިނަލަށް ނުގޮސް ކެޓި ނަމަވެސް، ޕާކިސްތާނުގެ ގައުމީ ޓީމަށް 280000 ޑޮލަރު ދޭން އައިސީސން ނިންމައިފި އެވެ.
މުބާރާތުގައި ޕާކިސްތާން ކުޅުނު ނުވަ މެޗުގެ ތެރެއިން މޮޅުވީ ހަތަރު މެޗުންނެވެ. އައިސީސީން ހަމަޖައްސާފައިވާ ގޮތުން މޮޅުވާ ކޮންމެ މެޗަކަށް 40000 ޑޮލަރު ލިބޭނެ އެވެ. މިހެންވެ ހަތަރު މެޗުން 160000 ޑޮލަރު ލިބޭއިރު، މުބާރާތުގެ ގްރޫޕް ފިޔަވަހީގައި ކުޅެފައިވާތީވެ 100000 ޑޮލަރު ލިބެ އެވެ.
މި ފައިސާ ބަހާނެ ގޮތެއް ޕާކިސްތާނުގެ ކްރިކެޓް ބޯޑުން އަދި ނުނިންމަ އެވެ. ނަމަވެސް އެ ގައުމުގެ ނޫސްތަކުން ބުނީ މުސާރަ ނުދެވި ދިގު މުއްދަތެއްގައި ކުޅުންތެރިން ތިބެން ޖެހުމުން މި ފައިސާގެ ބޮޑު ބައެއް ކުޅުންތެރިންނަށް ދޭން ކްރިކެޓް ބޯޑުން ނިންމާފައިވާ ކަމަށެވެ.
އައިސީސީން ކްރިކެޓް ވޯލްޑްކަޕުގެ އިނާމަކަށް ހަމަޖައްސާފައިވަނީ 10 މިލިއަން ޑޮލަރެވެ. އޭގެ ތެރޭގައި ސެމީ ފައިނަލުން ބަލިވާ ކޮންމެ ޓީމަކަށް އަށް ލައްކަ ޑޮލަރު ވެސް ދޭނެ އެވެ. ޗެމްޕިއަން ޓީމަށް ދޭން ނިންމާފައިވަނީ ހަތަރު މިލިއަން ޑޮލަރެވެ. ފައިނަލުން ބަލިވާ ޓީމަށް 2 މިލިއަން ޑޮލަރެވެ.
އިންޑިޔާގައި މިހާރު ކުރިއަށްދާ ކްރިކެޓް ވޯލްޑްކަޕުގައި ވާދަކުރީ 10 ގައުމެވެ. ސެމީ ފައިނަލުގެ ފުރަތަމަ މެޗުގައި ވާދަކުރާނީ އިންޑިޔާ އާއި ނިއުޒީލޭންޑެވެ. ދެ ވަނަ މެޗުގައި އޮސްޓްރޭލިޔާ އާއި ދެކުނު އެފްރިކާ އެވެ.
