ޕާކިސްތާން ކޯޗަށް މައްސަލައަކީ އިންޑިޔާގެ ދަނޑުތައް!
8 ނޮވެމްބަރު 2023 | ބުދަ 04:39އިންޑިޔާގައި ޕާކިސްތާން ކުޅެމުންދަނީ 12 އަހަރު ފަހުން
ޕާކިސްތާނުގެ ކޯޗު (ވ) އާއި ކެޕްޓަން ބާބަރު އަޒަމް
އިންޑިޔާގައި މިހާރު ކުރިއަށްދާ ކްރިކެޓް ވޯލްޑްކަޕުގައި ޕާކިސްތާނަށް ގިނަ މެޗުތަކަކުން މޮޅުނުވެވުނު މައިގަނޑު ސަބަބަކީ އިންޑިޔާގެ ދަނޑުތަކަށް އައުވުން ކަމަށް ކޯޗު މިކޭ އަރްތޫރު ބުނެފި އެވެ.
ސެމީ ފައިނަލަށް ދިއުމަށް ކޮންމެހެން މޮޅުވާން ޖެހުނު ނިއުޒީލޭންޑްގެ މެޗުގެ ކުރިން ވާހަކަ ދައްކަމުން ދެކުނު އެފްރިކާގެ ކުރީގެ ކުޅުންތެރިޔާ ބުނީ އިންޑިޔާގެ ކޮންމެ ދަނޑަކީ ވެސް ޕާކިސްތާނުގެ ކުޅުންތެރިންނަށް އައުތަނެއް ކަމަށެވެ.
އޭނާ ބުނީ ޕާކިސްތާނުގެ ކުޅުންތެރިންނަށް ދަނޑުތަކުގެ ހާލަތު ނޭނގޭތީވެ، ކޮންމެ މެޗެއްގައި ވެސް ފުރަތަމަ ބައިގައި ދަނޑުގެ ހާލަތު ދެނެގަންނަން ވަގުތުނަގާ ކަމަށެވެ. އަދި ބެޓްސްމަނުންނަށް ރަނގަޅަށް ނުކުޅެވެނީ ވެސް މި ސަބަބާ ހެދި ކަމަށެވެ.
އޭނާ ފާހަގަކުރި ދެ ވަނަ ކަމަކީ މުބާރާތުގައި ވާދަކުރާ އެހެން ގައުމުތަކުގެ ކުޅުންތެރިން އިންޑިޔާގެ ދަނޑުތަކަށް ފަރިތަކަމެވެ.
އިންޑިޔާ އާއި ޕާކިސްތާނުގެ ސިޔާސީ ކޯޅުމުގެ ސަބަބުން މި ދެ ގައުމު އެއް ބަޔަކު އަނެއް ބަޔަކަށް ޒިޔާރަތްކޮށްގެން އެންމެ ފަހުން މެޗުތަކެއް ކުޅުނީ 2012ގަ އެވެ. އަދި މި ފަހަރުގެ ވޯލްޑްކަޕަށް އިންޑިޔާއަށް ދާން ޕާކިސްތާނުން ނިންމީ ވެސް ފަހު ވަގުތު އެވެ. މުބާރާތުގައި މިހާތަނަށް ޕާކިސްތާން ކުޅުނު އަށް މެޗުގެ ތެރެއިން ހަތަރު މެޗުން ބަލިވެ، ހަތަރު މެޗަކުން ވަނީ މޮޅުވެފަ އެވެ. ސެމީ ފައިނަލަށް ދެވޭނީ ކުރިއަށް އޮތް އިންގްލޭންޑް މެޗުން މޮޅުވެ، ނިއުޒީލޭންޑް ކުޅޭ މެޗުން އެ ގައުމު ބަލިވެގެންނެވެ.
