މެޗު ލަސްކުރުމުން ޕާކިސްތާން ޖޫރިމަނާކޮށްފި

ކްރިކެޓް ވޯލްޑްކަޕުގައި އިއްޔެ ނިއުޒީލޭންޑާ ދެކޮޅަށް ކުޅެ ޕާކިސްތާން މޮޅުވި މެޗުގެ ކުޅުން ލަސްކުރި ކަމަށް ބަލައި ޕާކިސްތާން ޖޫރިމަނާކޮށްފި އެވެ.

އިންޓަނޭޝަނަލް ކްރިކެޓް ކައުންސިލުން ޕާކިސްތާން ޖޫރިމަނާކުރީ މެޗު ފީގެ 10 ޕަސެންޓުންނެވެ. އެ ޖަމާއަތުން ތުހުމަތު ކުރާ ގޮތުގައި ޕާކިސްތާނުން މެޗުގެ ފުރަތަމަ އިނިންގްސްގައި އުކުން ލަސްކުރީ ވާރޭވެހޭނެ ކަމަށް ބެލެވިފައި އޮތުމުން އޭގެ އެޑްވާންޓޭޖް ނެގުމަށެވެ.

މި މެޗުން ޕާކިސްތާން މޮޅުވީ ވެސް ވާރޭގެ ސަބަބުން ދެ ފަހަރަށް މެޗު މެދުކަނޑާލަން ޖެހި އިތުރަށް ކުރިއަށް ނުގެންދެވުމުންނެވެ. ނިއުޒީލޭންޑްގެ އިނިންގްސްގައި 50 އޯވަރު ތެރޭގައި 401 ލަނޑު ހެދި ނަމަވެސް ޕާކިސްތާން މޮޅުވީ ވާރޭވެހެން ފެށިއިރު ކުޅެވިފައިވާ 21 އޯވަރުގެ ތެރޭގައި ދެ ޓީމުކުރެ ގިނަ ލަނޑު ހެދި ޓީމެއް ބެލިއިރު ޕާކިސްތާނަށް ކުރި ލިބުމުންނެވެ. އެއީ 21 ލަނޑުންނެވެ.

ނިއުޒީލޭންޑްގެ ކެޕްޓަން ވިލިއަމްސަން އިއްޔެގެ މެޗަށްފަހު ވާހަކަ ދައްކަމުން ބުނީ ޕާކިސްތާނުން މެޗުގައި ބެޓްކުރަން ފެށީ ވެސް ވާރޭވެހޭނެ ކަމަށް ލަފާކުރެވިފައި އޮތުމުން އެކަމަށް ތައްޔާރުވެގެން ކަމަށެވެ.

މުބާރާތުގެ ގަވާއިދުގެ 2.22 މާއްދާއިގައިވާ ގޮތުން ކުޅުންތެރިން ކުޅިވަރުގެ ރޫހާ ޚިލާފުވެއްޖެނަމަ ނުވަތަ އޯވަރެއްގައި އޮންނަ ހަ ބޯޅަ އުކަން ހަމަޖެހިފައިވާ ވަގުތަށްވުރެ ލަހުން އުކައިފިނަމަ ލަސްކުރާ ކޮންމެ އޯވަރަކަށް ޖޫރިމަނާ ކުރެވިދާނެ އެވެ.