ފަޚުރުއްޒަމާނަށް، އިނާމަކަށް 1 މިލިއަން ރުޕީސް

ޕާކިސްތާނުގެ ބެޓްސްމަން ފަޚުރުއްޒަމާނަށް، އިނާމެއްގެ ގޮތުން އެއް މިލިއަން ރުޕީސް ދޭން ނިންމައިފިއެވެ.

ޕާކިސްތާނުގެ ކްރިކެޓް ބޯޑުން މިގޮތަށް ނިންމައި އެކަން އޭނާއަށް އެންގީ މެނޭޖްމަންޓް ކޮމިޓީގެ ޗެއަރމަން ޒަކާ އަޝްރަފް، ކުޅުންތެރިޔާއަށް ފޯނުން ގުޅައި ވާހަކަ ދައްކަމުންނެވެ.

މިއީ، އިންޑިޔާގައި މިހާރު ކުރިއަށްދާ ކްރިކެޓް ވޯލްޑްކަޕުގައި އިއްޔެ ނިއުޒީލޭންޑާ ދެކޮޅަށް ފަޚުރުއްޒަމާން ދެއްކި މޮޅު ކުޅުމާ ގުޅިގެން ދިން އިނާމެކެވެ. އޭނާ ވަނީ މި މެޗުގައި 81 ބޯޅައިން، ނުބައިނުވެ 126 ލަނޑު ހަދާފައެވެ. ވާރޭގެ ސަބަބުން މެޗު ކުރުކޮށްލައި ޕާކިސްތާން މޮޅުވިކަމަށް ނިންމިއިރު، ޓީމު މޮޅުކޮށްދިނުމުގައި އެންމެ މުހިންމު ދައުރެއް އަދާކުރީވެސް ފަޚުރުއްޒަމާނެވެ.

މި މެޗުގައި އޭނާ ވަނީ 11 ފަހަރު ހަޔަކަށް އަދި 8 ފަހަރު ހަތަރަކަށް ބޯޅަ ފޮނުވާލާފައެވެ. ވާތުން ކުޅޭ ބެޓްސްމަން ވެފައިވަނީ ކްރިކެޓް ވޯލްޑްކަޕުގައި 10ށްވުރެ ގިނަ ފަހަރު އެއް މެޗެއްގައި ހަޔަކަށް ޖެހި ހަތަރުވަނަ ކުޅުންތެރިޔާއަށެވެ.

މެޗަށްފަހު ޕާކިސްތާނުގެ ޓީމުގެ ކެޕްޓަން ބާބަރު އަޒަމްވެސް ވަނީ ފަޚުރުއްޒަމާނަށް ވަރަށް ބޮޑަށް ތައުރީފްކޮށްފައެވެ.

ޕާކިސްތާނުގެ ނޫސްތަކުން ބުނެފައިވަނީ އިއްޔެގެ މެޗުގައި "ފުރަތަމަ ބޯޅައާއެކު ވެސް ފަޚުރުއްޒަމާން ހުރީ ޗާޖުވެފައި" ކަމަށެވެ. ފަޚުރުއްޒަމާނަކީ ވޯލްޑްކަޕުގައި ޕާކިސްތާނަށް އެންމެ އަވަހަށް 100 ލަނޑު ހަމަކޮށްދިން ކުޅުންތެރިޔާވެސް މެއެވެ. އޭނާ ސައްތަ ހަމަކުރީ 63 ބޯޅައިންނެވެ.

ވޯލްޑްކަޕުގައި ޕާކިސްތާނަށް ސެމީ ފައިނަލަށް ދެވޭނީ ކުރިއަށް އޮތް އިންގްލެންޑް މެޗުން މޮޅުވެ، ނިއުޒީލެންޑާއި ސްރީލަންކާ މެޗުގެ ނަތީޖާ ނުކުންނަ ގޮތަކުންނެވެ.