ވާރޭގެ އެހީގައި ނިއުޒީލޭންޑް ބަލިކޮށް ޕާކިސްތާން ސެމީއާ ގާތަށް

ވާރޭވެހުމުގެ ސަބަބުން ނުކުޅެވޭ ގޮތްވި މެޗުން ނިއުޒީލޭންޑް 21 ލަނޑުން ބަލިކޮށް ޕާކިސްތާން ކްރިކެޓް ވޯލްޑްކަޕުގެ ސެމީ ފައިނަލަށް ދިއުމުގެ އުއްމީދު ދަމަހައްޓައިފި އެވެ.

އިންޑިޔާގައި މިހާރު ކުރިއަށްދާ މުބާރާތުގެ ސެމީ ފައިނަލަށް ދިއުމަށް ދެ ގައުމަށް ވެސް ބާކީ އޮތީ އެންމެ މެޗެކެވެ. މިވަގުތު ޕޮއިންޓްގެ ގޮތުން ދެ ޓީމު ހަމަހަމަވެ، ރަންރޭޓުން ޓޭބަލުގެ ހަތަރުވަނަ ނިއުޒީލޭންޑު އަދި ޕާކިސްތާނަށް ލިބެނީ ފަސްވަނަ އެވެ.

މިއަދުގެ މެޗުގައި ފުރަތަމަ ކުޅެން ނުކުމެ ނިއުޒީލޭންޑުން 50 އޯވަރުގެ އިނިންގްސް ނިންމާލީ 401 ލަނޑު ހަމަކޮށްގެންނެވެ. ރަވިންދްރާ 108 ލަނޑު ހެދިއިރު އަނިޔާއިން ރަނގަޅުވެގެން އެނބުރި އައިސް ކެޕްޓަން ވިލިއަމްސަން މޮޅަށް ކުޅެ 95 ލަނޑު ހެދި އެވެ.

ކުރިން ވެސް ވިއްސާރަވެ، ވާރޭވެހިދާނެ ކަމަށް ބެލެވިފައި އޮއްވައި ކުޅުނު މެޗުގައި ޕާކިސްތާނު ބެޓްކުރަނިކޮށް މެޗު ހުއްޓާލަން ޖެހުނީ 21 ވަނަ އޯވަރާ ހިސާބުންނެވެ. އެއިރު ޕާކިސްތާނުން ހެދިފައި އޮތީ އެއް ވިކެޓަށް 160 ލަނޑެވެ. ވާރޭ ހުއްޓާލުމުން މެޗުގެ އޯވަރު މަދުކޮށް ދެ ވަނަ ފަހަރަށް ދެ ޓީމު ކުޅެން އެރީ 41 އޯވަރުވެ ތެރޭގައި ޕާކިސްތާނުން 342 ލަނޑު ހަދައިފިނަމަ މެޗުން މޮޅުވާނެ ކަމަށް ދެ ޓީމު އެއްބަސްވެގެންނެވެ.

ނަމަވެސް ހަޔަރު އޯވަރަށް ފަހު މެޗު ކުރިއަށް ނުގެންދެވި ދެ ވަނަ ފަހަރަށް ހުއްޓާލަން ޖެހުމުން އިންޓަނޭޝަނަލް ކްރިކެޓް ކައުންސިލުން ނިންމީ ވާރޭ ވެހިގެން ފުރަތަމަ ހުއްޓާލަން ޖެހުނު 21 އޯވަރާ ހިސާބަށް މެޗުގެ ނަތީޖާ ގުނުމަށެވެ. މި ގޮތުން 21 އޯވަރުގެ ތެރޭގައި ދެ ޓީމުން ކުރެ ގިނަ ލަނޑު ހަދާފައިވަނީ ޕާކިސްތާން ކަމަށްވާތީވެ އެ ގައުމު މޮޅުވީ ކަމަށް ނިންމީ އެވެ.

ނިއުޒީލޭންޑްގެ ކެޕްޓަން ވިލިއަމްސަން މެޗަށް ފަހު ބުނީ ޕާކިސްތާނުގެ ބެޓްސްމަނުންގެ ކުޅުން މޮޅު ކަމަށާއި އެމީހުން މެޗު ފެށީ ވެސް ވިއްސާރައިގެ އަސަރުކޮށްފާނެތީވެ އެކަމަށް ވިސްނައިގެން ބެޓްކުރަންކަން އެނގުނު ކަމަށެވެ.

މުބާރާތުގައި ޕާކިސްތާނަށް ބާކީ އޮތީ އިންގްލޭންޑް މެޗެވެ. ނިއުޒީލޭންޑަށް ލަންކާ މެޗެވެ. މި ދެ ގައުމު ވެސް ވަނީ މުބާރާތުން ކަޓާފަ އެވެ.