މަޖިލިސް އިންތިޚާބު: ބައެއް ދާއިރާތަކަށް ރަށްތައް ކަނޑައެޅިގޮތަށް ބަދަލުގެނެސްފި
ހައްދުންމަތީ ގަމު ދާއިރާއިން މުންޑޫ ވަކިކޮށް، އިސްދޫ ދާއިރާއަށް ބަދަލުކޮށްފައިވާއިރު ހުވަދުއަތޮޅު އުތުރުބުރީގެ 3 ދާއިރާ އަކަށް އާބާދީ ހަމަހަމަކުރުމަށް ބަދަލުގެނެސްފައިވޭ
ރިޔާސީ އިންތިޚާބު ދާއިމީ ނަތީޖާ އިއުލާންކުރުމަށް ބޭއްވި ނޫސްވެރިންގެ ބައްދަލުވުން
ރައްޔިތުންގެ މަޖިލީހުގެ އިންތިޚާބީ ދާއިރާތައް ކަނޑައަޅާފައިވާ ގޮތާ ގުޅޭގޮތުން އާންމުން ހުށަހެޅި ޝަކުވާތަކާއި ޚިޔާލުތަކަށް ބަލާ ބައެއް ދާއިރާތަކަށް ރަށްތައް ކަނޑައެޅިގޮތަށް އިލެކްޝަންސް ކޮމިޝަން (އީސީ)ން ބަދަލު ގެނެސްފިއެވެ.
އީސީގެ ނާއިބު ރައީސް އިސްމާއީލު ހަބީބު ވިދާޅުވީ ރައްޔިތުންގެ މަޖިލީހުގެ އިންތިޚާބީ ދާއިރާތަކަށް އާބާދީ ކަނޑައަޅާފައިވާ ގޮތުގެ ވަގުތީ ރިޕޯޓަށް ލިބިފައިވާ ޝަކުވާ/ޚިޔާލުތައް އިލެކްޝަންސް ކޮމިޝަނުން ދިރާސާކުރުމަށް ފަހު، ވަގުތީ ރިޕޯޓަށް ބައެއް ބަދަލު ގެނައުމަށް ކޮމިޝަނުން ނިންމަވާފައިވާ ކަމަށެވެ. އެގޮތުން މާލޭ މުނިސިޕަލްޓީގެ ދަފްތަރުގައި ހިމެނޭ މީހުންގެ ތެރެއިން، ވިލިމާލެ ދާއިރާގައި ރަޖިސްޓަރީ ވެފައިވާ މީހުން ފިޔަވައި، އެހެން ހުރިހާ މީހުން، ހުޅުމާލެ މެދު ދާއިރާ އާއި، ހުޅުމާލެ އުތުރު ދާއިރާ އަށް ބަދަލުކޮށް، ދަފްތަރުގައި ހިމެނޭ މާލޭ ދާއިރާ ތައް (މާފަންނު، މައްޗަންގޮޅި) ގެ އާބާދީ ހަމަހަމަކުރުމަށް ޗާޓަށް ބަދަލުގެނައުމަށް ނިންމަވާފައިވާކަމަށެވެ.
މީގެއިތުރުން ހައްދުންމަތީ ގަމު ދާއިރާއިން މުންޑޫ ވަކިކޮށް، އިސްދޫ ދާއިރާއަށް ބަދަލުކޮށްފައިވާއިރު ހުވަދުއަތޮޅު އުތުރުބުރީގެ 3 ދާއިރާއަކަށް އާބާދީ ހަމަހަމަކުރުމަށް ބަދަލު ގެނެސްފައިވާ ކަމަށެވެ. އެގޮތުން މިގޮތަށް ބަދަލު ގެނައުން ހުވަދުއަތޮޅުގެ ދާއިރާތައް ހަމަޖެހިގެންދާނީ، - ވިލިނގިލި ދާއިރާ: ވިލިނގިލި - ދާންދޫ ދާއިރާ: ނިލަންދޫ، ދާންދޫ، ކޮނޑޭ، - ގެމަނަފުށި ދާއިރާ: ގެމަނަފުށި، ކަނޑުހުޅުދޫ، ދެއްވަދޫ، - ކޮލަމާފުށި ދާއިރާ: ކޮލަމާފުށި، މާމެންދޫ މިގޮތަށް ކަމަށެވެ.
އިންތިޚާބީ ދާއިރާތަކަށް އާބާދީ ކަނޑައަޅާފައިވާގޮތުގެ ފައިނަލް ރިޕޯޓު ތައްޔާރުކުރުމުގެ މަސައްކަތް މިހާރު ކުރެވެމުންދާކަމަށް ވެސް ހަބީބު ވިދާޅުވިއެވެ.
އަންނަ އަހަރު ބާއްވާ މަޖިލިސް އިންތިޚާބުގައި އިންތިހާބުކުރާ މެންބަރުންގެ އަދަދު 93 އަށް އިތުރުކުރަން އިލެކްޝަންސް ކޮމިޝަނުން ކުރިން އޮތީ ނިންމައިފައެވެ. މިހާރު ތިއްބަވާ 87 މެންބަރުންގެ ބަދަލުގައި 93 މެންބަރުން އިތުރުކުރަން ނިންމީ އާބާދީ އަށް ބެލުމަށް ފަހު ބައެއް ދާއިރާތައް އިތުރުކުރަން ނިންމުމުންނެވެ.
މަޖިލީހުގެ އިންތިޚާބީ ދާއިރާތައް ކަނޑައަޅާފައިވާ ގޮތާ ބެހޭގޮތުން ޝަކުވާއަށް ހުޅުވައިލުމުން، 65 ޝަކުވާއެއް ލިބުނު ކަމަށް އީސީން ވަނީ މީގެ ކުރިން ބުނެފައެވެ.
