ކްރިކެޓް ވޯލްޑްކަޕުގެ ސެމީ ފައިނަލުގެ ފަހު ޖާގަ އަށް ވާދަކުރަނީ ތިން ގައުމެކެވެ. އެއީ އެންމެ ފަހުގެ ރަނަރަބް ނިއުޒީލޭންޑާއި ޕާކިސްތާން އަދި އަފްޣާނިސްތާނެ އެވެ.

މީގެ ތެރެއިން ނިއުޒީލޭންޑްގެ ހުރިހާ މެޗެއް ކުޅެ ނިމުނުއިރު އެ ޓީމު އޮތީ ޓޭބަލުގެ ހަތަރުވަނާގަ އެވެ. 10 ޓީމު ލީގު އުސޫލުން ބުރެ ކުޅެ ނިމޭއިރު ހަތަރުވަނަ އަކީ ސެމީ ފައިނަލުގެ އެންމެ ފަހު ޖާގަ ލިބޭ ގައުމުގެ މަގާމެވެ. ޕާކިސްތާން އޮތީ ފަސް ވަނާގަ އެވެ. އަފްޣާނިސްތާން ހަ ވަނާގަ އެވެ. މި ތިން ގައުމު ވެސް ފަހު މެޗު ކާމިޔާބުކޮށްފިނަމަ ޕޮއިންޓްގެ ގޮތުން ހަމަހަމަވާނެ އެވެ. އެއިރުން ސެމީގެ ފަހު ޖާގަ ލިބޭ ހަތަރު ވަނަ މަގާމަށް ދާނީ ނެޓްރަންރޭޓް ގިނަ ޓީމެކެވެ.

ނިއުޒީލޭންޑްގެ ފަހު މެޗުގައި ރޭ ފަހަތުން ދެ ވަނާގައި އޮތް ސްރީލަންކާ ބަލިކުރީ ފަސް ވިކެޓުންނެވެ. 46 އޯވަރުގެ ތެރޭގައި އެންމެން ނުބައިވެގެން ލަންކާ އަށް ހެދުނީ އެންމެ 171 ލަނޑެވެ. ޖަވާބުގައި ކުޅެން ނުކުމެ ނިއުޒީލޭންޑް މޮޅުވީ 23 އޯވަރުގެ ތެރޭގައި 172 ލަނޑު ހަދައިގެންނެވެ.

މިއާއެކު ނިއުޒީލޭންޑްގެ ނެޓްރަންރޭޓް ވަނީ 0.74ގަ އެވެ. ޕާކިސްތާނުގެ ނެޓްރަންރޭޓަކީ 0.03 އެވެ. އަފްޣާނިސްތާން އޮތީ 0.03- ގަ އެވެ. މިހެންވެ އަފްޣާނިސްތާނަށް ފުރުސަތު ނެތް ކަމަށް ގިނަ ބަޔަކު ޔަގީންކުރެ އެވެ. ފުރުސަތު އޮތީ ޕާކިސްތާނަށެވެ.

ޕާކިސްތާނުގެ ފަހު މެޗުގައި މާދަމާ ނުކުންނާނީ އެންމެ ފަހުގެ ޗެމްޕިއަން އިންގްލޭންޑާ ދެކޮޅަށެވެ. މި ފަހަރުގެ ކްރިކެޓް ވޯލްޑްކަޕުގައި މާ އެދެވޭ ކުޅުމެއް ނުދެއްކުނު އިންގްލޭންޑް މިހާތަނަށް ކުޅުނު އަށް މެޗުގެ ތެރެއިން މޮޅުވީ އެންމެ ދެ މެޗުންނެވެ. އެ ގައުމާ ދެކޮޅަށް ކުޅެ މޮޅުވިޔަސް ޕާކިސްތާނަށް ނިއުޒީލޭންޑްގެ ނެޓްރަންރޭޓް ފަހައިލެވޭނީ 287 ލަނޑުން ނުވަތަ 288 ލަނޑުން މޮޅުވެގެންނެވެ. އަމުދުން މިކަން ކުރެވޭނީ ގިނަ ތަޖުރިބާކާރުންގެ ނަޒަރުގައި ޕާކިސްތާނަށް ފުރަތަމަ ބެޓްކުރަން ފުރުސަތު ލިބިގެންނެވެ. މިހެންވެ 1992 ވަނަ އަހަރުގެ ޗެމްޕިއަން ޕާކިސްތާނަށް ވެސް އޮތީ ވަރަށް ހަނިފުރުސަތެކެވެ.