އީގަރ މުސްލިމުންގެ މައްސަލައިގައި ޕާކިސްތާން ހަނުތިބެނީ ކީއްވެ؟

ޗައިނާގެ ޝިންޖިއާންގައި ދިރިއުޅޭ އީގަރ ދަރިކޮޅުގެ މުސްލިމުންނާއިމެދު އެގައުމުގެ ސަރުކާރުން އަމަލުކުރަމުންދާ ގޮތަކީ ބައިނަލްއަގްވާމީ ސަމާލުކަން އެކަމަކަށް ލިބިފައިވާ އަނިޔާވެރި އަމަލުތަކެކެވެ.

ދީން ބަދަލުކުރުމަށް މަޖުބޫރުކޮށް، މުސްލިމުން ޖަލުތަކުގައި ބަންދުކޮށްގެން ގެންގުޅޭ މައްސަލައިގައި މުޅި ދުނިޔޭގެ އެކިކަންކޮޅުތަކުން ޗައިނާ ސަރުކާރަށް ދަނީ ފާޑުކިޔަމުންނެވެ. ބޮޑެތި ގައުމުތަކުން އެކަމަށް ފާޑުކިޔަމުންދާއިރު، ޗައިނާއާ ގާތްގުޅުމެއް އޮންނަ މުސްލިމް ބައެއް ގައުމުތަކުން ޗައިނާ ސަރުކާރުގެ އަނިޔާވެރި އަމަލުތައް ދިފާއުކޮށް މިހާރު ދަނީ ވާހަކަ ދައްކަމުންނެވެ. އޭގެ ތެރޭގައި ޕާކިސްތާން ހިމެނެއެވެ.

ބޯޑަރު މައްސަލައިގައި ޕާކިސްތާނާއި އިންޑިއާއާއި ދެމެދު ޖެހިފައިވާ މައްސަލައަކީ ދީނީ މައްސަލައެއްކަމަށް ހަދައި، އިންޑިއާ އަށް ވަރަށް ބޮޑަށް ޕާކިސްތާނުން ފާޑުކިޔަމުންދާއިރު، މާ ދުރު ނޫން ހިސާބެއްގައި ތިބި އީގަރ މުސްލިމުންގެ ހައްގުގައި ޕާކިސްތާނުން އެއްޗެއް ނުބުނާ މައްސަލައިގައި އެގައުމަށް ވަނީ ފާޑުކިޔުންތައް އަމާޒުވެފައެވެ.

ޚާއްސަކޮށް ޕާކިސްތާންގެ ބޮޑުވަޒީރު އިމްރާން ޚާންއަކީ މުސްލިމުންގެ ހިމާޔަތުގައި ތެދުވާނެ ލީޑަރެއްކަމަށް ދެއްކުމަށް ޕާކިސްތާން ސަރުކާރުން މަސައްކަތް ކުރަމުންދާ ދަނޑިވަޅެއްގައި، ޗައިނާއިން ފޯރުކޮށްދޭ ލޯނުތަކުގެ ސަބަބުން ފިއްތުންތައް ކުރިމަތިވެ، ޗައިނާއާއި ދެކޮޅަށް ޕާކިސްތާނަށް އަނގަ ހުޅުވާލަން ނުކެރިފައި ތިބިކަން ގިނަ ބަޔަކު ފާހަގަކުރެއެވެ.

ޗައިނާގައި މުސްލިމުންނާއި ދެކޮޅަށް ހިންގަމުންދާ ލާއިންސާނީ އަމަލުތަކުގެ އަސަރު ޕާކިސްތާނުގެ އިތުރުން މެދުތެރޭ އޭޝިއާއަށް ކުރަމުންދާކަމަށް މުހައްލިލުން ބުނެއެވެ. ދާދި ފަހުންވެސް ޗައިނާއިން ހައްޔަރުކުރި ޕާކިސްތާން ވިޔަފާރިވެރިންތަކެއްގެ އަނބިންގެ މައްސަލައިގައިވެސް ޕާކިސްތާނުން އެއްޗެއް ބުނެފައިނުވާއިރު، ޗައިނާގެ މުސްލިމުންނާއިމެދު ހިންގަމުންދާ ލާއިންސާނީ އަނިޔާތަކަށް ބީރު ކަންފަތެއް ދީގެން ޕާކިސްތާނުން ތިބޭ ތިބުމުގެ ނަތީޖާ ޕާކިސްތާން ސަރުކާރަށް ރަނގަޅު ނުވާނެކަމަށް މަސްރަހު ދިރާސާކުރާ ފަރާތްތަކުން ދެކެއެވެ.

ޗައިނާއިން މުސްލިމުންގެ ހައްގުތަކަށް އަރައިގަތުމާއި ދެކޮޅަށް ޕާކިސްތާނަށް އެއްޗެއް ބުނަން އެންމެ ފަސްޖެހޭ އެއް ސަބަބަކަށް ވެފައިވަނީ ޗައިނާގެ އެހީގައި ކުރިއަށްދާ ޗައިނާ ޕާކިސްތާން އިކޮނޮމިކް ކޮރިޑޯއެވެ. އުމްރާނީ ތަރައްޤީގެ ބައެއް ޕްރޮޖެކްޓްތައް ހިމެނޭ މި ޕްރޮޖެކްޓަކީ ޗައިނާއިން އެގައުމުގެ ވިޔަފާރި ފުޅާކޮށް، ދުނިޔެއަށް ހަންފެތުރުމަށް ބޭނުންކުރާ ބެލްޓް އެންޑް ރޯޑް އިނީޝިއޭޓިވްގެ ތެރެއިން ކުރިއަށްދާ ވަކި ޕްރޮޖެކްޓެކެވެ. މީގެ ސަބަބުން ޗައިނާގެ ވިޔަފާރި މުދާ އަރަބި ކަނޑާއި، ގަލްފްގެ ހިސާބުތަކަށް ފަސޭހަކަމާއިއެކު ފޯރުކޮށްދެވޭނެއެވެ.

ހައިރާން ވާން ޖެހޭ އަނެއްކަމަކީ ޗައިނާގެ އަނިޔާވެރިކަމާ ދެކޮޅަށް ޕާކިސްތާނުގައި ހަރަކާތްތެރިވާ ޓެރަރިސްޓް ޖަމާއަތްތަކުންވެސް ހަރު އަޑުން އެއްޗެއް ބުނެ ނުލާ ކަމެވެ. ލަޝްކަރޭ ތައިބާ އާއި ޖައިޝޭ މުހައްމަދު ފަދަ ޖަމާއަތްތަކުންވެސް ހުޅަނގުގެ ގައުމުތަކުގައި ހިނގާ ކަންކަމާއި އިންޑިއާގައި ހިނގާ ކަންކަމާއި ބެހި، އިންޒާރުތައް ދޭއިރު، ޗައިނާއިން ހިންގަމުންދާ އަމަލުތަކާއިމެދު އެއްޗެއް ނުބުނެއެވެ. މި ޖަމާއަތްތަކަކީ ޕާކިސްތާނުގެ ޖާސޫސީ އިދާރާ އައި،އެސް،އައިގެ ތާއީދާއިއެކު ހިންގާ ޓެރަރިސްޓް ޖަމާއަތްތައް ކަމަށް އަޑު ފެތުރިފައިވާއިރު، ޕާކިސްތާން ސަރުކާރުން ހިތްވަރުދޭ އަމަލުތަކަކާ ދެކޮޅަށް އެމީހުން އެއްޗެއް ބުނެފާނެކަމަށް ގަބޫލުކުރާކަށްވެސް ނުވާނެއެވެ.