ޣައްޒާގައި މަރުވި ކުޑަކުދިންގެ އަދަދު 4،000ން މައްޗަށް އަރައިފި

ޔަހޫދީ އިސްރާއީލުން ފަލަސްތީނަށް ދެމުންދާ ލާއިންސާނީ ހަމަލާތަކުގައި މަރުވި މީހުންގެ އަދަދު 10,000ން މައްޗަށް އަރައިފިއެވެ.

އަލްޖަޒީރާ ނޫހުގައި ރިޕޯޓްކޮށްފައިވާ ގޮތުން، މަރުވި މީހުންގެ އަދަދު 10،328ށް ވަނީ އަރާފައެވެ. މަރުވި މީހުންގެ ތެރޭގައި އަންހެނުންނާއި ކުޑަކުދިން ގިނަ އަދަދަކަށް ހިމެނެއެވެ. އެގޮތުން މިހާތަނަށް 4،237 ކުޑަކުދިން މަރުވެފައި ވާކަމަށްވެސް ރިޕޯޓުތައް ބުނެއެވެ.

މިދިޔަ އޮކްޓޯބަރ މަހުގެ 7 ވަނަ ދުވަހުން ފެށިގެން ދެ ގައުމުގެ ދެމެދުގައި ހަމަލާ ބަދަލުކުރުންތައް ކުރިއަށްދާއިރު، އިސްރާއީލުގެ 1400 މީހުން ވަނީ މަރުވެފައެވެ. ޔޫއެންއިން ވަނީ ފަލަސްތީނުގެ އިންސާނީ ހާލަތު ގޯހުން ގޯހަށް ދާތީ އެކަމާމެދު ކަންބޮޑުވުން ފާޅުކޮށްފައެވެ.

އިންސާނީ ހައްގުތަކަށް މަސައްކަތްކުރާ ޖަމާއަތްތަކުން ތުހުމަތުކުރާގޮތުގައި، އިސްރާއީލުން ވަނީ ބައިނަލްއަގުވާމީ ގާނޫނުތަކާ ޚިލާފަށް އާބާދީ ބޮޑު ސަރަހައްދުތަކުގައި އެކަށީގެންނުވާ އަދި ނުހައްގުން ބާރުގެ ބޭނުންކޮށްފައެވެ. ނަމަވެސް އިޒްރޭލުން ބުނަނީ އާންމުންގެ މަރުގެ ޒިންމާ ނަގަންޖެހޭނީ ހަމާސްއިން ކަމަށެވެ.

ފަލަސްތީނާއި ބައިނަލްއަގުވާމީ ބައެއް އޮބްޒަރވަރުން ބުނަނީ މިއީ ފަހަކަށް އައިސް ހިންގާ މިފަދަ ހަނގުރާމައިގެ އެންމެ ނުރައްކާ ބޮޑު އަދި އެންމެ އިންސާފެއް ނެތް ގަތުލުއާންމު ކަމުގައެވެ. އިޒްރޭލުން ބުނަމުންދަނީ އެމީހުންގެ ހަމަލާތަކުން އާންމުން ދުރުކުރުމަށް، ރައްކާތެރިކަމުގެ ފިޔަވަޅުތައް އަޅަމުން އަންނަކަމަށެވެ.

ޔަހޫދީ އިސްރާއީލުން ޣައްޒާއަށް ބޮން އަޅަން ފަށާފައިވަނީ، ފަލަސްތީނުގެ ހަމާސް ޖަމާއަތުގެ މުޖާހިދުން އިސްރާއީލާއި ދެކޮޅަށް ހަނގުރާމަ އިއުލާނުކުރުމާއި ގުޅިގެން، އޮކްޓޯބަރު މަހުގެ 7 ވަނަ ދުވަހުއެވެ.