މިހާރު ދިމާވެފައިވާ މައްސަލައަކީ މަޖިލީހުގެ ނިޒާމުގެ ތެރެއިން ހައްލު ކުރެވޭނެ މައްސަލައެއް: ނިއުޝާ

ރައްޔިތުންގެ މަޖިލީހުގެ ރައީސް މުޙައްމަދު ނަޝީދުގެ އިތުބާރު ނެތްކަމުގެ މައްސަލައިގައި މިހާރު ދިމާވެފައިވާ ޙާލަތްތަކަކީ މަޖިލީހުގެ ނިޒާމުގެ ތެރެއިން ހައްލު ކުރެވޭނެ ކަންކަންކަމަށް މަޖިލީހުގެ އަމީންއާންމު ފާތިމަތު ނިއުޝާ ވިދާޅުވެއްޖެއެވެ.

އަންގާރަ ދުވަހު ސުޕްރީމް ކޯޓުގައި ކުރިއަށްދިޔަ އަޑުއެހުމުގައި ވާހަކަފުޅު ދައްކަވަމުން މަޖިލީހުގެ އަމީންއާންމު ފާތިމަތު ނިއުޝާ ވިދާޅުވީ، މިހާރު ދިމާވެފައިވާ މައްސަލައަކީ މަޖިލީހުގެ ނިޒާމުގެ ތެރެއިން ހައްލު ކުރެވޭނެ މައްސަލައެއް ކަމަށެވެ. އެގޮތުން ޙައްލު ގެނެވޭނެ 4 ގޮތެއް ނިއުޝާ ވަނީ ކޯޓުގައި ކިޔާދެއްވާފައެވެ.

Advertisement

ނިއުޝާ ވިދާޅުވާ ގޮތުގައި އެއް ގޮތަކީ މަޖިލީހުގެ ޤަވާއިދުގެ 108 ވަނަ މާއްދާގެ (ށ) ގެ ދަށުން މަޖިލީހުގެ އާންމު ކޮމިޓީން އިސްނަގައިގެން ޤަވާއިދަށް އިސްލާޙު ގެނައުމަށް މަޖިލީހުގެ ތަޅުމަށް ހުށައެޅުމެވެ.

ނިއުޝާ ހުށައެޅުއްވި ދެވަނަ ގޮތަކީ މަޖިލީހުގެ ޤަވާއިދުގެ 167 ވަނަ މާއްދާގެ ދަށުން މަޖިލީހުގެ ހިންގުމުގެ އުސޫލަށް ބަދަލު ގެނައުމަށްޓަކައި މަޖިލީހުގެ މެމްބަރަކު މަޖިލީހަށް ޤަރާރެއް ހުށައެޅުއްވުމެވެ. ނަމަވެސް އެއީ ގިނަ ދުވަސް ނަގާނެ ކަމެއްކަން ނިއުޝާ ފާހަގަ ކުރެއްވިއެވެ.

ތިންވަނަ ހުށައެޅުމަކީ މަޖިލީހުގެ ޤަވާއިދުގެ 249 ވަނަ މާއްދާގެ (ށ) ގެ ދަށުން މަޖިލީހުގެ ޤަވާއިދަށް ގެންނަން ފެންނަ އިސްލާޙީ މައްސަލައެއްގެ ގޮޮތުގައި މި މައްސަލަ ހުށައެޅުމެވެ. އެގޮތުގެ މަތިން އެމްޑީޕީން ކުރިންވެސް މައްސަލައެއް ހުށައަޅުއްވާފައިވާއިރު، އެ މައްސަލަ އެޖެންޑާ ކޮށްދިނުމަށް މަޖިލީހުގެ އިދާރާއިން 31 އޮކްޓޯބަރުގައި މަޖިލީހުގެ ނައިބްރައީސް އަރިހުގައި އެދިފައިވާނެކަމަށް ނިއުޝާ ވިދާޅުވިއެވެ.

ހަތަރުވަނަ ކަމެއްގެ ގޮތުން ހުށައަޅުއްވާފައިވަނީ މިއީ މަޖިލީހުގެ ޤަވާއިދުގެ 250 ވަނަ މާއްދާގެ ދަށުން "ޤަވާއިދުގައި ބަޔާންކޮށްފައިނުވާ ކަމެއް ދިމާވުން" ކަމަށް ބަލައި، އެ މާއްދާގައި ބުނެފައިވާ ގޮތުގެ މަތިން ރައްޔިތުންގެ މަޖިލީހުން އެކަމަށް ގޮތެއް ނިންމުމެވެ.

އެކަމާ ގުޅޭގޮތުން ޕީއެންސީ ތަމްސީލު ކުރައްވާ ވަކީލު، ކުރީގެ ބަންޑާރަނައިބު އައިޝަތު އާޒިމާ ޝަކޫރު ވިދާޅުވީ، މި މައްސަލައަށް ބަލާއިރު، 205 ވަނަ މާއްދާގެ (ބ) އިން ދުރަށްޖެހި، އެ މަސައްކަތުގެ ރިޔާސަތު އެހެން ފަރާތަކާ ހަވާލުކުރުމުގެ ބާރެއް މަޖިލީހުން މިހާރު މާނަކޮށްފައިވާ ގޮތުން މަޖިލީހަށް ލިބިގެނެއްނުވާކަމަށެވެ.

މި މައްސަލައަށް މަޖިލީހުން ގޮތެއް ނިންމިދާނެކަމަށް އަމީންއާންމު ވިދާޅުވިއިރު، މައްސަލަތައް އެޖެންޑާކުރިނަމަވެސް މައްސަލަތައް ނުހިނގާކަމަކީ މިއަދު ހަގީގަތެއްކަމަށް އާޒިމާ ވިދާޅުވިއެވެ. 

ނަޝީދުގެ އިތުބާރު ނެތްކަމުގެ މައްސަލަ އެޖެންޑާ ކުރުމުން އީވާ ވަނީ ހުރިހާ ޖަލްސާއަކަށްވެސް ސަލާމް ފޮނުއްވާފައެވެ. ސަބަބެއްކަމަށްވީ ޑެންގޫ ހުން ޖެހިވަޑައިގަތުމެވެ.

އެންމެ ފަހުން 5 ނޮވެމްބަރުވީ އާދިއްތަ ދުވަހުވެސް އިވާ ސަލާމް ފޮނުއްވުމުން މިއީ މަޖިލީހުގެ ޖަލްސާތައް މިފަހުން ކެންސަލްވި 5 ވަނަ ފަހަރެވެ.

ނަޝީދުގެ އިތުބާރު ނެތްކަމުގެ މައްސަލަ މިދިޔަ މަހުގެ 29، 30 އަދި މި މަހުގެ 1 ވަނަ ދުވަހާއި 5 ވަނަ ދުވަހު ވެސް ތާވަލު ކުރިއެވެ. ނަމަވެސް އެ ޖަލްސާތަކަށް އީވާ އަބްދުﷲ ސަލާމް ފޮނުއްވުމުން ޖަލްސާތައް ވަނީ ކެންސަލް ކޮށްފައެވެ.

އެންމެފަހުން ސުޕްރީމް ކޯޓަށް ހުށަހަޅާފައިވާ މައްސަލައިގައި ވަކި ގޮތެއް ކަނޑައެޅެންދެން ޖަލްސާގެ ރިޔާސަތާ ޙަވާލުވާން އުޒުރުވެރިވެވަޑައިގެން އީވާ ވަނީ މަޖިލީހަށް އެކަން އަންގަވާފައެވެ.

އީވާ އުޒުރުވެރިވެވަޑައިގަތުމާއެކު ދެން ޖަލްސާއަކަށް އެ މައްސަލައެއް އެޖެންޑާއެއް ނުކުރާނެކަމަށް މަޖިލީހުން ބުނެއެވެ.