ޣައްޒާގެ މުވާސަލާތީ ހާލަތު މަޑުމަޑުން އިއާދަ އެބަވޭ

ޣައްޒާގެ މުވާސަލާތީ ހާލަތު މަޑުމަޑުން އިއާދަވަމުންދާ ކަމަށް މީޑިއާތަކުން ރިޕޯޓްކޮށްފިއެވެ.

އަލްޖަޒީރާގައި ރިޕޯޓްކޮށްފައިވާ ގޮތުން ފަލަސްތީނުގެ ޓެލެކޮމިއުނިކޭޝަން ކޮމްޕެނީ ޕަލްޓެލް އިން ވަނީ ފޯން ލައިންތަކާއި އިންޓަރނެޓް ވެސް މަޑުމަޑުން ރަނގަޅުވަމުން އަންނަކަމަށް ބުނެފައެވެ. އާދިއްތަ ދުވަހު 3 ފަހަރަށް މުޅި ޣައްޒާ އިން މުވާސަލާތުގެ ޚިދުމަތް މެދުކެނޑުނެވެ. އިސްރާއީލުގެ އަސްކަރިއްޔާއިން ވަނީ ފަލަސްތީނަށް ދެމުންދާ ހަމަލާތައް އިތުރަށް ވަރުގަދަކުރާނެ ކަމަށް އާދިއްތަ ދުވަހު ބުނެފައެވެ.

އިިސްރާއީލްގެ ހަމަލާތަކުގައި ފަލަސްތީނުގެ 9400 އަށް ވުރެ ގިނަ މީހުން މަރުވެފައިވާ ކަމަށް މީޑިއާތަކުން ވަނީ ރިޕޯޓްކޮށްފައެވެ. އަދި އިސްރާއީލުން މަރުވި މީހުންގެ އަދަދު 1400 އަށް އަރައެވެ. ފަލަސްތީނާއި އިސްރާއީލާ ދެމެދު މިހާރު ހިނގަމުންދާ ހަނގުރާމަ އަކީ ފަލަސްތީން މިނިވަން ދައުލަތަކަށް ހެދުމަށް މަސައްކަތްކުރަމުންދާ ހަމާސް ޖަމާއަތުން އޮކްޓޯބަރު މަހުގެ 7 ވަނަ ދުވަހު އިސްރާއީލަށް ދިން ކުއްލި ހަމަލާތަކަށް ފަހު އިސްރާއީލުން ފަލަސްތީނަށް ވަރުގަދަ ހަމަލާތަކެއް ދޭން ފެށުމުން ދެ ގައުމުގެ ދެމެދުގައި ކުރިއަށްދާ ހަނގުރާމައެކެވެ.