ހައްދު ފަހަނައަޅާފައިވާ ޔަހޫދީ އިސްރާއީލުން އަނެއްކާވެސް ޣައްޒާއަށް 'ފޮސްފަރަސް" ބޮން ނުވަތަ ކެމިކަލް ބޮން އަޅައިފި ކަމަށް މީޑިއާ ރިޕޯޓްތައް ބުނެފި އެވެ.
އަލްޖަޒީރާއިން ރިޕޯޓް ކޮށްފައިވާ ގޮތުގައި އިސްރާއީލްގެ އަސްކަރިއްޔާއިން ކެމިކަލް ބޮން އަޅާފައިވަނީ ޣައްޒާގެ ހުޅަނގުއުތުރުގައި ހުންނަ އަލް-މަޝްތާލް ހޮޓަލާއި ބީޗް ކޭމްޕް ކައިރިއަށެވެ.
މި ސަރަހައްދުތަކަށް ކެމިކަލް ބޮން އަޅާފައިވާއިރު، މީގެ ކުރިން ވެސް ޣައްޒާގެ ބައެއް ސަރަހައްދުތަކަށް ނިރުބަވެރިން ވަނީ ފޮސްފަރަސް ބޮން އަޅާފައެވެ.
ހުދު ފޮސްފަރަސް އަކީ އަލި އެޅުމުން ކުލަ ބަދަލުވާ ހަރުކޮށް ހުންނަ އެއްޗެކެވެ. މި ވިހަ މާއްދާ ހުދުކުލައިގައި އަދި މަޑު ރީނދޫ ކުލައިގައި ވެސް ހުރެއެވެ.
މި ކެމިކަލަކީ ވައިގެ ތެރޭގައި އޮކްސިޖަންއާއި އެއްވުމުން އަލިފާން ރޯވާ އެއްޗަކަށް ވާތީ، އަސްކަރިއްޔާތަކުން އަލިފާން އުފައްދާ އޭޖެންޓެއްގެ ގޮތުގައި އެކި ހަތިޔާރުތަކުގައި މި ކެމިކަލް ބޭނުންކުރެއެވެ. އަދި އެ ކެމިކަލްއިން އުނދަގޫ ވާފަދަ ހުދު ދުން އުފައްދާތީ އެ ބޭނުމުގައި ވެސް އެ ކެމިކަލް އަސްކަރިއްޔާތަކުން ބޭނުން ކުރެއެވެ.
ހުދު ފޮސްފަރަސް އަކީ ކެމިކަލް އަކަށް ވީ ނަމަވެސް ކެމިކަލް ހަތިޔާރު މަނާކުރާ ގާނޫނު ތަންފީޒުކުރާ ބައިނަލްއަގުވާމީ ޖަމިއްޔާގެ ކެމިކަލް ހަތިޔާރުތަކުގެ ލިސްޓުގައި ހުދު ފޮސްފަރަސް ހިމަނާފައެއް ނުވެއެވެ. ނަމަވެސް ބައެއް ފަރާތްތަކުން ބުނާގޮތުގައި މި ކެމިކަލްގައި އިންސާނުންނަށް ނުރައްކާވާ ޒާތުގެ މާއްދާއެއް ވެސް ހުރުމާއެކު މިއީ ހަނގުރާމައިގެ އަދަބުތަކާ ޚިލާފު ހަތިޔާރެކެވެ.
