ކޭންގެ ރެކޯޑާއެކު ބަޔާނުން ޑޯޓްމަންޑު ބަލިކޮށްފި

ޖަރުމަނު ލީގުގައި ބޮރޫޝިއާ ޑޯޓްމަންޑާ ދެކޮޅަށް ކުޅުނު މެޗުން އެންމެ ފަހުގެ ޗެމްޕިއަން ބަޔާން މިއުނިކް މޮޅުވެއްޖެ އެވެ.

ހޮނިހިރު ދުވަހުގެ ރޭ ޑޯޓްމަންޑުގެ ދަނޑުގައި އެ ޓީމާ ދެކޮޅަށް ނުކުތްއިރު، ބަޔާން އޮތީ މާޔޫސްކަމެއްގެ ތެރޭގަ އެވެ. އެއީ ޖަރުމަނު ކަޕުގައި ތިން ވަނަ ޑިވިޝަންގެ ސާބުރުއެކަން އަތުން ބަލިވެ، ބަޔާން ކެޓުމުންނެވެ. ނަމަވެސް ވާދަވެރި ޑޯޓްމަންޑާ ދެކޮޅަށް ކުޅުނު މެޗު ބަޔާނުން ކާމިޔާބު ކުރީ 4-0 އިންނެވެ.

މެޗު ފަށައިގެން ހަތަރު ވަނަ މިނެޓުގައި ބަޔާނުން ވަނީ ލަނޑު ޖަހައި ލީޑު ނަގައިފަ އެވެ. ޖަރުމަނުގެ ލެރޯއީ ސާނޭ ތަނަވަސްކޮށްދިން ފުރުސަތެއްގައި އެ ޓީމަށް ލީޑު ނަގައިދިނީ ޑަޔޮޓް އުޕަމެކާނޯ އެވެ. އޭގެ ފަހުން ބަޔާނުން ފުރަތަމަ ހާފުގައި އެއް ލަނޑު ޖެހިއިރު، އެ ލަނޑު ޖެހީ ޓޮޓެންހަމް ދޫކޮށް ބަޔާނަށް ބަދަލުވެ މޮޅަށް ކުޅެމުން އަންނަ އިންގްލެންޑުގެ ކެޕްޓަން ހެރީ ކޭން އެވެ. ނުވަ ވަނަ މިނެޓުގައި ކޭން ލަނޑު ޖަހަން ވެސް ފުރުސަތު ތަނަވަސްކޮށްދިނީ ސާނޭ އެވެ. ދެ ވަނަ ހާފުގައި ކޭން ވަނީ އިތުރު ދެ ލަނޑު ޖަހައި މެޗުގައި ހެޓްރިކް ހަދައިފަ އެވެ. މިއީ ބަޔާނަށް ބަދަލުވި ފަހުން ކޭން ހެޓްރިކް ހެދި ތިން ވަނަ މެޗެވެ. ބަޔާންގެ ތިން ވަނަ ލަނޑު، 72 ވަނަ މިނެޓުގައި ކޭން ޖެހީ ކިންގްސްލީ ކޯމަން ތަނަވަސްކޮށްދިން ފުރުސަތެއްގަ އެވެ. އެ ޓީމުގެ ހަތަރު ވަނަ ލަނޑު، އިތުރު ވަގުތުގައި އޭނާ ޖެހީ އެލެކްސެންޑާ ޕަލޮވިޗް ތަނަވަސްކޮށްދިން ފުރުސަތެއްގަ އެވެ.

މި މެޗުގައި ޖެހި ތިން ލަނޑާއެކު، ކޭން އަށް ވަނީ ޚާއްސަ ރެކޯޑެއް ލިބިފަ އެވެ. އެއީ ޖަރުމަނު ލީގުގައި ކުޅުނު ފުރަތަމަ 10 މެޗުން އެންމެ ގިނަ ލަނޑު ޖެހި ކުޅުންތެރިޔާ އެވެ. މިހާތަނަށް ލީގުގައި ކުޅުނު 10 މެޗުން ކޭން ވަނީ 15 ލަނޑު ޖަހައިފަ އެވެ.

މޮޅާއެކު ބަޔާނުން ވަނީ ދެ ވަނަ އަށް ޖެހިލައިފަ އެވެ. އެއީ މިހާތަނަށް ކުޅުނު 10 މެޗުން 26 ޕޮއިންޓު ހޯދައިގެންނެވެ. ހަމަ އެ އަދަދަށް މެޗު ކުޅެގެން އެއް ވަނައިގައި އޮތް ބަޔާާ ލެވަކޫސަން އަށް ލިބެނީ 18 ޕޮއިންޓެވެ. ބައްޔާއެކު ޑޯޓްމަންޑު އޮތީ 10 މެޗުން 21 ޕޮއިންޓާއެކު ހަތަރު ވަނައިފގަ އެވެ. ތިން ވަނައިގައި އޮތް ސްޓަޓްގާޓަށް ވެސް 21 ޕޮއިންޓު ލިބޭއިރު، އެ ޓީމު ކުރި ހޯދަނީ ލަނޑުންނެވެ.