ފަހު ވަގުތު ބާސެލޯނާ މޮޅުކޮށްދިނީ އަރައުހޯ

ސްޕެނިޝް ލީގުގައި ރެއާލް ސޮސިއެޑާޑާ ދެކޮޅަށް ކުޅުނު މެޗުން ފަހު ވަގުތު، އެންމެ ފަހުގެ ޗެމްޕިއަން ބާސެލޯނާ މޮޅުވެއްޖެ އެވެ.

ލީގުގައި ސޮސިއެޑާޑުގެ ދަނޑުގައި ކުޅުނު މެޗު ބާސެލޯނާ އިން ކާމިޔާބު ކުރީ 1-0 އިންނެވެ. މިއީ ސްޕެނިޝް ލީގުގައި ވާދަވެރި ރެއާލް މެޑްރިޑާ ދެކޮޅަށް ކުޅެ، ބަލިވި މެޗަށްފަހު ބާސެލޯނާ އިން ކުޅުނު ފުރަތަމަ މެޗެވެ.

މެޗުގެ ފުރަތަމަ 11 ގައި ބާސެލޯނާގެ މުހިންމު ކުޅުންތެރިން ވަނީ ހިމަނައިފަ އެވެ. އެ ކުޅުންތެރިންނަކީ ކުރިން އަނިޔާގައި ތިބި ކުޅުންތެރިންނެވެ. އަނިޔާ އިން އަދިވެސް ރަނގަޅު ވެފައި ނުވާތީ، ނެދަލެންޑްސްގެ ފްރެންކީ ޑި ޔޯން އަދި ސްޕެއިންގެ ސާޖީ ރޮބާޓޯ އަށް މި މެޗުގައި ކުޅެވިފައެއް ނުވެ އެވެ.

މެޗުގަައި ބާސެލޯނާ އިން ވަނީ ލަނޑު ޖަހާނެ ފުރުސަތުތަކެއް ތަނަވަސްކޮށްފަ އެވެ. އެ ޓީމަށް ކުޅެމުން އަންނަ ޕޮލެންޑުގެ ފޯވާޑް ރޮބާޓް ލެވަންޑޯސްކީ އަދި ޕޯޗުގަލްގެ ޔާއޯ ކަންސޭލޯ އަށް ވަނީ ލަނޑު ޖަހާނެ ފުރުސަތު ލިބިފަ އެވެ. ސޮސިއެޑާޑަށް ލީޑު ނަގައިދޭން އެންމެ ރަނގަޅު ފުރުސަތެއް ލިބުނީ މިކޭލް އޮޔާޒަބަލަށެވެ. މެޗު އެއްވަރު ވާން ދަނިކޮށް، އިތުރު ވަގުތުގައި ބާސެލޯނާ މޮޅު ކޮށްދިނީ ރޮނާލްޑް އަރައުހޯ އެވެ. އޭނާ އެ ލަނޑު ޖެހީ ޖަރުމަނުގެ އިލްކާއީ ގުންޑޮގާން ތަނަވަސްކޮށްދިން ފުރުސަތެއްގަ އެވެ.

މޮޅާއެކު ބާސެލޯނާ ވަނީ ލީގު ތާވަލްގެ ތިން ވަނަ މަގާމަށް ޖެހިލައިފަ އެވެ. އެއީ މިހާތަނަށް ކުޅުނު 12 މެޗުން 27 ޕޮއިންޓު ހޯދައިގެންނެވެ. އެ ޓީމަށް ވުރެ އެއް މެޗު މަދުން ކުޅެގެން، ދެ ވަނައިގައި އޮތް ރެއާލް މެޑްރިޑަށް ލިބެނީ 28 ޕޮއިންޓެވެ. 12 މެޗު ކުޅެގެން އެއް ވަނައިގައި ޖިރޯނާ އަށް ލިބެނީ 31 ޕޮއިންޓެވެ.