ދިވެހިންގެ އެހީގައި، ޚިދުމަތް ޖަމިއްޔާގެ ފަރާތުން ޣާއްޒާގެ 120 ޢާއިލާއަކަށް 24000 ޑޮލަރު ހަދިޔާ ކޮށްފިއެވެ.

މިވަގުތުވެސް ކަރަންޓާއި ސާފުބޯފެނާއި ކާބޯތަކެއްޗާއި ބޭސްފަރުވާއަށް އިންތިހާއަށް ޣާއްޒާގެ ރައްޔިތުންނަށް ވަނީ ބޭނުންވެފައެވެ. އަދި އިންސާނީ އެހީތެރިކަން ފޯރުކޮށްދޭ ޖަމިއްޔާތަކަށް ވަނީ އެހީތެރިކަން ފޯރުކޮށްދިނުމަށްޓަކައި ބޮޑެތި ގޮންޖެހުންތަކާއި ކުރިމަތިލާން ޖެހިފައެވެ.

މިހާރު ހުރި ދަތިތަކާއި އެކުގައިވެސް ޚިދުމަތް ދިވެހިންގެ އެހީގައި ޚިދުމަތް ޖަމިއްޔާ އިން ދަނީ ތަފާތު އެހީތައް ޣާއްޒާގެ ރައްޔިތުންނަށް ފޯރުކޮށްދެމުންކަމަށް އެ ޖަމިއްޔާއިން ވަނީ ބުނެފައެވެ. އަދި މިހާތަނަށް އައި އިރު މިދާދް ފަލަސްޠީނާއި ގުޅިގެން ޣާއްޒާގެ 120 ޢާއިލަކަށް ވަނީ 24000 ޑޮލަރު ހަދިޔާ ކޮށްފަވާ ކަމަށް އެ ޖަމިއްޔާއިން ބުނެއެވެ. އަދި މީގެ ކުރިންވެސް ޚިދުމަތް ޖަމިއްޔާއިން ވަނީ ތުރުކީގެޗާންސޫޔޫ އާއި ގުޅިގެން ޣާއްޒާގެ ބައެއް ޢާއިލާތަކަށް ހޮޓްމީލް ޕެކް ފޯރުކޮށްދީފަ ކަމަށާއި މިދާދު ފަލަސްޠީނާއި އެކުގައިވެސް ޣާއްޒާގައި ޞިއްޚީ މަސައްކަތް ކުރަމުންދާ ފަރާތްތަކަށްވެސް ވަނީ ފައިސާގެ އެހީތެރިކަން ފޯރުކޮށްދީފައެވެ.

ދިވެހިންގެ ދީލަތި އެހީ އަމާނާތްތެރިކަމާއިއެކު އޭގެ ހައްޤުވެރި ފަރާތްތަކަށް ފޯރުކޮށްދިނުމަށް މަސައްކަތް ކުރާ ކަމަށް ޚިދުމަތް ޖަމިއްޔާގެ ތަރުޖަމާނު އަހްމަދު ފަޔާޒް ވިދާޅުވިއެވެ.