އަނެއްކާވެސް ޖަލަބިއްޔާ ކޭމްޕަށް ބޮން އަޅައިފި، ޔޫއެންގެ ސްކޫލެއްވެސް ހިމެނޭ
މި ހަމަލާގައި މަދުވެގެން 20 މީހުން ޝަހީދުކޮށްފައިވޭ
އިސްރާއީލުގެ ހަމަލާތަކާ ގުޅިގެން ޣައްޒާގެ ރައްޔިތުން ގެދޮރު ދޫކޫރަނީ
ޔަހޫދީ ޒަޔަނިސްޓުން އުފައްދައިގެން އުޅޭ އިސްރާއީލޭ ކިޔުނު ދައުލަތުން، އެންމެ ހަފުތާއެއްގެ ތެރޭގައި ތިންވަނަ ފަހަރަށް ޣައްޒާގެ ޖަބަލިއްޔާ ރެފިއުޖީ ކޭމްޕަށް ބޮން އަޅައިފިއެވެ.
ބޭރުގެ ނޫސްތަކުން ރިޕޯޓުކޮށްފައިވާ ގޮތުގައި، ހޮނިހިރު ދުވަހުގެ ރޭ އިސްރާއީލުން ޣައްޒާގެ ރެފިއުޖީ ކޭމްޕަށް ހަމަލާދީ، ވަނީ މަދުވެގެން 20 މީހުން ޝަހީދުކޮށްލާފައެވެ. އެހެން ނަމަވެސް އެ އަދަދު އެއަށްވުރެ އިތުރުވާނެ ކަމަށް ބޭރުގެ ނޫސްތަކުން ރިޕޯޓުކޮށްފައި ވެއެވެ.
މި ނިރުބަވެރި ހަމަލާގެ މައުލޫމާތު ދެމުން، އަލްޖަޒީރާއިން ރިޕޯޓުކޮށްފައިވާ ގޮތުގައި، ޖަލަބިއްޔާ ރެފިއުޖީ ކޭމްޕުގައި ހުރި އދ.ގެ ސްކޫލަކަށްވެސް އިސްރާއީލުން ވަނީ ހަމަލާދީފައެވެ. އ.ދގެ އަލްފާޚޫރާ ސްކޫލަކީ އެތައް ސަތޭކަ ފަލަސްތީނުގެ ރައްޔިތުން ހިޔާވަހިކަން ހޯދަމުންދިޔަ ތަނެކެވެ.
މި ހަމަލާގެ ސަބަބުން ގަތަރާއި ތުރުކީން ވަނީ އެ ހަމަލާ ހަރުކަށި އިބާރާތުން ކުށްވެރިކޮށްފައެވެ.
މީގެ އިތުރުންވެސް، ހޮނިހިރު ދުވަހުގެ ރޭ އިސްރާއީލުން ވަނީ ޣައްޒާގެ އައްނަސްރު ހޮސްޕިޓަލުގެ ދޮރުމައްޗަށާއި، ދެކުނު ޣައްޒާގައި ހުރި ދެ މިސްކިތަކަށްވެސް ބޮންއަޅާފައެވެ.
