ޖަރުމަނު ލީގުގެ ބަޔާން މިއުނިކްގެ ކޯޗުކަމުގެ މަގާމުން އިސްތިއުފާ ދޭން ޖެހޭ އެއްވެސް ސަބަބެއް ނެތް ކަމަށް އެ ޓީމުގެ ކޯޗު ތޯމަސް ޓުޗެލް ބުނެފި އެވެ.
ޓުޗެލް މިހެން ބުނީ ޖަރުމަނު ކަޕުގައި ތިން ވަނަ ޑިވިޝަންގެ ސާބުރުއެކަން އަތުން ބަލިވެ، ބަޔާން ކެޓުމާއެކު ކުރިމަތިވަމުން އަންނަ ފާޑު ކިޔުންތަކަށް ރައްދު ދެމުންނެވެ. ޓުޗެލް ބުނީ އިސްތިއުފާ އަކީ ކުރިމަތީގައި އޮތް ކަމެއް ނޫން ކަމަށާއި، ސަބަބަކީ އޭނޭ އިސްތިއުފާ ދޭން ޖެހޭ އެއްވެސް ސަބަބެއް ނެތުމުން ކަމަށެވެ. ޓުޗެލް ބުނީ އެ މެޗުގެ ނަތީޖާ އާއެކު އެންމެން ވެސް ތިބީ ވަރަށް ބޮޑަށް މާޔޫސްވެ، ހަމަހިމޭންވެފައި ކަމަށެވެ. ޓުޗެލް ފާހަގަ ކުރި ގޮތުގައި ޓީމުގެ އެއްވެސް އޮފިޝަލަކު އަދި ކުޅުންތެރިޔަކު ވެސް ހަޅޭ ލަވާފައި ނެތުމަކީ އޭނާ އަށް އޮތް ހިތްހަމަ ޖެހުމެކެވެ. އެގޮތުން އެއްވެސް މީހަކު، އަނެކާ ކުށްވެރި ކުރުމެއް ނެތް ކަމަށް ވެސް އޭނާ ބުންޏެވެ. ޓުޗެލް ބުނީ ޖަރުމަނު ކަޕް ކާމިޔާބު ކުރުމަކީ ބަޔާންގެ ވަރަށް ބޮޑު އަމާޒަކަށްވި ކަމަށާއި، ނަމަވެސް ސީޒަން ކުރީކޮޅު ކަޕުން ކެޓި ނަމަވެސް، މިހާރު އެކަން ހަޖަމު ކުރަން ޖެހޭ ކަމަށެވެ.
މީގެ އިތުރުން ޓުޗެލް ބުނީ މުބާރާތަކުން ކެޓުމަކީ ނުވަތަ ވަކިވާން ޖެހުމަކީ ފިލުވާލަން އުނދަގޫ ވޭނެއް ކަމަށެވެ. ނަމަވެސް އެކަމުގައި ތާއަބަދު ދެމި ތިބެން ޖެހޭނެ ސަބަބެއް އޮތް ކަމަށް ވެސް ޓުޗެލް ޤަބޫލެއް ނުކުރެ އެވެ. އޭނާ ދެކޭ ގޮތުގައި އެކަކު އަނެކަކު ކުށްވެރިކުރުމުގެ ބަދަލުގައި، އެންމެން ގުޅިގެން ކުރިއަށް ހުރި މުބާރާތްތަކަށް މަސައްކަތް ކުރަން ޖެހެ އެވެ. ޖަރުމަނު ލީގުގަައި ބޮރޫޝިއާ ޑޯޓްމަންޑާ ދެކޮޅަށް ރަށުން ބޭރުގައި ކުޅެނީ މިހާރު ކުރިމަތިވެފައިވާ ހުރިހާ ގޮން ޖެހުންތަކާ ދެކޮޅަށް މެޗު ކާމިޔާބު ކުރަން ކަމަށް ވެސް އޭނާ ވަނީ ބުނެފަ އެވެ.
އެ މެޗަށް ނިކުންނައިރު ބަޔާން އޮތީ ލީގު ތާވަލްގެ ދެ ވަނައިގައި 23 ޕޮއިންޓާއެކު އެވެ. ޑޯޓްމަންޑު އޮތީ 21 ޕޮއިންޓާއެކު ހަތަރު ވަނައިގަ އެވެ. އެހެންކަމުން މިއީ ލީގު ތާވަލްގެ އެއް ވަނަ އަށް ޖެހިލަން ބަޔާނަށް މުހިންމު މެޗަކަށްވާއިރު، ބަޔާނަށް ވުރެ ކުރިއަށް ޖެހިލަން ޑޯޓްމަންޑަށް ވެސް މި މެޗު ވަރަށް މުހިންމުވެ އެވެ.
