އިނގިރޭސި ޕްރެމިއާ ލީގުގައި ފުރަތަމަ ފަހަރަށް ރެފްރީކަން ކުރަން އަންހެން ރެފްރީ ރެބެކާ ވެލްޗް ތައްޔާރުވެއްޖެ އެވެ.
ލީގުގައި މާދަމާ ފުލަމްގެ ދަނޑުގައި މެންޗެސްޓާ ޔުނައިޓެޑާ ވާދަކުރާ މެޗުގައި ވެލްޗް ހުންނާނީ ހަތަރުވަނަ އޮފިޝަލަކަށެވެ. މިއީ ދުނިޔޭގެ އެންމެ ގިނަ ބަޔަކު ބަލާ ލީގުގެ ހަތަރުވަނަ އޮފިޝަލެއްގެ ގޮތުން އަންހެނަކަށް ފުރުސަތުދިން ފުރަތަމަ ފަހަރެވެ.
ވެލްޗަށް މި އަހަރަކީ ރެފްރީކަމުގައި ވަރަށް ކާމިޔާބު އަހަރެކެވެ. ޖެނުއަރީގައި އިނގިރޭސި ޗެމްޕިއަންޝިޕުގައި ޕްރެސްޓަން އާއި ބާމިންހަމް ބައްދަލުކުރި މެޗުގައި ރެފްރީކަން ކުރުމުން އޭނާވީ ޗެމްޕިއަންޝިޕުގައި ރެފްރީކަން ކުރި ފުރަތަމަ އަންހެން ރެފްރީއަށެވެ.
އޭނާ ވަނީ އޮސްޓްރޭލިޔާ އާއި ނިއުޒީލޭންޑްގައި އަހަރުގެ މެދުތެރޭގައި ނިމިގެންދިޔަ އަންހެނުންގެ ވޯލްޑްކަޕުގައި ތިން މެޗެއްގައި ރެފްރީކަންކޮށްފަ އެވެ.
ވެލްޗް ވަނީ އަންހެނުންގެ އެފްއޭކަޕް ފައިނަލުގައި 2017 ވަނަ އަހަރާއި 2020ގައި ރެފްރީކަންކޮށްފަ އެވެ. އަދި އޭނާ ވަނީ ޔޫއޭފާ އެލީޓް ކެޓަގަރީއަށް ނޮމިނޭޓްވެފަ އެވެ. އޭނާ ރެފްރީކަން ކުރަން ފެށީ ނެޝަނަލް ހެލްތު ސާވިސްގެ އެޑްމިނިއްޓްރޭޓަރެއްގެ ވަޒީފާ ދޫކޮށްލުމަށްފަހު އެވެ.
