ޣައްޒާގެ އަލް ޝާޓީ ރެފިއުޖީ ކޭމްޕްގައި ގެދޮރު ގެއްލިފައިވާ މީހުންގެ ހިޔާއެއްގެ ގޮތުގައި ބޭނުންކުރަމުން އަންނަ އދ.ގެ ސްކޫލަކަށް އިސްރާއީލުން ދިން ވައިގެ ހަމަލާއެއް އަމާޒުކޮށްފައިވާ ކަމަށް ފަލަސްތީނުގެ މަސްދަރުތަކުން ބުނެފި އެވެ.
ޔުނައިޓެޑް ނޭޝަންސް ރިލީފް އެންޑް ވޯކްސް އެޖެންސީ (ޔޫއެންއާރްޑަބްލިއުއޭ) އިން ހިންގާ އެ ސްކޫލަށް ހަމަލާދީފައި މިވަނީ މީގެ ކުރިން އެ ސްކޫލުގެ ވަށައިގެންވާ ސަރަހައްދުތަކަށް ދިން އޮޕަރޭޝަނެއްގައި ފަލަސްތީނުގެ ފަސް މީހަކު ޝަހީދުވެފައިވާ ދަނޑިވަޅެއްގައެވެ. އިސްރާއީލުން ޣައްޒާއަށް ބޮން އެޅުމުގެ މަސައްކަތް ކުރިއަށްދާއިރު އެތައް ހާސް ބަޔަކު ވަނީ އަލްޝާތީގައި ހިމާޔަތް ހޯދާފައެވެ.
އިސްރާއީލުން ދިން ބޮމުގެ ހަމަލާތަކުގައި ފަލަސްތީނުގެ 50،000 އަށް ވުރެ ގިނަ މީހުން ގެދޮރު ދޫކޮށް ދާން މަޖުބޫރުވެފައިވާ މީހުންނަށް އިމަޖެންސީ ބޯހިޔާވަހިކަން ފޯރުކޮށްދިނުމަށް ޔޫއެންއާރްޑަބްލިއުއޭ އިން ވަނީ ޣައްޒާގެ އެކި ސަރަހައްދުތަކުގައި ގިނަ އަދަދެއްގެ ސްކޫލްތައް ހުޅުވައިފަ އެވެ.
ބުރާސްފަތި ދުވަހު ދިން ހަމަލާއަކީ އަކީ އާންމުން ދިރިއުޅޭ އދ.ގެ ސްކޫލްތަކަށް ދިން އެންމެ ފަހުގެ ހަމަލާއެވެ. މިހަފުތާގެ ކުރީކޮޅު އދއިން ބުނެފައިވަނީ އިޒްރޭލުން ދިން ހަމަލާތަކުގައި ތިން ސްކޫލަކަށް ގެއްލުން ވެފައިވާ ކަމަށެވެ.
މަދަނީ އުމްރާނީ ވަސީލަތްތަކަށް ހަމަލާތައް އަމާޒުކުރުމަކީ ހަނގުރާމައިގެ ޖަރީމާތަކަކަށް ވެދާނެ ކަމުގެ އިންޒާރު އިންސާނީ ހައްގުތަކަށް މަސައްކަތްކުރާ ޖަމާއަތްތަކުން ވަނީ ދީފަ އެވެ. ނަމަވެސް އިސްރާއީލުން ބުނަނީ ފަލަސްތީނުގެ ހަނގުރާމަވެރިން ސްކޫލްތަކާއި ހޮސްޕިޓަލްތައް ބޭނުންކޮށްގެން ހަމަލާތައް ދޭ ކަމަށެވެ.
ހަނގުރާމަ ހުއްޓާލުމުގެ މަސައްކަތްތައް ހުއްޓުމަކަށް އައިސްފައިވާއިރު، އަލް ޝާޓީ ސްކޫލަށް ދިން ހަމަލާއިން ދޭހަވަނީ ހަމަނުޖެހުންތަކުން ސަލާމަތްވާން މަސައްކަތްކުރާ ޣައްޒާގެ ރައްޔިތުންނަށް ރައްކާތެރި ތަނެއް ނެތްކަމެވެ. ޣައްޒާގެ އުމްރާނީ ވަސީލަތްތައް ހަލާކުވެފައިވާއިރު، އދ.ގެ ވަސީލަތްތަކަކީ ބާކީ ހުރި މަދު ހިޔާތަކުގެ ތެރޭގައި ހިމެނޭ ތަންތަނެވެ.
