އަންނަ ޖަނަވަރީ ޓްރާންސްފާ މާކެޓުގައި ބަޔާން މިއުނިކުން އައު ކުޅުންތެރިން ހޯދާނެ ކަމަށް އެ ޓީމުގެ ކޯޗު ތޯމަސް ޓުޗެލް ބުނެފި އެވެ.
ޓުޗެލް މިހެން ބުނީ ބަޔާނުން އެ ޓީމުގެ ސްކޮޑު ވަރުގަދަ ކުރުމަށް ކުރަމުން އަންނަ މަސައްކަތާ ގުޅިގެން ވާހަކަ ދައްކަމުންނެވެ. ޓުޗެލް ބުނީ، އައު ކުޅުންތެރިން ހޯދުމުގެ މަސައްކަތް ބަޔާނުން ކުރަމުން އަންނަ ކަމަށާއި، އެކަމުގެ މަޝްވަރާތައް ދަނީ ކުރެވެމުން ކަމަށެވެ. އޭނާ ބުނީ ބައިނަލްއަޤުވާމީ ބްރޭކުގެ ސަބަބުން، ވަކި މުއްދަތަކަށް ބައެއް ކުޅުންތެރިން ޓީމާ ދުރަށް ދާން ޖެހޭނެ ކަމަށެވެ. އެހެންކަމުން އެއީ ބަޔާނުން ވަރަށް ބޮޑަށް ވިސްނަން ޖެހޭ، އަދި ވިސްނަމުންދާ ކަމެއް ކަމަށް ވެސް ޓުޗެލް ވަނީ ބުނެފަ އެވެ.
އިތުރަށް އޭނާ ބުނީ، ބަޔާނުން ކުޅުންތެރިން ހޯދާނީ އެންމެ ބޭނުންވާ މަގާމުތަަކަށް ކަމަށެވެ. އަދި އެ ކުޅުންތެރިންނަކީ އެ މަގާމުތަކަށް ކުޅެން އެންމެ އެކަށީގެންވާ ކުޅުންތެރިންނަށް ވާނެ ކަމަށް ވެސް ޓުޗެލް ވަނީ ބުނެފަ އެވެ. އިތުރަށް ވާހަކަ ދައްކަމުން އޭނާ ބުނީ، ބަޔާންގައި މިވަގުތު ވެސް ތިބީ މޮޅެތި ކުޅުންތެރިން ކަމަށާއި، ނަމަވެސް އެކި ފަހަރު ޙާލަތު އޮންނާނީ އެކި ގޮތަށް ކަމަށެވެ.
ބަޔާނާ ހަވާލުވެ މިހާތަނަށް ކުރެވުނު މަސައްކަތަށް ބަލާއިރު، ބަޔާންގައި ތިބި ކޮންމެ ކުޅުންތެރިޔަކީ ވެސް މޮޅު ކުޅުންތެރިން ކަމަށް އޭނާ ދެކެ އެވެ. ޓުޗެލް ބުނީ ކޮންމެ ކުޅުންތެރިޔަކު ވެސް ފަރިތަކުރުމުގައި ވަރަށް ރަނގަޅަށް މަސައްކަތް ކުރަމުން އަންނަ ކަމަށާއި، ކުޅުންތެރިންނާ އޭނާއާ ދެމެދު އޮތީ ވަރަށް ގާތް އަދި ބަދަހި ގުޅުމެއް ކަމަށެވެ. ޓުޗެލް ދެކޭ ގޮތުގައި ބަޔާނުން އޭނާ އަށް ހަވާލު ކުރި މަސައްކަތް އޭނާ އަށް އެންމެ ފުރިހަމަ އަށް އަދާ ކުރެވޭނެ އެވެ.
ބަޔާނުން މިހާރު ތައްޔާރުވަމުން އަންނަނީ ޖަރުމަނު ކަޕްގައި ބުދަ ދުވަހުގެ ރޭ ކުޅޭ މެޗަށެވެ.
