އިންޓަ ސްކޫލް ވޮލީ މުބާރާތް: 14 އަހަރުން ދަށުގެ ފިރިހެން ތަށި ފ.އަތޮޅު މަދަރުސާ އިން ދިފާއުކޮށްފި

އިންޓަ ސްކޫލް ވޮލީ ބޯޅަ މުބާރާތުގެ 14 އަހަރުން ދަށުގެ ފިރިހެން ބައިގެ ޗެމްޕިއަންކަން، އެންމެ ފަހުގެ ޗެމްޕިއަން ފ.އަތޮޅު މަދަރުސާ އިން ދިފާއު ކޮށްފި އެވެ.

މީގެ ކުރިން 2019 ވަނަ އަހަރު އޮތް އިންޓަ ސްކޫލް ވޮލީ ބޯޅަ މުބާރާތުގެ 14 އަހަރުން ދަށުގެ ޗެމްޕިއަންކަން ހޯދީ ވެސް ފ.އަތޮޅު މަދަރުސާ އިންނެވެ. މިއަހަރުގެ މުބާރާތުގެ ފައިނަލްގައި އަންގާރަ ދުވަހުގެ ރޭ ފ.އަތޮޅު މަދަރުސާ ނުކުތީ ކެޔޮދޫ ސްކޫލާ ދެކޮޅަށެވެ. އެ މެޗު އެ ޓީމުން ކާމިޔާބު ކުރީ ސީދާ ތިން ސެޓުންނެވެ. މެޗުގެ ސެޓުތައް ފ.އަތޮޅު މަދަރުސާ އިން ކާމިޔާބު ކުރީ 25-07، 25-19 އަދި 25-15 އިންނެވެ. މުޅި މެޗުގައި ވެސް ފ.އަތޮޅު މަދަރުސާގެ ފަރާތުން ރަނގަޅު ކުޅުމެއް ވަނީ ފެނިފަ އެވެ. ފުރަތަމަ ސެޓާ ޚިލާފަށް ދެ ވަނަ ސެޓާއި، ތިން ވަނަ ސެޓުގައި ކެޔޮދޫ ސްކޫލުން ވެސް ވަނީ ރަނގަޅު ވާދައެއް ކޮށްފަ އެވެ. ނަމަވެސް ފ.އަތޮޅު މަދަރުސާގެ އެޓޭކުތައް ހުއްޓުވުމުގައި އެ ޓީމަށް ވަނީ އުނދަގޫތަކާ ކުރިމަތިލާން ޖެހިފަ އެވެ. ފައިނަލް މެޗުގެ މޮޅު ކުޅުންތެރިޔަކަށް ހޮވުނީ ފ.އަތޮޅު މަދަރުސާގެ އަލޫފް ޢަބްދުﷲ އެވެ.

14 އަހަރުން ދަށުގެ ފިރިހެން ބައިގެ އެންމެ މޮޅު ހަ ކުޅުންތެރިންނަށް ހޮވުނީ ޗެމްޕިއަން ފ.އަތޮޅު މަދަރުސާގެ އަލޫފްގެ އިތުރުން، ޔޫސުފް ޙުސެއިން، އަކުމަލް، އިކާން ޢަބްދުލް ޣައްފާރު، ރަނަރަޕް ކެޔޮދޫގެ އައްމާރު ބިން އަޙުމަދު، މުޙައްމަދު ރައިހާން ރަޝީދު އަދި އާދަމް އާދު އިދުރީސް (ލިބަރޯ) އެެވެ. މި ބައިގެ އެންމެ މޮޅު ކޯޗަކަށް ހޮވުނީ ޗެމްޕިއަން ފ.އަތޮޅު މަދަރުސާގެ އަލީ ޒާހިރު އެވެ.

މުބާރާތުގެ 16 އަހަރުން ދަށާއި، 14 އަހަރުން ދަށުގެ ފަހު ފައިނަލް މެޗުތައް އޮންނާނީ ބުދަ ދުވަހު އެވެ. ބުދަ ދުވަހު ކުރިއަށް ދާނީ 14 އަހަރުން ދަށުގެ އަންހެން ފައިނަލް އަދި 16 އަހަރުން ދަށުގެ އަންހެން އަދި ފިރިހެން ފައިނަލް މެޗުތަކެވެ. އޭގެ ތެރެއިން ދެ ފައިނަލެއްގައި ފ.އަތޮޅު މަދަރުސާ އިން ވާދަކުރާނެ އެވެ. އެއީ 16 އަހަރުން ދަށުގެ އަންހެން އަދި 14 އަހަރުން ދަށުގެ އަންހެން ފައިނަލް އެވެ. 16 އަހަރުން ދަށުގެ ފިރިހެން ފައިނަލްގައި ވާދަކުރާނީ އދ.ކުނބުރުދޫ ސްކޫލް އަދި އދ.އަތޮޅު މަދަރުސާ އެވެ.