އިއްޔެއާއި ރޭ އިސްރާއީލް ޔަހޫދީ ސިފައިން ޣައްޒާއަށް ދިން ހަމަލާތަކުގައި ހަމާސްގެ އިސް ކޮމާންޑަރަކު މަރާލެވިއްޖެކަމަށް އިސްރާއީލުން ބުނެފިއެވެ.
އިސްރާއީލުގެ އަސްކަރިއްޔާއިން ބުދަ ދުވަހު ކުރި އިއުލާނެއްގައި ބުނެފައިވަނީ ދާދި ފަހުން ޣައްޒާއަށް ދިން ވައިގެ ހަމަލާތަކުގައި ހަމާސްގެ އިސް ކޮމާންޑަރެއް މަރާލާފައިވާ ކަމަށެވެ. އެކްސްގައި ނެރުނު ބަޔާނެއްގައި ބުނެފައިވަނީ ހަމާސްގެ ބެއިޓް ލަހިއާ ބެޓަލިއަންގެ ކޮމާންޑަރު ނަސީމް އަބޫ އަޖިނާ އަށް އަމާޒުކޮށް ހަމަލާދީ މަރާލާފައިވާ ކަމަށެވެ.
އިސްރާއީލުން ތުހުމަތު ކުރާ ގޮތުގައި އަބޫ އަޖިނާ ވަނީ މިދިޔަ އޮކްޓޯބަރު މަހުގެ ހަތް ވަނަ ދުވަހު ހަމާސްއިން އިސްރާއީލަށް ދިން ބޮޑު ހަމަލާގައި އެހީތެރިވެދީފަ އެވެ. އޭނާ އަކީ މީގެ ކުރިން ހަމާސްގެ ވައިގެ އަސްކަރިއްޔާގެ ޕްރޮގްރާމުގައި އިސްކޮށް ހުންނެވި ބޭފުޅެއް ކަމަށާއި ހަނގުރާމަވެރި ޖަމާއަތަށް ޑްރޯން އާއި ޕެރަގްލައިޑަރު އުފެއްދުމުގައި އެހީތެރިވެދެއްވި ކަމަށް އިސްރާއީލުން ބުންޏެވެ.
މިއީ ޣައްޒާގައި ހަމާސްގެ ލީޑާޝިޕާއި އިންފްރާސްޓްރަކްޗާއަށް އަމާޒުކޮށް އިސްރާއީލުން ކުރިއަށް ގެންދާ ބޮމުގެ ހަމަލާތަކުގެ ތެރެއިން ދިން ހަމަލާއެކެވެ. އޮކްޓޯބަރު 7 ވަނަދުވަހުން ފެށިގެން ހިނގަމުންދާ ހަމަނުޖެހުންތަކުގައި ހަމާސްގެ 200 އަށް ވުރެ ގިނަ ސިފައިން މަރުވެފައިވާ ކަމަށް އިސްރާއީލުން ބުނެއެވެ.
ކޮމާންޑަރުންނާއި ހަނގުރާމަވެރިން ގެއްލުނުކަން ހަމާސް އިން ވެސް ވަނީ ކަށަވަރުކޮށްދީފައެވެ. ނަމަވެސް އިސްރާއީލުން ދިން ހަމަލާތަކުގައި ޝަހީދުވީ ހަމާސްގެ ކިތައް ލީޑަރުންކަމެއް ނުބުނެއެވެ. އިސްރާއިލްގެ ހަމަލާތަކުގައި ޣައްޒާއިން މަރުވި ޢާއްމުންގެ އަދަދުވަނީ 8000ން މައްޗަށް އަރާފައެވެ.
އިސްރާއީލުން ބުނަމުން ދަނީ ހަމާސްގެ ރޮކެޓް ހަމަލާތަކުގައި އިސްރާއީލުގެ 1400 އަށް ވުރެ ގިނަ މީހުން މަރުވެފައިވާތީ އަމިއްލަ ދިފާއުގައި މަސައްކަތް ކުރުމުގެ ހައްގުގެ ބޭނުން ކުރަމުން އަންނަ ކަމަށެވެ. ނަމަވެސް އިންސާނީ ހައްގުތަކަށް މަސައްކަތްކުރާ ޖަމާއަތްތަކުން ބުނަނީ އިސްރާއީލުން އާބާދީ ބޮޑު ޣައްޒާއަށް ވައިގެ ހަމަލާތައް އެކަށީގެންވާ ހާލަތަށްވުރެ ބާރު މިނުގައި ކަމަށެވެ.
އދ. އިންނާއި، ބައިނަލް އަޤުވާމީ މުޖުތަމައުން ކުރަމުންދާ ހަނގުރާމަ ހުއްޓާލުމުގެ މަސައްކަތަށް އެއްވެސް ކުރިއެރުމެއް ނުލިބި އޮތުމާއެކު، މީހުން މަރުވާ މިންވަރު އިތުރުވަމުންދާއިރު، ދެބަސްވުންތައް ދަނީ ހިނގަމުންނެވެ. ހަމާސްގެ ލީޑަރުން މަރަމުންދާކަމަށް އިސްރާއީލުން ބުނަމުން އަންނައިރު، ފަލަސްތީނުގެ ޢާއްމު ރައްޔިތުން ޝަހީދުކުރަމުންދާތީ ގިނަބައެއްގެ ފާޑުކިޔުން އިސްރާއީލަށް ވަނީ ރައްދުވެފައެވެ.
