ޣައްޒާއަށް ދެމުންދާ ލާއިންސާނީ ހަމަލާތައް ހުއްޓާލުމުގެ އައު ގަރާރެއް އދ.ގެ ސަލާމަތީ މަޖިލީހުގައި ޑްރާފްޓް ކުރަން ފަށައިފި އެވެ.
ނަމަވެސް އެމެރިކާގެ ތާއީދު ހޯދުމަކީ އަދިވެސް މިކަމަށް އޮތް ގޮންޖެހުމެކެވެ.
އދ.ގެ ހެޑްކުއާޓާސްއިން މައުލޫމާތުދެމުން އަލްޖަޒީރާގެ ނޫސްވެރިޔާ ކްރިސްޓެން ސަލޫމީ ބުނީ މިއީ މި ދަނޑިވަޅުގައި ކައުންސިލުން ކުރާ މިފަދަ ފަސް ވަނަ މަސައްކަތް ކަމަށެވެ. ޣައްޒާގައި މަދަނީ ހަމަނުޖެހުންތަކެއް އުފެދިދާނެ ކަމުގެ އިންޒާރުތައް ކަމާބެހޭ ފަރާތްތަކުން ދެމުން ދާއިރު މިފަދަ ފިޔަވަޅުތައް އެޅުމުގެ މުހިންމުކަން ދަނީ އިތުރުވަމުންނެވެ.
ކައުންސިލްގެ ހުރިހާ މެންބަރުން މިޤަރާރަށް ތާއީދު ކުރައްވާއިރު، މިދިޔަ ހަފުތާގައި އެސެމްބްލީއިން ގޮވާލި ގޮވާލުމާ ދެކޮޅު ހަދަނީ ހަމައެކަނި އެމެރިކާ އެވެ. މިފަދަ ޤަރާރެއް ފާސްކުރުމުގެ ބަދަލުގައި ވޮޝިންޓަނުން ބޭނުންވަނީ ހަމާސް ޖަމާއަތުން ރަހީނު ކޮށްފައިވާ އިސްރާއީލްގެ މީހުންގެ ވާހަކަ ދައްކަން އައު ގަރާރެއް ހުށަހެޅުމަށެވެ.
މިވަގުތަށް އެމެރިކާއިން ވަކާލާތު ކުރަނީ ސީދާ ހަނގުރާމަ ހުއްޓާލުމުގެ ބަދަލުގައި އިންސާނީ އެހީތެރިކަން ފޯރުކޮށްދިނުމަށް ކަމަށް އެމެރިކާގެ އދ. މަންދޫބު ބުނެއެވެ. ނަމަވެސް މަރުވާ މީހުންގެ އަދަދު އިތުރުވަމުންދާއިރު، ވަގުތުން ވަގުތަށް ހަމަނުޖެހުން ހުއްޓާލުމަށް ގޮވާލާ އަޑުތައް ދަނީ އިތުރުވަމުންނެވެ.
އޮކްޓޯބަރު މަހުގެ 7 ވަނަދުވަހު ހަމަލާތައް ދޭން ފެށިފަހުން މިހާތަނަށް ފަލަސްތީނުގެ 8،000 އަށް ވުރެ ގިނަ މީހުން ވަނީ ޝަހީދުވެފަ އެވެ.
އަލްޖަޒީރާގެ ނޫސްވެރިޔާ ސަލޫމީ ބުނީ އެންމެ ފަހުގެ ޑްރާފްޓް ވޯޓަށް އެހުމަށް ތައްޔާރުވެފައިވާ ކަމުގެ އެއްވެސް އިޝާރާތެއް އަދި ލިބިފައިނުވާ ކަމަށެވެ. ނަމަވެސް ހަމަނުޖެހުންތައް ހިނގަމުންދާ ކޮންމެ ދުވަހަކާއެކު ހަނގުރާމަ ހުއްޓާލުމަށް ގޮވާލާ އަޑުތައް އދ.ގައި ދަނީ ގަދަވަމުން ކަމަށް އޭނާ ބުނެއެވެ.
އދ.ގައި އެމެރިކާ އިން ފަލަސްތީނާ މެދު ގެންގުޅޭ ވިސްނުން ބަދަލު ކުރުމަކީ އަދިވެސް އުނދަގޫ މަސައްކަތެއް ކަމަށް ބެލެވެ އެވެ. އެކަމަކު ކައުންސިލްގެ އިތުބާރު ބިނާވެފައި އޮންނަނީ ލޭ އޮހޮރުވުން ހުއްޓުވުމަށް އެއްބަސްވުމެއް ހޯދުމުގެ މައްޗަށެވެ.
