އޮކްޓޯބަރ 7ގެ ފަހުން އިސްރާއީލު ސިފައިންގެ 312 މީހުން މަރާލާފައިވޭ: އިސްރާއީލު އަސްކަރިއްޔާ
31 އޮކްޓޯބަރު 2023 | އަންގާރަ 00:26ހަނގުރާމަ ފެށި ފަހުން އިސްރާއީލުން ހިފާފައިވާ ސަރަހައްދުތަކުން 700 ހަމާސް ހަނގުރާމަވެރިން ހައްޔަރުކޮށްފައިވޭ
އިސްރާއީލު ސިފައިން
އޮކްޓޯބަރ މަހުގެ 7 ވަނަ ދުވަހުގެ ފަހުން ދެމުންދާ ހަމަލާތަކުގައި މިހާތަނަށް އިސްރާއީލު ސިފައިންގެ 312 މީހުން މަރުވެފައިވާކަމަށް އިސްރާއީލު އަސްކަރިއްޔާއިން ބުނެފިއެވެ.
އިސްރާއީލު އަސްކަރިއްޔާގެ ސްޕޯކްސްޕާސަން ނެރުނު ބަޔާނެއްގައި ބުނެފައިވަނީ ޣައްޒާގެ ތެރޭގައި އަސީރުންގެ ގޮތުގައި 239 މީހުން ތިބިކަމަށް މިހާތަނަށް ދެނެގަނެވިފައިވާކަމަށެވެ.
އިސްރާއީލުން އަންނަނީ ޣައްޒާއަށް ދެމުންދާ ހަމަލާތައް ވަރުގަދަކޮށް އެއްގަމު މަގުން ޣައްޒާއަށް އެރުމަށް މަސައްކަތްކުރަމުންނެވެ. އިސްރާއީލު އަސްކަރިއްޔާއިން ބުނީ އެއްގަމު މަގުން ޣައްޒާގެ އެތެރެއަށް ވަނުމަށް ކުރާ މަސައްކަތް ފުޅާކޮށްފައިވާކަމަށާއި އިތުރު ސިފައިންނާއި ޓޭންކު ޣައްޒާގެ އެތެރެއަށް މިހާރު ވަދެފައިވާކަމަށެވެ. އިސްރާއީލު އަސްކަރިއްޔާއިން ބުނީ ހަމާސް ގެ ގިނަ ހަނގުރާމަވެރިންތަކެއް ޝަހީދުކޮށްލާފައިވާކަމަށެވެ.
އިސްރާއީލު އަސްކަރިއްޔާއިން އަންނަނީ ޖެނިން ރެފިޔުޖީ ކޭމްޕްގައި ރެއިޑްތައް ހިންގާ ރައްޔިތުން ހައްޔަރުކުރަމުންނެވެ. ހަނގުރާމަ ފެށި ފަހުން އިސްރާއީލުން ހިފާފައިވާ ސަރަހައްދުތަކުން 700 ހަމާސް ހަނގުރާމަވެރިން ހައްޔަރުކޮށްފައިވާކަމަށް އިސްރާއީލު އަސްކަރިއްޔާއިން ބުނެއެވެ. އަދި މަދުވެގެން ހަމާސްގެ ހަނގުރާމަވެރިން ކަމަށް ޝައްކުކުރެވޭ 1070 މީހުން ހައްޔަރުކޮށްފައިވާކަމަށް އިސްރާއީލު އަސްކަރިއްޔާއިން ބުނެއެވެ.
އަނެއްކޮޅުން ހަމާސް އާއި ހިޒްބުﷲ ޖަމާއަތުން ވަނީ އިސްރާއީލަށް އަމާޒުކޮށް ގިނަ ހަމަލާތަކެއް ފޮނުވާފައެވެ. އެގޮތުން ހަނގުރާމަ އައު ފޭސް އަކަށް ގޮސްފައިވާކަމަށް ހިޒްބުﷲ ޖަމާއަތުން ވަނީ ބުނެފައެވެ.
