ރާއްޖޭގެ ކޮންސްޓްރަކްޝަން ދާއިރާ ކުރިއެރުވުމަށް ޚާއްސަ ވުޒާރާއެއް ގާއިމްކުރާނެ ކަމަށް އިންތިޚާބީ ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.

އާދިއްތަ ދުވަހުގެ ރޭ ހޮޓެލް ޖެންގައި ވިޔަފާރިވެރިންނާއެކު ބޭއްވި ބައްދަލުކުރެއްވުމުގައި އިންތިޚާބީ ރައީސް ވިދާޅުވީ ރާއްޖޭގައި ކޮންސްޓްރަކްޝަން ދާއިރާ މުހިންމު ކަމަށާއި، އެ ދާއިރާ ކުރިއެރުވުމަށް މަސައްކަތް ކުރަންޖެހޭ ކަމަށެވެ. އަދި ރާއްޖޭގައި ދެވަނައަށް އެންމެ ބޮޑު ދާއިރާއަކީ ކޮންސްޓްރަކްޝަން ދާއިރާ ކަމަށެވެ.

ކޮންސްޓްރަކްޝަން ދާއިރާ ކުރިއެރުވުމަށް އެކި ސަރުކާރުތަކުން މަސައްކަތްކޮށްފައިވާކަން ފާހަގަކުރައްވައި އިންތިޚާބީ ރައީސް ވިދާޅުވީ އަދިވެސް މިދާއިރާ ކުރިއެރުވުމަށް ކުރެވޭނެ ގިނަ ކަންކަން އެބަހުރި ކަމަށެވެ.

މީގެ އިތުރުން އިންތިޚާބީ ރައީސް ވިދާޅުވީ ރާއްޖޭގައި ބޮޑެތި ދާއިރާއަތަކަށް ވަކި ވުޒާރާތައް ހުންނަ ކަމަށެވެ. އެގޮތުން ޓޫރިޒަމަށް ވަކި ވުޒާރާއެއް، މަސްވެރިކަމަށް ވަކި ވުޒާރާއެއް އަދި ދަނޑުވެރިކަމަށް ވަކި ވުޒާރާއެއް ހުންނަ ކަމަށެވެ. ނަމަވެސް ކޮންސްޓަރަކްޝަން ދާއިރާ އޮންނަނީ އަބަދު ވެސް ކޮންމެ ވެސް ވުޒާރާއެއް ތެރޭގައި ކަމަށެވެ. އަދި މި ދާއިރާ އޮންނަނީ ވަރަށް ބޮޑަށް ފޮރުވިފައި ކަމަށް އިންތިޚާބީ ރައީސް ވިދާޅުވިއެވެ. އެހެންކަމުން އެމަނިކުފާނުގެ ވެރިކަމުގައި ކޮންސްޓްރަކްޝަން ދާއިރާއަށް ޚާއްސަކޮށް ވަކި ވުޒާރާއެއް ގާއިމް ކުރާނެ ކަމަށް އިންތިޚާބީ ރައީސް ވިދާޅުވިއެވެ.

އިންތިޚާބީ ރައީސް ވިދާޅުވީ ވަކި ވުޒާރާއެއް ގާއިމްކުރެވުމުން މަސައްކަތްތައް އިތުރަށް ހަރުދަނާ ކުރެވި، މި ދާއިރާއަށް މިހާރަށް ވުރެ ބޮޑަށް އިސްކަން ދެވޭނެ ކަމަށެވެ. އަދި ވަކި ވުޒާރާއެއް ގާއިމް ކުރުމުން ބޭރުގެ އެހެން ގައުމުތަކުން ހޯދަންޖެހޭ އެހީތައް ހޯދުމުގައި ވެސް ވަރަށް ބޮޑު ތަފާތެއް ފެންނާނެ ކަމަށް ވިދާޅުވިއެވެ.

ކޮންސްޓްރަކްޝަން ދާއިރާ ކުރިއެރުވުމަށް އެ ދާއިރާއަށް ޚާއްސަ ވުޒާރާއެއް ގާއިމްކުރާނެ ކަމަށް އިންތިޚާބީ ރައީސް ވިދާޅުވެފައިވާއިރު، އިމާރާތްކުރުމާއި ރިއަލް އެސްޓޭޓްގެ ދާއިރާގެ އުފެއްދުންތެރިކަން 2022 ވަނަ އަހަރު 23.3 އިންސައްތަ ކުރިއަރާނެކަމަށް 2023 ވަނަ އަހަރުގެ ބަޖެޓު ތައްޔާރުކުރިއިރު އަންދާޒާކުރި ނަމަވެސް، 2022 ވަނަ އަހަރު ނިމުނުއިރު މި ދާއިރާގެ އުފެއްދުންތެރިކަން އިތުރުވެފައިވަނީ 11.8 އިންސައްތައިން ކަމަށް ފިނޭންސް މިނިސްޓްރީން ބުނެފައިވެއެވެ.

މީގެ އިތުރުން މެދުރާސްތާގެ އަންދާޒާތަކަށް ބަލާއިރު 2024 ވަނަ އަހަރުން ފެށިގެން 2026 ވަނަ އަހަރާ ހަމަޔަށް ކޮންމެ އަހަރަކު އެވަރެޖްކޮށް އިމާރާތްކުރުމާއި ރިއަލް އެސްޓޭޓްގެ ދާއިރާގެ އުފެއްދުންތެރިކަން 7.7 އިންސައްތަ ކުރިއަރާނެ ކަމަށް ލަފާކޮށްފައިވެއެވެ.