ޔާމީން މިނިވަންކުރެއްވުމާ ގުޅޭގޮތުން އިންތިޚާބީ ރައީސް ދެއްކެވި ވާހަކަފުޅުތައް މިހާރު އެއްކޮށް ވަނީ ބަދަލުވެފައި
އިންތިޚާބީ ރައީސް ޑރ. މުހައްމަދު މުއިއްޒުއާއި ކުރީގެ ރައީސް އަބްދުﷲ ޔާމީން
އިންތިޚާބީ ރައީސް ޑރ. މުހައްމަދު މުއިއްޒުއަށް މިނިވަންކަމާއެކު ވެރިކަން ކުރެއްވިދާނެ ކަމަށް ގަބޫލުނުކުރެއްވޭ ކަމަށް، ރައްޔިތުން މަޖިލީހުގެ ކުޅުދުއްފުށީ އުތުރު ދާއިރާގެ މެންބަރު ޔާސިރު އަބްދުއްލަތީފް ވިދާޅުވެއްޖެއެވެ.
ރާއްޖެޓީވީގައި ވާހަކަފުޅުދައްކަވަމުން ޔާސިރު ވިދާޅުވީ، އިންތިޚާބީ ރައީސް މުއިއްޒު ވެރިކަމަށް ވަޑައިގެންނެވުމަށް ދެއްކެވި ވާހަކަފުޅުތަކާއި، މިހާރު ދަައްކަވަމުން ގެންދަވާ ވާހަކަފުޅުތައް ބަދަލުވެފައި ވާކަމަށެވެ. އެގޮތުން ޖަލު ހުކުމެއް ތަންފީޒުކުރައްވަމުން ގެންދަވާ ކުރީގެ ރައީސް އަބްދުﷲ ޔާމީން މިނިވަންކުރެއްވުމާ ގުޅޭގޮތުން އިންތިޚާބީ ރައީސް ދެއްކެވި ވާހަކަފުޅުތައް މިހާރު އެއްކޮށް ބަދަލުވެފައިވާކަމަށެވެ.
ޔާސިރު ވިދާޅުވީ، އިންތިޚާބީ ރައީސް މުއިއްޒު ވެރިކަމަށް ވަޑައިގެންނެވީ ޔާމީންގެ އެއްބާރުލުމާއެކު ކަމަށާއި، އެކަމުގައި ޔާމީންގެ ދައުރު ވަރަށް ބޮޑުކަމަށެވެ. ނަމަވެސް އިންތިޚާބުވެވަޑައިގަތުމަށްފަހު ޔާމީން މީހަކަށް ނުހައްދަވައި، ދައްކަވަމުން ގެންދެވި ވާހަކަފުޅުތައް ބަދަލުވުމުން ޕީޕީއެމްގެ އެތެރޭގައި މައްސަލަތައް އުފެމުންދާކަމަށާއި، އެމަންޒަރުތައް ފެނިވަޑައިގަންނަވާ ކަމަށެވެ.
ވެރިކަމާ ހަވާލުވެވަޑައިގަތުމަށްފަހު މިނިވަންކަމާއެކު ގައުމު ހިންގަވާނެ ކަމަށް އިންތިޚާބީ ރައީސް މުއިއްޒު ވިދާޅުވަމުން ގެންދަވާ ބަސްފުޅަށް އިޝާރާތް ކުރައްވައި ޔާސިރު ވިދާޅުވީ، އެގޮތަށް އެކަން ނުހިނގާނެ ކަމަށާއި، މިނިވަންކަމާއެކު ވެރިކަން ކުރެއްވޭނެ ކަަމަށް ގަބޫލުނުކުރެއްވޭ ކަމަށެވެ.
ސިރު ވިދާޅުވީ ސިޔާސީ މަސްރަހުގައި ކަންކަން ހިނގާ ގޮތަށް ބަލާއިރު، އިންތިޚާބީ ރައީސް މުއިއްޒަށް ވެރިކަން ކުރެއްވުމަށް ވަރަށް އުނދަގޫފުޅުވާނެ ކަމަށެވެ.
