ވީއައިއޭގެ މަޝްރޫއު އަންނަ އަހަރުގެ ސެޕްޓެމްބަރަށް ނިންމުމަށް އަމާޒު ހިފައި، ޚާއްސަ ކޮމެޓީއެއް އެކުލަވާލަނީ
ރައީސް އޮފީހުގައި އެކުލަވާލާ މި ކޮމިޓީގެ ޗެއާއަކަށް ހުންނަވާނީ ޑރ.މުއިއްޒު
ވެލާނާ އިންޓަރނޭޝަނަލް އެއަރޕޯޓް
ވެލާނާ އިންޓަނޭޝަނަލް އެއާޕޯޓު (ވީއައިއޭ)ގެ މަސައްކަތް އަވަސް ކުރުމަށް ރައީސް އޮފީހުގައި ވަކި ކޮމިޓީއެއް އެކުލަވައިލާނެ ކަމަށާއި، އަންނަ އަހަރުގެ ސެޕްޓެންބަރު މަހަށް މަޝްރޫއު ނިންމުމަށް މަސައްކަތް ކުރާ ކަމަށް އިންތިޚާބީ ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
އާދިއްތަ ދުވަހުގެ ރޭ ހޮޓެލް ޖެންގައި ވިޔަފާރިވެރިންނާއެކު ބޭއްވެވި ބައްދަލުކުރެއްވުމުގައި އިންތިޚާބީ ރައީސް މުއިއްޒު ވިދާޅުވީ ވީއައިއޭގެ މަޝްރޫއު އަވަސްކުރަންޖެހޭ ކަމަށާއި، އެ މަޝްރޫއު އަވަސް ކުރުމަށް ޚާއްސަ ކޮމެޓީއެއް އެކުލަވާލާނެ ކަމަށެވެ. އަދި ރައީސް އޮފީހުގައި އެކުލަވާލާ މި ކޮމިޓީގެ ޗެއާއަކަށް ހުންނަވާނީ އެމަނިކުފާނު ކަމަށެވެ.
މުއިއްޒު ވިދާޅުވީ މި ކޮމިޓީން ކޮންމެ ދުވަހަކު ވެސް ވީއައިއޭގެ މަސައްކަތް ބަލާނެ ކަމަށާއި، މަޝްރޫއާއި ގުޅިގެން ނަގަންޖެހޭ ފިޔަވަޅުތައް ވަގުތުން ނެގޭނެ އިންތިޒާމެއް ހަމަޖައްސާނެ ކަމަށެވެ. އަދި ކޮމިޓީގައި ކަމާ ބެހޭ ހުރިހާ އިސްވެރިންނާއި ސްޓޭކް ހޯލްޑަރުން ތިއްބަވާނެ ކަމަށެވެ.
ވީއައިއޭ އަކީ ރާއްޖޭގެ ފަތުރުވެރިކަމުގައި ވަރަށް ބޮޑު ހިއްސާއެއް އަދާކުރާތަނެއްކަން ފާހަގަކުރައްވައި އިންތިޚާބީ ރައީސް ވިދާޅުވީ 2025 ޖުލައިގެ ކުރިން މަޝްރޫއު ނިންމަން ބޭނުންވާ ކަމަށެވެ. ލިބިފައިވާ މައުލޫމާތުތަށް ބަލާއިރު، މިމަސައްކަތް މިހާރު ކުރިއަށްދާ ޝެޑިއުލްގެ ދަށުން ނިންމާލެވޭނެކަމަށް ލަފާކޮށްފައިވަނީ 2025 އަހަރުގެ ޖުލައިމަހު ކަމަށް އިންތިޚާބީ ރައީސް ވިދާޅުވިއެވެ.
ނަމަވެސް އެންމެ ލަސްވެގެން އަންނަ އަހަރުގެ ސެޕްޓެމްބަރު މަހަށް މަޝްރޫއު ނިންމުމަށް އަމާޒު ހިފައިވާ ކަމަށް އިންތިޚާބީ ރައީސް ވިދާޅުވިއެވެ.
މީގެ އިތުރުން އެމަނިކުފާނު ވިދާޅުވީ ކުރިއަށް އޮތް ދުވަސްތަކުގައި ގައުމީ އެއާލައިނަށް އައު މަތިންދާ ބޯޓުތަކެއް ގެނައުމަށް އިންވެސްޓްކުރައްވާނެ ކަމަށެވެ. އަދި ރާއްޖެއަށް ފަތުރުވެރިން ގެނައުމަށް ކުރާ މަސައްކަތް ފުޅާކުރައްވާނެ ކަމަށާއި، ޗައިނާ މާކެޓުން ރާއްޖެ އަންނަ ފަތުރުވެރިންގެ އަދަދު އިތުރުކުރުމަކީ އަމާޒެއް ކަމަށެވެ.
ވެލާނާ އިންޓަރނޭޝަނަލް އެއާޕޯޓްގެ ޓާމިނަލްގެ މަސައްކަތް ކުރަމުން ދަނީ ސައުދީ އަރަބިއްޔާގެ، ސައުދީ ބިންލާދިން ގްރޫޕާއި ހަވާލުކޮށްގެންނެވެ. ބިން ލާދިން ގްރޫޕަށް އައު ޓާމިނަލްގެ މަސައްކަތް ހަވާލުކުރީ ގާތްގަނޑަކަށް 5.3 ބިލިއަން ދިވެހި ރުފިޔާއަށެވެ. މީގެ އިތުރުން 16 އޮކްޓޫބަރު 2023 ވީ ހޯމަ ދުވަހު ރާއްޖެއަށް ސައުދީ އަރަބިއްޔާއިން 2.3 ބިލިއަން ރުފިޔާގެ އެހީ ފޯރުކޮށްދިނުމާމެދު ވަނީ މަޝްވަރާކޮށްފައެވެ. އަދި މި 2.3 ބިލިއަން ރުފިޔާގެ ތެރެއިން ވެލާނާ އިންޓަރނޭޝަނަލް އެއާޕޯޓަށް ހޭދަކުރަން ހަމަޖެހިފައިވަނީ 100 މިލިއަން ޑޮލަރު ކަމަށް ފިނޭންސް މިނިސްޓްރީން މައުލޫމާތުދެއެވެ.
