މި ސަރުކާރުން މިހާރު ވަނީ ކޮންސްޓްރަކްޝަން ސިނާއަތް ހަލާކުކޮށްލުމުގެ މަސައްކަތް ފަށާފައި: މެމްބަރު ޝަމްހީދު

މި ސަރުކާރުން ކޮންސްޓްރަކްޝަން ސިނާއަތް ހަލާކުކޮށްލުމުގެ މަސައްކަތް ފަށާފައިވާ ކަމަށް ހުޅުމާލޭ ދެކުނު ދާއިރާގެ މެމްބަރު ޑރ.އަހްމަދު ޝަމްހީދު ވިދާޅުވެއްޖެއެވެ.

ރާއްޖެޓީވީގެ ފަލަސުރުހީ ޕްރޮގްރާމްގައި މެންބަރު ޝަމްހީދު ވިދާޅުވީ މިސަރުކާރު އައިފަހުން ގައުމުގެ ހުރިހާ ވިޔަފާރިތަކެއް ފުނޑެމުންދާ މަންޒަރު ފެންނަ ކަމަށާއި، އެއްވެސް އުންމީދެއް ނެތް ކަމަށެވެ.

އާއްމު ރައްޔިތުންގެ ވިޔަފާރިތަކަށް ސަރުކާރުން ވަންނަކަން ފާހަގަކުރައްވައި މެންބަރު ޝަމްހީދު ވިދާޅުވީ ޓެކްސީ ވިޔަފާރި ހަލާކުކޮށްލައި، މަސްވެރިން ބާނާ މަހުގެ އަގު ވައްޓާލައި، ފަތުރުވެރިކަމުގެ ސިނާއަތުގައި މަސައްކަތް ކުރަމުންދާ ބޭފުޅުންނަށް ދަތިކޮށްފައިވާ ކަމާށެވެ. އަދި ވޭޕް މަނާކުރިއިރު އެވިޔަފާރި ކުރަމުންދިޔަ މީހުންނަށް ވަކި މުއްދަތެއް ވެސް ނުދީ އިދަޖައްސާލި ކަމަށް މެމްބަރު ޝަމްހީދު ވިދާޅުވިއެވެ.

މީގެ އިތުރުން ޝަމްހީދު ވިދާޅުވީ ކޮންސްޓްރަކްޝަން ސިނާއަތަށް ސަރުކާރުން ވަނުމަށް ކުރަންޖެހޭ މަސައްކަތްތައް ކުރަމުންދާ ކަމަށާއި، ކުރިއަށް އޮތްތަނުގައި އަމިއްލަ ކުންފުނިތަކަށް މިމަސައްކަތް ކުރުމަށް ފުރުސަތު ނުލިބޭނެ ކަމަށެވެ. އަދި ޕްރޮޖެކްޓްތައް އެއްކޮށް ހިންގާނީ ސަރުކާރުގެ ކުންފުނިތަކުން ކަމަށް މެމްބަރު ޝަމްހީދު ވިދާޅުވިއެވެ.

މި ފެންނަނީ ޓެކްސީ އެކަންޏެއް ނޫން. އާއްމުންގެ ވިޔަފާރިތައް ސަރުކާރު ވަންނަމުންދާތަން އެޓޭކްކުރާތަން. މީގެ އިތުރުން ވޭޕް ވިޔަފާރި ކުރަމުންދިޔަ ކުދިންތަކަކަށް އެއްވެސް ފުރުސަތެއް ނުދީ ބަދަލެއް ނުދީ ގާނޫނުން އެބޭފުޅުންގެ ވިޔަފާރިތައް ފުނޑާލި. އޭގެފަހުން ޖައްސާލީ މަސްވެރިންނާ. ހަމައެއާއެކު ޓޫރިޒަމް ސެކްޓަރގައި މަސައްކަތް ކުރާ ބޭފުޅުންނާ ވެސް ޖައްސާލީ. މިއަދު ޓެކްސީތަކަށްފަހު މިހާރު ރާއްޖޭގެ ކޮންސްޓްރަކްޝަން އިންޑަސްޓްރީ އެއްކޮށް ހުއްޓާލުމަށް ސަރުކާރުން މިހާރު ނިންމާފައި. ބަންޑާރަ ނައިބުގެ ލަފާ ހޯދައިގެން އަމިއްލަ ފަރާތްތަކުން ހިންގާ ހުރިހާ ޕްރިޖެކްޓެއް ހުއްޓާލާފައި ހަމައެކަނި ސަރުކާރުގެ ކުންފުނިތަކުން ޕްރޮޖެކްޓްތައް ހިންގާ ގޮތަށް. އެއީ މި ސަރުކާރުގެ ސިޔާސަތަކީ.

ހުޅުމާލޭ ދެކުނު ދާއިރާގެ މެމްބަރު ޑރ.އަހްމަދު ޝަމްހީދު

މެމްބަރު ޝަމްހީދު ވިދާޅުވީ އިގްތިސާދު ރަނގަޅަށް ކުރިއެރުވުމަށް ޕްރައިވެޓް ސެކްޓަރގެ ދައުރު ވަރަށް ބޮޑު ކަމަށާއި، އެދާއިރާ ކުރިއެރުވުމަށް ސަރުކާރުން ވެސް މަސައްކަތް ކުރަންޖެހޭ ކަމަށެވެ. ދުނިޔޭގެ އެކިއެކި ގައުމުތަކުގައި އިގްތިސާދު ކުރިއަރައިގެން ގޮސްފައިވަނީ ފްރައިވެޓް ސެކްޓަރގެ ބައިވެރިވުމާއެކު އެ ސެކްޓަރގައި ވަޒީފާތައް އިތުރުވެ ކުރިއެރުމުން ކަމަށް އޭނާ ވިދާޅުވިއެވެ.

ނަމަވެސް މިސަރުކާރުން މަސައްކަތް ކުރަނީ އިގްތިސާދު ކުރިއެރުވުމުގެ ނަމުގައި ޕްރައިވެޓް ސެކްޓަރ ފުނޑާލުމަށް ކަމަށް މެންބަރު ޝަމްހީދު ވިދާޅުވިއެވެ.