ޣައްޒާގެ އަލް ޤުދުސް ހޮސްޕިޓަލްގެ ވަށައިގެންވާ ސަރަހައްދުތަކަށް އިސްރާއީލުން ދިން ބާރުގަދަ ވައިގެ ހަމަލާތަކާއި ބޮމުގެ ހަމަލާތަކުގެ ސަބަބުން މެޑިކަލް ސެންޓަރަށް ސީދާ ހަމަލާނުދިން ނަމަވެސް ގެއްލުންތަކާއި ބިރުވެރިކަން އުފެދިއްޖެއެވެ.

އަލްޤުދުސް ހޮސްޕިޓަލް ކައިރީގައި ދިރިއުޅޭ ޔުމްނާ އެލްސައިދު ބުނި ގޮތުގައި ބޮން ގޮއްވާލި އަޑު އޭނާގެ އަވަށަށް ވަރަށް ބާރަށް އިވިގެން ދިޔައެވެ. އަދި ހޮސްޕިޓަލުގެ ތެރޭގައި ތިބި ބަލި މީހުންގެ މެދުގައި ބިރުވެރިކަން ވަރަށް ބޮޑަށް އުފެދިފައިވާ ކަމަށް އޭނާ ބުނެފައިވެއެވެ.

ހަމަލާތައް ސީދާ އަލްޤުދުސް ހޮސްޕިޓަލަށް ނުދިން ނަމަވެސް ހޮސްޕިޓަލްގެ ޑައިރެކްޓަރު ވިދާޅުވީ އެ ހޮސްޕިޓަލްގެ ވަށައިގެން ބޮން އެޅުމުގެ ސަބަބުން ބަލި މީހުންނަށް ވަރަށް ބޮޑަށްއަސަރު ކޮށްފައިވާ ކަމަށެވެ. އަދި އެމީހުން އެ ހާލަތުގައި ހޮސްޕިޓަލުން  ނެރެން މަސައްކަތްކޮށްފިނަމަ ފުރާނައަށް ގެއްލުން ވެދާނެ ކަމަށެވެ.

އެ ހޮސްޕިޓަލުގައި މިހާރު ވެސް 14،000 އެއްހާ މީހުން ހިޔާވަހިކަން ހޯދަމުން އަންނަ އިރު އޭގެ ތެރޭގައި ބަލި މީހުންނާއި އިންކިއުބޭޓަރު ތަކުގައިތިބި، ދުވަސް ނުފުރާ ވިހޭ ކުދިންނާއި އައިސީޔޫގައި ތިބި މީހުން ހިމެނެ އެވެ. އެމީހުން ބަދަލުކުރުމަކީ އެމީހުންގެ ފުރާނައަށް ނުރައްކާވާނެ ކަމަށް ޑިރެކްޓަރު އަލްޖަޒީރާއަށް ވިދާޅުވިއެވެ.

އިސްރާއީލުން ޣައްޒާގެ އެކި ހިސާބުތަކަށް ވަރުގަދަ ވައިގެ ހަމަލާތަކެއް ދެމުން އަންނައިރު، ހަމާސް އިން ދަނީ ޣައްޒާއަށް އެއްގަމު މަގުން ވަންނަ އުޅަނދުތަކަށް ހަމަލާދޭނެ ކަމުގެ އިންޒާރު ދެމުންނެވެ. ގާތްގަނޑަކަށް ތިން ހަފުތާގެ ހަނގުރާމައަށްފަހު ޣައްޒާގެ މެޑިކަލް އިންފްރާސްޓްރަކްޗަރ ފުނޑުފުނޑުވެފައިވާއިރު، ހޮސްޕިޓަލްތަކަށް ލިބޭ ގެއްލުންތަކަކީ ނުރައްކާތެރިކަން ބޮޑު ގެއްލުންތަކެކެވެ.

އޮކްޓޯބަރު މަހުގެ 7 ވަނަ ދުވަހު ހަނގުރާމަ ފެށި ފަހުން ފަލަސްތީނުގެ 7،500 އަށް ވުރެ ގިނަ މީހުން ޣައްޒާގައި މަރުވެފައިވާތީ ރަނގަޅު ހިމާޔަތެއް ހޯދުމަށް އެދި ވަރަށް ގިނަ ބަޔަކު ދަނީ ހޮސްޕިޓަލްތަކަށް މިސްރާބު ޖަހަމުންނެވެ.