އިސްރާއީލުން ހިފާފައިވާ ހުޅަނގު އައްސޭރީގެ އިގްތިސާދު ހުއްޓުމަކަށް އައިސް މަސައްކަތްތެރިން މަގުމަތިވެއްޖެއެވެ.

އިސްރާއީލުން ޣައްޒާއަށް މިހާރު ދެމުން ގެންދާ ބޮމުގެ ހަމަލާތަކާ ގުޅިގެން އެ ސަރަހައްދުބަންދުކުރުމާއި ހަމަލާތައް ވަރުގަދަކޮށްފައި ވުމުގެ ސަބަބުން ފިހާރަތަކަށް ބޭނުންވާ ސާމާނު މަދުވެ، މަސައްކަތްތެރިން ވަޒީފާ އެއް ނެތި، ސިޓީތަކުގެ މެދުގައި ދަތުރުފަތުރު ކުރުންވެސް މިވަނީ ހުއްޓުމަކަށް އައިސްފަ އެވެ.

ހަލަބޮލިވެފައިވާ ރާމަاللهގެ ސެންޓްރަލް ބަސް ސްޓޭޝަނުގައި ތިބި ޑްރައިވަރުން ބުނަނީ ވިޔަފާރި ފުނޑުފުނޑުވެފައިވާ ކަމަށެވެ. ބޮޑެތި ޗެކްޕޮއިންޓްތައް ބަންދުވެ މަގުތައް ނުރައްކާތެރިވަމުންދާތީ ޓެކްސީތަކާއި ބަސްތަކަށް ވަނީ އެ ސިޓީއަށްވަނުން ބަންދުވެފަ އެވެ.

އާންމުކޮށް ޣައްޒާ އާއި އިޒްރޭލުން އެތެރެކުރާ ބާވަތްތަކުގެ ދަތިކަން ވަނީ ހުޅަނގު އައްސޭރީގެ ފިހާރަތަކަށް، ހާއްސަކޮށް ކުރިމަތިވެފަ އެވެ. އިންވެންޓްރީ ދަށްވުމުން ވިއްކާ މިންވަރު 50 ޕަސެންޓް ދަށަށް ގޮސްފައިވާ ކަމަށް އުފެއްދުންތައް އުފައްދާ ފިހާރައެއް ހިންގާ އިބްރާހިމް އަލް ކިލާނީ ބުނެ އެވެ. މުދާ އުފުލުމުގައި ހުރި ހުރަސްތަކާއެކު ފެކްޓްރީތަކުގެ އުފެއްދުންތައް ވެސް ވަނީ ދަށަށް ގޮސްފަ އެވެ.

އޮކްޓޯބަރު މަހުގެ 7 ވަނަ ދުވަހު ޣައްޒާގެ ހަނގުރާމަފެށުނު ފަހުން އިސްރާއީލާއި އާބާދީތަކުގައި ތިބި ފަލަސްތީނުގެ ގާތްގަނޑަކަށް ދެ ލައްކަ އެއްހާ މަސައްކަތްތެރިންގެ ވަޒީފާ ވަނީ ގެއްލިފަ އެވެ. މުސާރަ ނުލިބި، ގެއްލުނު ވިޔަފާރީގެ ސަބަބުން ފަލަސްތީނުގެ އިގްތިސާދަށް އެތައް ބިލިއަނުން ގެއްލުންވަމުންދާ ކަމަށް އޮފިޝަލުން ބުނެ އެވެ.

އިސްރާއީލު ސިފައިންނާއި ވަޒަންވެރިންގެ ބަންދުތަކާއި ހަމަނުޖެހުންތަކުގެ ސަބަބުން ހުޅަނގު އައްސޭރީގެ ރައްޔިތުން ވަނީ ވިއްސިވިހާލިވެ ނުތަނަވަސް ކަމެއްގެތެރެއަށް ވެއްޓިފަ އެވެ. އިޒްރޭލުގެ ބޮމުގެ ހަމަލާތަކުގައި ފަލަސްތީނުގެ 7700 އަށް ވުރެ ގިނަ ރައްޔިތުން ޝަހީދުވެފައިވާއިރު ޣައްޒާއާ އަޅާބަލާއިރު ރާމަﷲ އަށް އިގްތިސާދީ ގޮތުން ކުރާ ނޭދެވޭ އަސަރުތައް ކުޑަކަމަށް ފާހަގަ ކުރެވުނަސް އެތަންވެސް މިވަނީ ބަނގުރޫޓްވެފައި ކަމަށް އަމިއްލަ ފިހާރައެއްގެ ވެރިޔާ އަލްކިލާނީ ބުންޏެވެ.