ފަހަތުން އަރައި ރެއާލުން ބާސެލޯނާ ބަލިކޮށްފި، ވިދާލީ ބެލިންހަމް

ސްޕެނިޝް ލީގުގައި ބާސެލޯނާއާ ދެކޮޅަށް ކުޅުނު މެޗުން ވާދަވެެރި ރެއާލް މެޑްރިޑު މޮޅުވެއްޖެ އެވެ.

ހޮނިހިރު ދުވަހުގެ ރޭ ކުޅުނު މެޗު ރެއާލުން ކާމިޔާބު ކުރީ ފަހަތުން އަރައި ދެ ލަނޑު ޖަހައިގެން، 2-1 އިންނެވެ. މެޗު ފަށައިގެން ހަ ވަނަ މިނެޓުގައި ބާސެލޯނާ އިން ވަނީ ލަނޑު ޖަހައި ލީޑު ނަގައިފަ އެވެ. އެ ޓީމަށް ލީޑު ނަގައިދިނީ މެންޗެސްޓަރ ސިޓީ ދޫކޮށް ބާސެލޯނާ އަށް ބަދަލުވި ޖަރުމަނުގެ އިލްކާއީ ގުންޑޮގާން އެވެ. މިއީ ބާސެލޯނާ އަށް ބަދަލުވި ފަހުން އެ ކުލަބުގެ ޖާޒީގައި ގުންޑޮގާން ޖެހި ފުރަތަމަ ލަނޑެވެ. އޭނާ ވަނީ މިހާތަނަށް ބާސެލޯނާ އަށް 14 މެޗު ކުޅެދީފަ އެވެ. މެޗުގައި ބާސެލޯނާ އިން ވަނީ އަނިޔާގެ ސަބަބުން ކުޅުމާ ދުރުގައި ހުރި ޕޮލެންޑުގެ ރޮބާޓް ލެވަންޑޯސްކީ އަދި ބްރެޒިލްގެ ރަފީނިއާ ލައްވާ ކުޅުވައިފަ އެވެ. އެ ކުޅުންތެރިންނަށް ފުރުސަތު ދީފައި ވަނީ ބެންޗުންނެވެ.

ލީޑުގައި އޮވެ ބާސެލޯނާ އިން ކުޅެމުން ދަނިކޮށް، މެޗުގެ 68 ވަނަ މިނެޓުގައި ރެއާލުން ވަނީ ލަނޑު ޖަހައި ނަތީޖާ ހަމަހަމަ ކޮށްފަ އެވެ. އެ ލަނޑު އެ ޓީމަށް ޖަހައިދިނީ ބޮރޫޝިއާ ޑޯޓްމަންޑުން ރެއާލަށް ބަދަލުވެ، މޮޅަށް ކުޅެމުން އަންނަ އިންގްލެންޑުގެ ޒުވާން ކުޅުންތެރިޔާ ޖޫޑް ބެލިންހަމް އެވެ. އޭގެ ފަހުން މެޗުގެ ފުރިހަމަ ވަގުތު ހަމަވެ، އިތުރަށް ދެއްކި ވަގުތުގައި ބެލިންހަމް ވަނީ ދެ ވަނަ ލަނޑެއް ޖަހައި މެޗުން ރެއާލް މޮޅު ކޮށްދީފަ އެވެ. މިއީ ރެއާލަށް ބެލިންހަމް ޖަހައިދިން 13 ވަނަ ލަނޑެވެ. އޭގެ ތެރެއިން 10 ލަނޑަކީ ސްޕެނިޝް ލީގުގައި އޭނާ ޖެހި ލަނޑުތަކެވެ. ދެ ވަނަ ލަނޑު ޖަހަން ބެލިންހަމް އަށް ފުރުސަތު ތަނަވަސްކޮށްދިނީ ބަދަލު ކުޅުންތެރިޔެއްގެ ގޮތުގައި ކުޅެން ނިކުތް ކްރޮއޭޝިއާގެ މިޑްފީލްޑަރު ލޫކާ މޮޑްރިޗް އެވެ.

މޮޅާއެކު ރެއާލުން ވަނީ ލީގު ތާވަލްގެ އެއް ވަނަ އަށް ޖެހިލައިފަ އެވެ. އެއީ މިހާތަނަށް ކުޅުނު 11 މެޗުން 28 ޕޮއިންޓު ހޯދައިގެންނެވެ. ހަމަ އެ އަދަދަށް މެޗު ކުޅެގެން ދެ ވަނައިގައި އޮތް ޖިރޯނާ އަށް ވެސް ލިބެނީ 28 ޕޮއިންޓެވެ. ރެއާލް ކުރި ހޯދަނީ ލަނޑުންނެވެ. ރެއާލް އަތުން ބަލިވި ބާސެލޯނާ އޮތީ 24 ޕޮއިންޓާއެކު ތިން ވަނައިގަ އެވެ.