އިސްރާއީލުން ޣައްޒާގެ ބިންގަރާސްތަކަށް އަމާޒުކޮށް ބޮންއަޅަން ފަށައިފި

އިސްރާއީލުން ޣައްޒާގައި ދެމުންދާ ލާއިންސާނީ ހަމަލާތައް އިތުރުކޮށް، ބިންގަރާސްތަކަށް އަމާޒުކޮށް ބޮންއަޅަން ފަށައިފިކަމަށް އަލްޖަޒީރާއިން ރިޕޯޓްކޮށްފިއެވެ.

ފާއިތުވެދިޔަ ދެ ދުވަހު އިސްރާއީލާއި ފަލަސްތީނުގެ ހަނގުރާމަވެރި ޖަމާއަތްތަކާ ދެމެދު ހިނގަމުންދާ ހަމަނުޖެހުންތައް އިތުރަށް ހޫނުވެފައިވާއިރު، އިސްރާއީލުން ވަނީ ޣައްޒާގައި ހުރިކަމަށް ބުނާ ޓަނަލްތަކަށާއި ބިމުގެ އަޑީގައި ހުރި ތަންތަނަށް ބޮން އަޅާފައެވެ.

އިސްރާއީލުގެ އަސްކަރިއްޔާއިން ބުނީ، ޣައްޒާގައި އެއްގަމު ސިފައިން ހިންގަމުންދާ އޮޕަރޭޝަންތައް އިތުރަށް ފުޅާކުރަމުން އަންނަކަމަށާއި، އެކަމުގެ ސަބަބުން ހަމާސްގެ ހަނގުރާމަވެރިންނާއެކު ގިނަ ސަރަހައްދުތަކެއްގައި ކުރިމަތިލުންތައް ހިންގަމުންދާކަމަށެވެ. އިސްރާއީލުން ބުނާ ޓަނަލްތަކަށް އަމާޒުކޮށް ޖެޓްތަކުން ދަނީ ވައިގެ ވަރުގަދަ ހަމަލާތަކެއް ދެމުންނެވެ.

ޣައްޒާއަށް ބޮމުގެ ހަމަލާތަކެއް ދިނުމާއެކު، ބައިނަލްއަގުވާމީ މީޑިއާ ޖަމާއަތްތަކާއި އެހީދޭ އެޖެންސީތަކުން ބުރާސްފަތި ދުވަހުން ފެށިގެން ވަނީ ޣައްޒާއާ މުވާސަލާތީ ގުޅުން ކެނޑިފައެވެ. ޣައްޒާއާ ދުނިޔެއާ ގުޅުން ކެނޑި އެކަހެރިވުމުގެ ސަބަބުން މިހާރުވެސް އިންސާނީ ހަލަތު ވަނީ ވަރަށް ބޮޑަށް ގޯސްވެފައެވެ. 

ފަލަސްތީނުގެ ހަމަނުޖެހުންތައް އިތުރުވެ، ފަލަސްތީނުގެ މިލިއަނަކަށްވުރެ ގިނަ ކުޑަކުދިން "ހަނގުރާމައިގެ ބިރުވެރިކަމެއް" ތަހައްމަލު ކުރަމުންދާކަމުގެ އިންޒާރު "ސޭވް ދަ ޗިލްޑްރަން" އިން ދީފައިވާއިރު، އޮކްޓޯބަރު މަހުގެ ހަތްވަނަ ދުވަހުން ފެށިގެން އިސްރާއީލުން ދިން ހަމަލާތަކުގައި ފަލަސްތީނުގެ 7،300 އަށްވުރެ ގިނަ މީހުން ޝަހީދުވެފައިވާ ކަމަށް ސިއްހީ އޮފިޝަލުން ބުނެއެވެ.

މަރުވި މީހުންގެ އަދަދު އިތުރުވަމުންދާއިރު، އދ.ގެ އާންމު މަޖިލީހުން ވަނީ ވަގުތުން ހަނގުރާމަ ހުއްޓާލުމަށް ގޮވާލައި ގަރާރެއް ފާސްކޮށްފައެވެ. ނަމަވެސް ދެ ފަރާތުން ވެސް މަޝްވަރާތައް ކުރިއަށް ގެންދާއިރު، ހަމަނުޖެހުންތައް ހުއްޓުވުމަށް ކުރި މަސައްކަތަށް މިހާތަނަށް މާ ބޮޑު ކުރިއެރުމެއް ލިބިފައެއް ނުވެއެވެ.

އިސްރާއީލުން ބުނަމުންދަނީ ހަމާސްގެ އަސްކަރީ މުދަލާއި ރޮކެޓް ހަމަލާތަކުގައި އިސްރާއީލުގެ 1،400އަށްވުރެ ގިނަ މީހުން މަރުވެފައިވާތީ، އެކަމުގައި ޝާމިލްވި ހަމާސްގެ ލީޑަރުންނަށް ހަމަލާތައް ދެމުންދާކަމަށެވެ.

އިސްރާއީލުގެ ހަމަލާތައް ޣައްޒާގައި އިތުރުކޮށްފައިވާއިރު، ޚާއްސަކޮށް ބޮމުގެ ހަމަލާތައް އިތުރުވަމުންދާއިރު، އާންމުންގެ މީހުން މަރުވާ ނިސްބަތް މާބޮޑަށް އިތުރުވަމުންދާތީ އިންސާނީ ހައްގުތަކަށް މަސައްކަތްކުރާ ޖަމާއަތްތަކުން ދަނީ އެކަން ކުށްވެރި ކުރަމުންނެވެ.

އިސްރާއީލާއި ހަމާސްއާ ދެމެދު ހަމަލާތައް ވަރުގަދަކުރަމުން ދާއިރު، ކުރިއަށް އޮތް ދުވަސްތަކުގައި މިއަށްވުރެ ވަރުގަދަ ހަނގުރާމަތަކާ ކުރިމަތިލާންޖެހި، ޣައްޒާގެ އާންމުންގެ އިތުރު ބައެއްގެ ފުރާނަ ގެއްލިދާނެކަމުގެ ބިރުވަނީ ބޮޑުވެފައެވެ. ޣައްޒާގައި އިންސާނީ ކުއްލި ނުރައްކަލުގެ ހާލަތު ވަރަށް ބޮޑަށް ގޯސްވެފައިވާއިރު، ހަމަނުޖެހުން ކޮންޓްރޯލްވުމުގެ ފުރުސަތު ކުޑަކަމަށް ބެލެވެއެވެ.