ޓްރާންސިޝަން މަރުހަލާގައި އެއްބާރުލުން ނުލިބޭކަމަށް ބުނާނަމަ، އެއްބާރުލުން ނުލިބޭ މުއައްސަސާގެ ނަން ބުނަންޖެހޭ: މެންބަރު ޔާސިރު
ސަރުކާރުގެ ފުރިހަމަ އެއްބާރުލުން ލިބޭ
ރައްޔިތުން މަޖިލީހުގެ ކުޅުދުއްފުށީ އުތުރު ދާއިރާގެ މެންބަރު، ޔާސިރު އަބްދުއްލަތީފް
ޓްރާންސިޝަން މަރުހަލާގައި އެއްބާރުލުން ނުލިބޭކަމަށް ބުނާނަމަ، އެއްބާރުލުން ނުލިބޭ މުއައްސަސާގެ ނަން ބުނަންޖެހޭކަމަށް ރައްޔިތުން މަޖިލީހުގެ ކުޅުދުއްފުށީ އުތުރު ދާއިރާގެ މެންބަރު ޔާސިރު އަބްދުއްލަތީފް ވިދާޅުވެއްޖެއެވެ.
ރާއްޖެޓީވީގައި ވާހަކަފުޅުދައްކަވަމުން ޔާސިރު ވިދާޅުވީ، ރާއްޖޭގައި ތާރީޚުގައިވެސް ޓްރާންސިޝަން މަރުހަލާއެއްގައި ސަރުކާރަކުން އައު ސަރުކާރަށް މިހައި ފުރިހަމައަށް އެއްބާރުން ދޭ ފުރަތަމަ ފަހަރު ކަމަށެވެ. މާޒީއަށް ބަލާއިރު، މިފަދަ ގޮތަކަށް އެއްބާރުލުން ދީފައިނުވާކަމަށާއި، ނަމަވެސް މިސަރުކާރުގައި އައު ސަރުކާރުގެ މަސައްކަތްތައް ކުރުމަށް އައު އޮފީހެއް ގާއިމްކޮށްފައިވާކަމަށް ޔާސިރު ވިދާޅުވިއެވެ.
ޔާސިރު ވިދާޅުވީ، މަސައްކަތްކުރަނީ އަމާންއޮމާންކަމާއެކު ކަންކަން ކުރިއަށް ގެންދިއުމަށް ކަމަށާއި، ނަމަވެސް ޓްރާންސިޝަން މަރުހަލާގައި ބައެއް މުއައްސަސާތަކުން މައުލޫމާތު ފޯރުކޮށްނުދޭ ކަމަށް ތުހުމަތުކުރާ ކަމަށެވެ. އަދި މައުލޫމާތު ފޯރުކޮށްނުދޭ ކަމަށްވާނަމަ އެ މުއައްސަސާއެއްގެ ނަން ބުނަންޖެހޭ ކަމަށާއި، އެ މުއައްސަސާގެ ނަން ހާމަކުރުމާއެކު، ބޭނުންވާ މައުލޫމާތު ހޯދުމަށް އެމްޑީޕީގެ މެންބަރުންވެސް އެމަސައްކަތް ކުރާނެ ކަމަށެވެ.
ލިޔެކިއުންތައް ނައްތާލާކަމަށް ބުނެ ކުރާ ތުހުމަތުތަކަށް ރައްދުދެއްވައި ޔާސިރު ވިދާޅުވީ، ބައެއް ބޭފުޅުން މައުލޫމާތު އޮޅޭ ގޮތަށް ވާހަކަދައްކަވަނީ ސިޔާސީގޮތުން ވަކި ކަމެއް ހާސިލްކުރެއްވުމަށް ކަމަށެވެ. ލިޔެކިއުންތަކެއް ނައްތާލާކަމަށް ބުނެ ދައުރުވަމުންދާ ވީޑިއޯއަށް ބަލައިލުމުން ވެސް، އެއީ ވަރަށް ދުވަސްވީ ލިޔުންތަކެއްކަން އެނގޭކަމަށާއި، ސަރުކާރުގެ މުއައްސަސާތަކުން ދޭތެރެދޭތެރެއިން އެހެން ހުންނަ ބަންޑަލްތައް ނައްތާލާކަމަށް ޔާސިރު ވިދާޅުވިއެވެ. އަދި ވިދާޅުވީ މުހިންމު ލިޔެކިއުންތައް އެހެން ނައްތާނުލާނެ ކަމަށާއި، އެކަމަށް ވަކި ޚާއްސަ އުސޫލުތަކެއް އޮންނަ ކަމަށެވެ.
