ސްޕެނިޝް ލީގުގައި ރެއާލް މެޑްރިޑާ ދެކޮޅަށް ކުޅޭ މެޗުގައި ބާސެލޯނާގެ މުހިންމު ކުޅުންތެރިންނަށް ކުޅެވޭނެ ކަމުގެ އުންމީދު ބޮޑު ކަމަށް އެ ޓީމުގެ ކޯޗު ޒަވީ ހެނާންޑޭޒް ބުނެފި އެވެ.

ޒަވީ މިހެން ބުނީ ރެއާލް މެޗުގެ ކުރިން އޮތް ޕްރެސް ކޮންފަރެންސްގައި ވާހަކަ ދައްކަމުންނެވެ. އަނިޔާގެ ސަބަބުން ބާސެލޯނާގެ ރޮބާޓް ލެވަންޑޯސްކީ، ފްރެންކީ ޑި ޔޯން، ޕެޑްރީ އަދި ޖޫލްސް ކޫންޑޭ ފަދަ ކުޅުންތެރިން ކުޅުމާ ދުރުގައި ތިބޭތާ ދުވަސްކޮޅެއް ވެއްޖެ އެވެ. ޒަވީ ބުނީ މީގެ ކުރިން ޓީމުގައި ނުހިމެނުނު ކުޅުންތެރިން އެނބުރި އައިސްފައިވާ ކަމަށެވެ. އެ ކުޅުންތެރިންގެ ޙާލަތު ފެންނަނީ ރަނގަޅަށްކަން ފާހަގަކޮށް ޒަވީ ބުނީ، އެލް ކްލެސިކޯ ކަހަލަ މުހިންމު މެޗުތަކުގައި އެ ކުޅުންތެރިން ބޭނުންވާ ކަމަށެވެ. ނަމަވެސް މެޗުގައި އެ ކުޅުންތެރިން ބޭނުން ކުރާނީ އެންމެ ފަހު ވަގުތު ވެސް ބަލަން ޖެހޭ ކަންކަމަށް ބެލުމަށްފަހު ކަމަށް ޒަވީ ބުންޏެވެ. އެހެންކަމުން ބާސެލޯނާ އިން ކުރިއަށް ގެންދާ އެންމެ ފަހުގެ ތަމްރީނަށްފަހު އެކަންކަން އިވެލުއޭޓު ކުރާނެ ކަމަށް ޒަވީ ބުންޏެވެ.

އިތުރަށް ވާހަކަ ދައްކަމުން ޒަވީ ބުނީ، އޭނާ އަށް ޤަބޫލު ކުރެވޭ ގޮތުގައި ރެއާލްގެ އެޓޭކު ވަރުގަދަ ވާނެއެވެ. ޚާއްސަކޮށް ރެއާލްމެޑްރިޑުގެ ޒުވާން ކުޅުންތެރިޔާ، ޖޫޑް ބެލިންހަމް މޮޅަށް ކުޅެމުން އަންނަ ކަމަށާއި، އޭނާ ހުއްޓުވުމަށް ބާސެލޯނާ އިން ރަނގަޅު ކަންތައްތަކެއް ކުރަން ޖެހޭނެ ކަމަށް ޒަވީ ވަނީ ބުނެފަ އެވެ. ޒަވީ ފާހަގަ ކުރި ގޮތުގައި އިދިކޮޅު ޓީމުގެ އެޓޭކުތައް ހުއްޓުވައިގެން، ބާސެލޯނާ އަށް އެޓޭކު ކުރެވޭނެ އެވެ. ސަބަބަކީ އެ ފެންވަރުގެ ކުޅުންތެރިން ބާސެލޯނާގައި ތިބުން ކަމަށް ވެސް ޒަވީ ވަނީ ބުނެފަ އެވެ.

މި ދެ ޓީމު ހޮނިހިރު ދުވަހުގެ ރޭ ބައްދަލު ކުރާއިރު، ރެއާލް އޮތީ ކުޅުނު 10 މެޗުން 25 ޕޮއިންޓާއެކު ދެ ވަނައިގަ އެވެ. ހަމަ އެ އަދަދަށް މެޗު ކުޅެގެން ބާސެލޯނާ އަށް ލިބެނީ 24 ޕޮއިންޓެވެ. އެއް ވަނައިގައި ޖިރޯނާ އޮތީ އެއް މެޗު އިތުރަށް ކުޅެގެން 28 ޕޮއިންޓު ހޯދައިގެންނެވެ.