ޣައްޒާގެ އައްޝިފާ ހޮސްޕިޓަލުގައި ހިޔާވަހިކަން ހޯދަމުންދާ އާއިލާތަކުގެ ހަޔާތުން ދުވަހެއް!

ހައްދު ފަހަނައަޅާފައިވާ ޔަހޫދީ ޒަޔަނިސްޓުންގެ ލާއިންސާނީ ހަމަލާތަކުގައި، ފަލަސްތީނުގެ ގެދޮރު ގެއްލިފައިވާ 50،000ށްވުރެ ގިނަ މީހުން އައްޝިފާ ހޮސްޕިޓަލުގައި ދަނީ ހިމާޔަތް ހޯދަމުންނެވެ.

ޣައްޒާގެ އެހެން ސިއްހީ ނިޒާމުތަކެކޭ އެއްފަދައިން، ސޯލާއިން ހިންގާ ޖަނަރޭޓަރުތަކުން ވަރަށް މަދުން ހަކަތަ އުފައްދަމުން އަންނަ މި ހޮސްޕިޓާވެސް ވަނީ ގާތްގަޑަކަށް އިސްރާއީލުގެ ހަމަލާތަކުގައި ފުނޑުފުނޑުވެފައެވެ.

އެކަމަކު ގިނަ އާއިލާތައް ހޮސްޕިޓަލުގައި މަޑުކުރަން މަޖުބޫރުވީ، ދެކުނުން ޚާން ޔޫނިސްއަށް ދިއުމަށްވުރެ ރައްކާތެރި ގޮތެއް ކަމަށް ގަބޫލުކުރެވިގެންނެވެ. ސާފު ފެނާއި އެކަށީގެންވާ ބޯހިޔާވަހިކަމެއް ނެތުމުގެ ސަބަބުން، ދިރިއުޅުމުގެ ހާލަތު އޮތީ އާދަޔާޚިލާފު ކާރިސާއެއްގެ ތެރޭގައެވެ.

ފަސް ފިރިހެން ކުދިންނާއި ތިން އަންހެން ކުދިންގެ މަންމަ ކަމަށްވާ އުމުރުން 41 އަހަރުގެ ޣާނިޔާ ހަނިއްޔާ އިންނަނީ، ބެޑްޝީޓާއި ބްލެންކެޓުން ހަދާފައިވާ ވަގުތީ ޓެންޓެއްގެ ތެރޭގައެވެ.

ޝައިޚް ރަދުވާން އަވަށުގައި ހުންނަ އެމީހުންގެ ގެއިން އޭނާގެ އާއިލާ ފިލައިގެން ދިޔައީ އެ ސަރަހައްދުގައި އިސްރާއީލް ސިފައިން ދިން ހަމަލާތަކުގައި ގޮއްވި ގޮއްވުންތަކާއެކު އިވުނު އަޑުފަށްގަނޑަށް ކެތްނުކުރެވިގެންނެވެ.

ކޮންމެ ދުވަހެއްވެސް ފެށެނީ ފަތިހު ކުޑަކުދިން ނުވަތަ ފިރިހެނުން އެމީހުންގެ ޕްލާސްޓިކް ޖަގުތައް ހިފައިގެން ފެންހޮޅި ކައިރިއަށްގޮސް، (ލޮނު) ފެން ގެނައުމަށް ދިގު ސަފުގައި ކިޔޫ ހަދައިގެން ތިއްބައެވެ. ޣައްޒާއިން ކަރަންޓު ކެނޑިފައިވާތީ، ޑީސެލިނޭޝަން ޕްލާންޓުގެ ޚިދުމަތެއް ނުލިބެއެވެ. ސާފު ފެން ވަރަށް މަދުން ނޫނީ ނުލިބެއެވެ.

ހެނދުނުގެ ނާސްތާއަކީ ދަޅުގައި ބަންދުކޮށްފައި ހުންނަ ފިއުލް މެޑެމްސް ނުވަތަ ފާވާ ބީންސްއެވެ.

ސަޔަށް ފަހު ދެންއޮންނާނީ ފާޚާނާގެ ބޭރުގައި، ފާޚާނާ ލިބޭނެ ވަގުތެއްގެ އިންތިޒާރުގައި ތިބި މީހުންގެ ދިގު ސަފުތަކެވެ.

ބިންމަތީގައި ޣާނިޔާއާއި އޭނާގެ ދަރިން ނިދަނީ ތުނި ދެ ބްލެންކެޓް މަތީގައެވެ. އަތުގައި ދެން ހުރި މަދު ބްލޭންކެޓްތައް ބޭނުންކުރަނީ އަންހެނުންނާއި ފިރިހެނުން ނިދާ ތަން ވަކިކުރުމަށާއި، ނިވާކުރުމަށެވެ.

އޭނާގެ ދައްތަ އިމްމު މުހައްމަދު އަލްމުއްލާ ދިރިއުޅެމުން ދަނީ އޭނާގެ ދޮންބައްޕައާއި ފަސް ދަރިންނާއެކު، ޖެހިގެން ހުރި ޓެންޓުއެވެ.

މުހައްމަދު ބޭނުންވަނީ ހަނގުރާމައިގެ ހާލަތުން ނުކުމެ އާދައިގެ އަމާން ދިރިއުޅުމެއް އުޅެވުމެވެ. ނަމަވެސް އިސްރާއީލުން ދިން ވައިގެ ހަމަލާއެއްގައި އޭނާގެ ގެ ހަލާކުވެ، ޝައިޚް ރަދުވާންގައި އޮންނަ އޭނާގެ މުޅި އަވަށް ގެއްލިފައިވާކަމަށް އޭނާ ބުނެއެވެ.

ޣައްޒާއަށް ދެމުންދާ އުދުވާނީ ހަމަލާތައް އިސްރާއީލުން ރޭވެސް ވަރުގަދަކޮށްފައި ވާއިރު، މުޅި ޣައްޒާއިން ވަނީ މުވާސަލާތީ ޚިދުމަތް ކެނޑިފައެވެ. ޣައްޒާގެ އެއްވެސް ހިސާބަކަށް މިހާރު މޯބައިލް ފޯނާއި، އިންޓަނެޓުގެ ޚިދުމަތެއް ނުލިބެއެވެ.