އިނގިރޭސި ޕްރިމިއަރ ލީގު ތާވަލްގެ އެއްވަނާގައި ޓޮޓެންހަމުން 5 ޕޮއިންޓުގެ ލީޑެއް ނަގައިފިއެވެ.
ޓޮޓެންހަމުން ލީޑް ފުޅާކުރީ ހުކުރު ދުވަހުގެރޭ 2-1ން ކްރިސްޓަލް ޕެލަސް ބަލިކޮށްގެންނެވެ. ކްރިސްޓަލް ޕެލަސްގެ ދަނޑުގައި ކުޅުނު މެޗުގެ ދެވަނަ ހާފްގެ ކުރީކޮޅު ޓޮޓެންހަމަށް ލީޑް ލިބުނީ، ވާޑް އަތުން ބައިކޮޅަށް ވަން ލަނޑުންނެވެ. އެއީ މަޑިސަން ނެގި ހުރަސް ސާފްކޮށްލަން އުޅުމުގެ ތެރޭގައެވެ. ދެވަނަ ލަނޑެއް ޖަހައި ލީޑް ފުޅާކުރީ ރަނގަޅު ފޯމެއްގައި ހުރި ކެޕްޓަން ސޮންއެވެ. ކްރިސްޓަލް ޕެލަސްއިން މެޗުގައި ލަނޑެއް ޖެހީ އިތުރު ވަގުތުގައެވެ. ލަނޑު ޖަހައިދިނީ ޖޭ އަޔޫއެވެ.
މި މޮޅާއެކު ޓޮޓެންހަމްގެ ލީޑް ފަސް ޕޮއިންޓަށް މައްޗަށް ޖެހުނީ އެހެން ޓީމްތަކަށްވުރެ އިތުރަށް މެޗެއް ކުޅެގެންނެވެ. މެޗުގެ އަދަދު ހަމަކުރުމުންވެސް، މިހަފުތާ ނިމޭއިރު އެއްވަނާގައި އޮންނާނީ ޓޮޓެންހަމެވެ. މި ސީޒަނުގެ ލީގުގައި މިހާތަނަށް ކުޅުނު 10 މެޗުގެ ތެރެއިން ޓޮޓެންހަމް ވަނީ އަށް މެޗުން މޮޅުވެފައެވެ. އަނެއް ދެ މެޗު ނިމުނީ އެއްވަރުވެގެންނެވެ.
