ފަލަސްތީނަށް އެހީވުމަށް ފަންޑު ހޯދުމަށް ފިލްމް އެސޯސިއޭޝަނުން ގިނަ ހަރަކާތްތަކެއް ބާއްވަނީ

ޔަހުދީ ޒަޔަނިސްޓު އިސްރާއީލުން ފަލަސްތީނުގެ ރައްޔިތުންނަށް ދެމުންދާ ހަމަލާތަކުގެ ސަބަބުން ހާލުގައި ޖެހިފައިވާ އެގައުމުގެ ރައްޔިތުންނަށް އެހީވުމުގެ ގޮތުން ފަންޑު ހޯދުމަށް މޯލްޑިވްސް ފިލްމް އެސޯސިއޭޝަން އިން އިސްނަގައިގެން ކުރިއަށް ގެންދާ ހަރަކާތްތައް މިއަދު ފަށައިފި އެވެ.

"އިންސާނިއްޔަތައް ޓަކައި" ގެ ނަމުގައި ހުކުރު ދުވަހު ހަވީރު ފެށި މި ހަރަކާތްތައް ފަށައިފައިވަނީ އޮލިމްޕަސް ސިނަމާ ކުރިމަތިންނެވެ. މި އިވެންޓުގައި ރާއްޖޭގެ ފިލްމީ ދައިރާގެ އެކި ފަރާތްތަކުން ވަނީ ބައިވެރިވިވެފަ އެވެ.

މި އިވެންޓުގެ ދަށުން ގިނަ ހަރަކާތްތަކެއް ކުރިއަށް ގެންދިޔުމަށް އެ އެސޯސިއޭޝަނުން ވަނީ ނިންމާފަ އެވެ. އެގޮތުން މި ހަރަކާތްތަކުގެ މައުލޫމާތު ދެއްވަމުން ފިލްމީ ތަރި މުހައްމަދު މަނިކު ވިދާޅުވީ އެ ހަރަކާތްތަކުން ލިބޭ ހުރިހާ ފައިސާއެއް ވެސް ފޯރުކޮށްދޭނީ ފަލަސްތީނުގެ ރައްޔިތުންނަށް ކަމަށެވެ.

އޭނާ ވިދާޅުވި ގޮތުގަައި މި ހަރަކާތުގެ ދަށުން ފަންޑު ފޮށި ބަހައްޓައިގެން ފައިސާ ހޯދޭ އިރު، ދިވެހި މަޝްހޫރު ފިލްމުތައް ވެސް އޮލިމްފަހުގައި އަޅުވާނެ އެވެ. ފިލްމް ފެސްޓިވަލެއްގެ ގޮތުގައި ތިން ދަންފަޅިއަކަށް ބަހާލައިގެން އަޅުވާ މި ފިލްމުތަކަށް ވަނުމަށް ޓިކެޓު ގަންނަން ޖެހޭއިރު، މި ޓިކެޓުތަކުން ލިބޭ ފައިސާ ވެސް ފޯރުކޮށްދެނީ ފަލަސްތީނުގެ ރައްޔިތުންނަށެވެ. މި ހަރަކާތުގެ ދަށުން ވިއްކޭ ކޮންމެ ޓިކެޓެއްގެ އަގު އުޅެނީ 100 ރުފިޔާއަށެވެ.

މީގެ އިތުރުން މި ހަރަކާތުގެ ދަށުން ހޮނިހިރު ދުވަހު ކުޑަކުދިންގެ ހަވީރެއް އޮންނަ އިރު، މި ހަރަކާތުގައި ކުޑަކުދިންގެ މުނިފޫހި ފިލުވާނެ ފަދަ އެކި ހަރަކާތްތައް ކުރިއަށް ދާނެ އެވެ.

ފިލްމް އެސޯސިއޭޝަންގެ މި އިވެންޓުގެ ތެރެއިން ކުރިއަށްގެންދާ އެންމެ ބޮޑު ހަރަކާތަކީ ރާއްޖޭގެ އެކި ކަންކޮޅުތަކުގައި އެ އެސޯސިއޭޝަނުން ބައްވާ މަސް ދަތުރެވެ. މި އަންނަ މަހުގެ ތިން ވަނަ ދުވަހު އޮންނަ މި މަސް ދަތުރުގައި އެކި އޮފީސްތަކާއި އިދާރާތަކުން ބައިވެރިވަމުންދާއިރު، މި މަސް ދަތުރުގައި ބޭނޭ މަސްތައް ވިއްކައިގެން ލިބޭ ހުރިހާ ފައިސާއެއް ވެސް ދިނުމަށް ނިންމާފައިވަނީ ފަލަސްތީނުގެ ރައްޔިތުންނަށް އެހީ ވުމަށެވެ.